Magala ma Nzige
2
1 Idazi monze mu Sayuni, tondazi bantu n'iyuki inene ku mwiduko wane wasililila! Bantu bansania ba kisi bagilimine, kubuno busi bwa Yehowa bwavwa, lebelebe buse bwigi. 2 Busi bwa kapilo nu bwa lusombanio, nu busi bwa bimpa nu bwa mwizi mukali, anga bukukya busi mu miduko, bubo ububo bukuvwa iyombo inene nu lya magala; lwabusio lwalyo takwabezaga lingo anga lilyo, aba talikaba lingo mu bindi bikavwa. 3 Keiya kakugisia lwabusio lwalyo, nu kumbusa kwalyo kukutinga ngulumina za keiya. Kisi kyabezaga kisoga lwabusio lwalyo anga isoa lya Edeni, nu kumbusa kwalyo anga bukindu. Takukonibwa kyampa. 4 Likumoneka anga farasi; likwituma lubilo anga farasi za bita. 5 Likulenga gantata miduko na nkindo anga kukwenda tuyanga, anga kutotoka kwa keiya kakugisia bisugu byakama. Lili anga iyombo lyabikwa kayikayika ku bita.
6 Lwabusio lwalyo mitima za bantu zikugilimina; bilungi byabo binsania byagaluka na boba. 7 Ba lilyo iyombo bakwenda lubilo anga mapuka, bakubakama ku bitutu anga mayombo ma bita. Nawe nawe na ukwenda mu masomoneno ma munyage, tabakutuka mu nzila zabo. 8 Tabakwitubania ko, nawe na uli na nzila zage. Bakwendula mikolo za bita nu tabakutuka mu nzila zabo. 9 Bakulenga gantata mwino, bakwituma lubilo ku bitutu; bakubakama gantata numba; bakwingilila ga madilisa anga beibi.
10 Kisi kikutengatenga lwabusio lwabo nu meigulu makutengatenga; kusana kwa kisongo kya busi nu kwa mwezi kwakulubila, nu nkeninkeni zazimia kusana kwazo. 11 Yehowa akungusia iyuki lyage lwabusio lw'iyombo lyage. Lebelebe iyombo lyage lili inene nunse, kubuno We eli mwiya magala mu kukita bwakutunda, kubuno busi bwa Yehowa buli bunene nunse nu bwa kwitia boba. Nazi unabuvwama?
Mponga za Yehowa
12 Yehowa atenda bunee: “Kuli nkungu; galukazi kundi kano kaluma na mutima weinyu unsania, na kwikanda idia, nu kubasia bisozi nu kulila. 13 Atazi mitima zeinyu nu tamwate nsulu zeinyu.” Galukazi ku Yehowa, Kalaga weinyu, kubuno eli mwiya mponga nu eiyala na kyombo. Ntakusasia kongoa, nu akwitila na kyombo, akwiyania kukusinga bubi. 14 Nazi wizi? Embe anagaluka nu kwiyania nu kusiga mponga kumbusa kwage, kayulo ka bunga bwa ngano nu ka kunua ku Yehowa, Kalaga weinyu?
15 Idazi monze mu Sayuni, kakiziazi kwikanda idia, manazi musanganano wa kukumbamina. 16 Kundamaniazi bantu, nu engiazi musanganano; kundamania bakulu nu mitoka nu babo bakumoma. Musongi atuke mu kiziki kyage, nu mwakali ku busio bwage. 17 Basankoga bakukitila Yehowa lwabusio lwage balile gasamba lusu nu kayulo; nu batende bunee: “Ee Yehowa, sigilila bwagi bwa bantu bobe, nu ntubigie ntiko zobe, aba kwitabizia baBilongo kubangata aba kubanyega munkatini mwa bantu bunee: ‘Kuni kuli Kalaga wabo?’”
18 Nu Yehowa eli na lugi ku kisi kyage, nu akukwila bantu bage kyombo. 19 Nu akule bantu bage bunee: “Kano kaluma namusingile ngano, nu maku m'ituba, nu makiti; nu mwembuke nabyo. Nu tamukanyegwa lingo munkatini mwa bilongo. 20 Nkatikya iyombo lya ku lulenge lwa kwikazi bulazi n'inyu, nu nkalipumbia ku kisi kyakama nu kya bukindu; nu ntonga zalyo zabe mu kitatenge kya lulenge lwa kuntata, nu kuzinda kwalyo kwabe ku lulenge lwa kunsi. Nu isunda lyage lyabakame mu mpena, nu iyugo lyage ibi lyende mu mpena, kubuno Yehowa akitile bitondo binene.”
21 Ee kisi, ntukue boba! Bogaboga, nu ba na kyelele, kubuno Yehowa akitile bitondo binene! 22 Nyama za lubanda, tamukue boba kubuno malambo ma lubanda malinga kwasa. Miti zikukolama biguma nu mutini nu mizigi za mizabibu nu kisikesike zikukolama biguma byingi. 23 Inyuwe bantu ba ku Sayuni, bogazibogazi nu kuba na kyelele mu Yehowa, Kalaga weinyu! Kubuno amukase mbula ku kabamba ka kwisanana kwage; amulokezye mbula ntangi nu nzinda za mwaka anga wakalazi. 24 Bigenge biyale na ngano nu ndego ziyale nunsania na maku m'ituba nu makiti.
25 Nu nne Yehowa namusubizie bibyo byalide nzige mu myaka zezo, nu byalide mande nu nsinsi nu nkonzo, mayombo mane manasingile munkatini mweinyu. 26 Mwalie nunse nu kwembuka, nu mwaganune izina lya Yehowa, Kalaga weinyu wamukitide miganogano. Nu bantu bane tabakue na nsoni lingo. 27 Nu inyuwe mwamenye buno nne nili munkatini mwa Israeli, nu buno nnenyene nili Yehowa, Kalaga weinyu, nu buno takuli ungo. Nu bantu bane tabakue na nsoni lingo ku milyalya.
28 Kumbusa kwa bitondo bibino nkakubula Muuza wane ku bantu bansania; basikila nu bakinga beinyu bakalengania; bakulu beinyu bakakesia na ndozi, nu mitoka zeinyu zikamona tulolesio. 29 Nu ku bibyo bindi nkakubula Muuza wane ku bakiti bane bamulume nu bakikulu.
30 Nu nkalolesia miganogano mwigulu nu mu kisi; mikila, nu keiya nu milili za muuki. 31 Musi ukagaluka kuba kapilo, nu mwezi kuba mikila lwabusio lwa kuvwa kwa busi bubo bunene nu bwa boba bwa Yehowa. 32 Nu unsania ukasegaga ku izina lya Yehowa nti onibwe; kubuno ku mwiduko wa Sayuni nu ku Yerusalema kukaba lonio anga bwatendile Yehowa, nu munkatini mwa babo basigala bamanwe na Yehowa.