Kusambala kwa mulengania
3
1 Inyuwe baIsraeli, ungwililazi iyuki lilino likutenda Yehowa kumuli bunee: “Ku kikanga kinsania kinigizie kutuka ku Misri. 2 Inyuwe tugu u banasombwede munkatini mwa bikanga binsania bya kisi; ku kabamba ka bwagi bweinyu bunsania nkamusungia. 3 Ndi bantu babili banavwama kwenda gamozi tabakala lwango? 4 Ndi kimbwe kinatenda kabuluga takikeite? Ndi kyana kya kimbwe kinazuga nu takili na kyakulia? 5 Ndi kazoni kanakatwa g'itega ndi taligikwa? Aba ndi itega linonia geteli kukata kena? 6 Kungwa monze widwa mu mwino, ndi bantu tabakue boba? Ndi kabebe kavwa mu mwino, ndi ta Yehowa u wakasinga?
7 Yehowa, Mwiya Bwangato Bunsania ntakukita kena geteli kulolesia kakungu kage ku bakiti bage, u balengania.
8 Yehowa, Mwiya Bwangato Bunsania atenda bunee: ‘Kimbwe kikuzuga, nazi utanakua boba? Nazi utanalengania?’
Kuzika kwa Samaria
9 Sambalazi mu numba nnene za gugumana mu Asidodi nu mu zezo za Misri, nu kutenda bunee: ‘Kundamanazi ku miduko za Samaria, mumone ku kuzangazanga kwabo nu tubebe twabo munkatini mwazo.’
10 Yehowa akutenda bunee: ‘Tabakumenya kukita bwisanana, numba zabo ziyala na bwiti nu bwibi.’ 11 Ku kabamba kako Yehowa, Mwiya Bwangato Bunsania atenda bunee: ‘Mwiti akaguba kisi kyeinyu, nu kukinda biziki byeinyu byalanga bya magala, nu kunyaga numba zeinyu zagugumana.’
12 Yehowa atenda bunee: ‘Anga bukonia mulangi wa mikoko onia kugulu, aba magulu mabili aba kyindi kya kutuzi kwa mukoko kutuka mu kanua ka kimbwe, ububo bukonibwa bantu ba Israeli mu Samaria bakwikalaga ku ntungo kwa mugu nu ga nsulu za mugu. 13 Ungwililazi nu songololazi ku numba za Yakobo’; u bukutenda Mukota, Kalaga Yehowa, Mwiya Mayombo. 14 Kubuno busi bunkasungia baIsraeli ku mibi zabo nkakeka tusenga twa Beteli nu mega ma tusenga makakoloka gansi. 15 Nkasambula numba zeinyu za mpego nu za muzuzo nu numba za milamba zazike, nu numba nnene tazamoneke ko lingo. Bubo u bukutenda Yehowa.”