Bongoa bwa Kalaga ku Moabu, Yuda, nu Israeli
2
1 Bubuno u bukutenda Yehowa bunee: “Ku kabamba ka kwaga kwa masatu kwa Moabu aba kwa manazi, nsikagalukya lusungio lwabo, kubuno bagisizie makwa ma mukota wa Edomu, aaba nu kuba lwito. 2 Ububo nkasinga keiya ku Moabu, kakagisia numba nnene za gugumana za Kerioti, nu Moabu akakua mu mulubu nu mu kulaluka na moki ma bita nu mu kwida monze. 3 Nkazikya ngatu munkatini mwage, nu kwita bangati bage bansania gamozi nage. Bubo u bukutenda Yehowa.” 4 Yehowa atenda bunee: “Ku kwaga kwa masatu kwa Yuda, nu kwa manazi, nsikagalukya lusungio lwabo, kubuno basombile mulembe wa Yehowa, nu tabanzile makakizio mage; kubuno bagile mu kuyanga tulaga twa buza twayangaga beisibo. 5 Tondo nkasinga keiya ku Yuda, kakugisia numba nnene za gugumana za Yerusalema.”
6 Yehowa akutenda bunee: “Ku kabamba ka kwaga kwa masatu kwa Israeli nu kwa manazi nsikagalukya lusungio lwabo kubuno bakunzizie beisanana ku bikulo, nu bazambi ku bisalapata. 7 Kubuno bakubigia bantu bazambi buno beisakike, bakugalukya basoga ku misako zabo. Mwana nu isi bakukita butazi na mukikulu umozi; ububo bakubigia izina lyane lyasililila. 8 Nu bakwiyombeka mu ntungo mwa kasenga na kasenga gantata nsulu za mwima, nu mu numba za kalaga kabo bakunua maku ma babo bakandwa.
9 Tondo nne nazikizye baAmori lwabusio lwabo, aba kusakama kwabo kwabezaga anga mierezi nu magala mabo anga mialo; nne nazikizye biguma bya miti nu mizi zazo. 10 Nne u wamutikizye mu kisi kya Misri nu kumusondelezia mu kalula myaka makumi manazi, buno mupiene kisi kya baAmori. 11 Nne u wasombwede bana beinyu kuba balengania, nu bamozi kuba baNaziri. Ndi tabubo, inyuwe bantu ba Israeli?” u bukutenda Yehowa. 12 “Mwasindikile baNaziri buno banue maku nu mwakakizizie balengania buno tabalenganie!
13 Nkungu zeno nkamukutia mu kiziki kyeinyu, anga bukukutwa kayanga keiyala na mizigo. 14 Muntu musasia ntakatina, nu muntu mubibu ntakaba na magala, aba mwiya magala ntakeiyonia. 15 Ndasa za misungu ntakemana; mwiya magulu masasia nu mwiya farasi tabakeiyonia. 16 Aba mapuka m'iyombo bakatina mundulu mu busi bubo. Bubo u bukutenda Yehowa.”