Lusungio lwa Kalaga ku baIsraeli
9
1 Nu namonine ku Mukota emana ku meza ma kayulo nu atendile bunee: “Libula miima buno bitiko bitengetenge nu kubibungula byindi byindi, nu sesa matoe ma babo bansania; nu babo bakasigala nkabeita na mwene wa nganda. Ta umozi ukatina nu kwiyonia. 2 ‘Ndi bomba munsi ku kiziki kya bakuzi, nti kuboko kwane kukabatola kuko. Aba ndi babakama ku meigulu, nabagezie kutuka kuko. 3 Ndi babisama gantata mwiduko wa Karmeli, nti nkabalonda nu kubakatako. Aba ndi babisama mu iziba lya kitatenge nti nkasinga nzoka zibatoe. 4 Aba ndi beigibwa ku bukobe na beiti babo, nti nkasinga mwene wa nganda kubeita.’
5 Kubuno Mukota, Yehowa, Mwiya Mayombo, wozo ukwitubagia ku kisi nu nti kyanyenguka, nu bansania beli mukyo nti bakulila na kabebe; kikuba na mwiyalo anga luuzi lwa Misri, nu kukokoka lingo anga luuzi lwa Misri, 6 nu We wobakile numba nnene zage kwigulu, nu kutimba kisi n'igulu, wozo ukumanaga mazi ma kitatenge nu kumakubula gantata kisi, Yehowa u izina lyage.
7 Ee inyuwe baIsraeli, ndi tamuli bumozi na baEtiopia kundi?” U bukubuzia Yehowa. “Ndi nsyatikizye baIsraeli ku kisi kya Misri, nu baFilistini ku Kafutori, nu baAsuria ku Kiri?
8 Meiso ma Yehowa, Mwiya Bwangato Bunsania, makulola ku bukota bwa bwagi; nkabuzikya mu kisi, tondo nsikazikya numba insania za Yakobo,” u bukutenda Yehowa. 9 “Nkukakizia kupumbia numba za Yakobo munkatini mwa bilongo binsania anga mumpunge ukupepwa ga lweli, tondo takukakoloka kaguma kamozi gansi. 10 Bagi bansania munkatini mwa bantu bane bakakua na mwene wa nganda, babo bakutenda bunee: ‘Kuzika takukatusanga aba kutukata.’
Idagano lya kusubya kwa baIsraeli
11 Ku busi bubo, nkobaka mwino wa Davidi wasambukile, nu kukulumizia bitutu byatumukile, nu nkagobaka anga buwabezaga wakalazi, 12 buno bapiene baEdomu nu bilongo binsania byamaninwe mu izina lyane,” u bukutenda Yehowa, ukukitaga bitondo bibino.
13 Nu Yehowa atenda bunee: “Bindi byavwe, mulimi akulumane na mutubuzi, nu wozo ukukambutula biguma akakulumana na muyiki wa mbuto. Ku mwiduko kukaba mizigi ningi za biguma zikubasia maku mingi m'ituba; nu mu nkangamo insania mukanyenguka matubulo mengi. 14 Nkatikya lingo bantu bane baIsraeli ku bukobe, nubo bakobaka lingo miino zazikizibwe nu kwikala muzo. Bakayika masoa ma biguma nu kunua mazi mabyo. 15 Nkabeikazia mu kisi kinabakasile kupiena; tabakigibwa lingo.” Bubo u bukutenda Yehowa, Kalaga weinyu.