Lusungio lwa baIsraeli luse bwigi
8
1 Nu Yehowa, Mwiya Bwangato Bunsania andolesizie luzi lwa biguma byela bya nkungu za mpombo. 2 Nu ambuzizie bunee: “Amosi, wamona ku kikizi?” Nu namwakwide bunee: “Namona ku luzi lwa biguma byela.”
Nu Yehowa antendile bunee: “Kuzinda kwa bantu ba Israeli kwika, nsyabasigilile lingo. 3 Mu busi bubo nimbo za mu numba za mukota zagaluke kuba idilo, u bukutenda Yehowa, Mwiya Bwangato Bunsania. Nu bitumba byabe byingi nu biswe na go na go geteli kulila.”
4 Inyuwe bakusungia bazambi nu kwita babo babota, ungwililazi bubuno: 5 Mukutenda bunee: “Mbalo za mwezi zasile nkungu nkizi buno tukunzie ngano? Nu busi bwa Sabato bwasile ku nkungu nkizi buno tukunzie bunga bwa ngano, buno tusigulizie kilindiko, nu kutalikila mutali wa shekeli, nu kwengelela na bilindiko bya buza. 6 Kumbusa twakunze bazambi na feza nu beiyanizi na bisalapata, nu twakunzie mpepa gamozi na ngano.”
7 Yehowa alumbide ku kabamba ka lwikotio lwa Yakobo bunee: “Lebelebe nsikeibilila nunse kinsania kya makitilo mabo. 8 Ndi kisi takikatengatenga ku kabamba ka bitondo bibino? Nu unsania uli mukyo ntakalila? Lebelebe kisi kikasakama anga luuzi lwiyala na mwiyalo nunse, nu kukokoka anga luuzi lwa Misri.” a 9 Nu Yehowa, Mwiya Bwangato Bunsania atendile bunee: “Mu bubo busi nkidya busi ga makuluka nu kisi kikaba na kapilo munkatini mwa busi. 10 Nu nkagalukya bisagulo byeinyu ku tubebe, nu numba zeinyu ku idilo. Nkavwalikya bibunda binsania makunino nu matoe mansania na bisegesege. Nu nkungu zezo zikaba anga idilo lya mwana wangomo. Nu kuzinda kwazo kukaba anga busi bwa kabebe kakali.”
11 Bubuno u bukutenda Yehowa, Mwiya Bwangato Bunsania bunee: “Bindi bikavwa nkasinga nzala mu kisi, ta nzala z'idia aba mpusia za mazi, tondo nzala za kungwa ku moki ma Yehowa. 12 Bakenda ku kitatenge na kitatenge nu ku lulenge lwa kwikazi nu lwa kuntata, bakeituma lubilo na ko na ko kulonda moki ma Yehowa, tondo tabakalimona. 13 Ku busi bubo, bakinga beli mbangilwa nu basikila ba magala bakakua na mpusia. 14 Nu bansania bakulumbila ku Ashina, kalaga mukikulu ka Samaria, u babo bakatenda bunee: ‘Lebelebe anga bukulama kalaga kobe, ee Dani, aba lebelebe anga bukulama kalaga ka Beri-Seba,’ babo bansania bakakua nu kutazanzuka lingo.”