Lusungio lwa Kalaga ku bilongo
3
1 Yehowa atenda bunee: “Mu bibyo bindi nu mu zezo nkungu, gankasubya bantu ba Yuda nu ba Yerusalema kutuka ku bukobe nu kuba anga bubabezaga, 2 nkakundamania bilongo binsania nu nkabagezia ku kibitabita kya Yosafati, nu nkabasungia gago ku kabamba ka bantu bane ba Israeli, bwiyani bwane, bababalanganizie munkatini mwa bilongo nu kubegania kisi kyane. 3 Besile bantu bane mbale, bakunzisizie musikila ku kitazi nu mukinga ku maku m'ituba buno banue. 4 Inyuwe Tiro nu Sidoni nu ntungo insania za Filistia muli na kikizi kundi? Ndi mukutunda kwisuba kundi? Ndi mwisuba kundi, nti nasasie kusubya musubo weinyu gantata ga matoe meinyu. 5 Kubuno mwibile feza nu olo zane nu mwekile bintu byane bya bukunza bukali ku numba zeinyu za kukumbamina. 6 Mwakunzizie baYuda nu babo ba ku Yerusalema ku baYunani, buno mubenzie bulazi na kisi kyabo. 7 Tondo nkabamana nu kubatikya ku kiziki kimwabakunzizie ko, nkasubya bubi bweinyu gantata ga matoe meinyu. 8 Nu nakunzie basikila nu bakinga beinyu ku baYuda nu bakabakunzia ku bantu ba Seba ku kilongo kili bulazi. Bubo u bwatenda Yehowa.”
9 Sambalazi bitondo bibino ku ba bilongo: mube kayikayika ku bita! Yukyazi mapuka! Bansania ba bita bavwe bwigi, nu babakame. 10 Tulazi membe meinyu kuba myene za nganda, nu migusu zeinyu kuba masumo; nu watamba atende bunee: “Nne nili ipuka.” 11 Beinyuwe ba bilongo ba ntungo insania, sasiazi kuvwa; kundamanazi gamozi.
Ee Yehowa, mana mapuka mobe.
12 Babilongo bayukibwe buno bavwe ku kibitabita kya Yosafati. Nne Yehowa nkeikala gago kusungia ba bilongo ba ntungo insania. 13 Katazi myene kubuno matubulo meika. Vwazi kukambutula kubuno tunsango twa maku twiyala nu tuse twetila gansi. Kubuno bwagi bwabo buli bunene.
14 Ntali ku ntali za bantu mu kibitabita kya lusungio! Kubuno busi bwa Yehowa buse bwigi mu kibitabita kya lusungio. 15 Musi nu mwezi biseli kapilo nu nkeninkeni tazikusana.
Lonio lwa Bantu
16 Yehowa azuge kutuka ku Sayuni, nu kulaluka n'iyuki lyage kutuka ku Yerusalema. Igulu nu kisi byatengetenge, tondo Yehowa abe itinino lya bantu bage nu kiziki kyalanga kya mukolo mubibu kya bantu ba Israeli. 17 Bubo mukamenya buno nne nili Yehowa, Kalaga weinyu; nkwikala mu Sayuni, mwiduko wane wasililila. Nu Yerusalema ukaba wasililila, nu babilongo tabakatinga lingo mugo. 18 Nu bukaba mu bubo busi buno miduko zikatogia maku m'ituba, nu nkangamo zikagezia mabele, nu nuuzi nkeke insania za Yuda zikeiyala na mazi. kanuabalongo kakabasa mu numba za Yehowa nu kununia kibitabita kya Sitimu. 19 Misri ukaba bukindu nu Edomu ukaba kalula kubuno basungizie bana ba Yuda, nu babalanganizie mikila ziteli na bwagi bwampa mu kisi kyabo.