Tulolesio tusatu
7
1 Yehowa, Mwiya Bwangato Bunsania, andolesizie bubuno: akungikile bibombo bya nzige mu nkungu za kulinga kwa kwasa kwa bisese, nu lola byabezaga biyikanwa bya kumbusa kwa matubulo ma mukota. 2 Nu gazasilile kulia nsamba za kisi natendile bunee: “Ee Yehowa, Mwiya Bwangato Bunsania, nkukusega buno usigilile bwagi! Buni bwalame Yakobo? Kubuno eli mukeke.” 3 Nu Yehowa agalukizye makengelo mage nu atendile bunee: “Bubo tabwabe lingo.”
4 Yehowa, Mwiya Bwangato Bunsania, andolesizie bubuno: akakizizie lusungio lwa keiya nu kakamizie biziba binene nu kalingile kuzikya masoa ma kisi. 5 Ububo natendile bunee: “Yehowa, Mwiya bwangato bunsania, nkukusega buno usigilile bwagi! Buni bwalame Yakobo? Kubuno eli mukeke!”
6 Nu Yehowa agalukizye makengelo mage. Yehowa, Mwiya Bwangato Bunsania atendile bunee: “Bubo tabwabe lingo.”
7 Nu Mukota andolesizie bubuno: emanine bwigi na kitutu na muzigi wa kulindika kima kya kitutu mu kuboko kwage. 8 Nu Yehowa atendile bunee: “Amosi, ukumona ku kikizi?”
Nu nakwide bunee: “Nkumona ku muzigi wa kulindika kima kya kitutu.”
Mukota atendile bunee: “Naswike muzigi wono munkatini mwa bantu bane baIsraeli. Nsikabasigilila lingo. 9 Biziki bya nkangamo za Isaka byabe bukindu, nu biziki byasililila bya Israeli byabe buliabulia, nu nemane gantata ga numba za Yeroboamu na mwene wa nganda.”
Amosi nu Amazia
10 Ububo Amazia, sankoga wa ku Beteli, asingile musagu ku Yeroboamu, mukota wa Israeli kutenda bunee: “Amosi akalile lwango kusaka nobe munkatini mwa numba za baIsraeli. Bantu bakukutwa na moki mage. 11 Kubuno Amosi atenda bunee: ‘Yeroboamu akakua na mwene wa nganda, nu baIsraeli bakigibwa ku bukobe bulazi na kisi kyabo.’”
12 Nu Amazia atendile ku Amosi bunee: “Uwe mulengania, enda; subya ku kisi kya Yuda; walie idia lyobe nu kulengania kuko. 13 Tondo ntulenganie lingo mu Beteli, kubuno guli kiziki kyasililila kya mukota nu numba za kukumbamina za bukota bwage.”
14 Amosi akwide Amazia bunee: “Nsyabezaga mulengania, aba mwana wa mulengania, tondo nabezaga mulangi wa mikoko nu mulimi wa masoa ma biguma. 15 Tondo Yehowa antikizye mu kulanga mikoko nu antendile bunee: ‘Enda ulenganie ku bantu bane ba Israeli.’
16 Uwe ukutenda bunee: ‘Ntulenganie lingo ku baIsraeli nu ntusambalile numba za Isaka.’ Tondo kano kaluma ungwilila iyuki lya Yehowa. 17 Ku kabamba kakano Yehowa akutenda bunee: ‘Mukikulu wobe akaba kitazi mu mwino. Bana bobe, u basikila nu bakinga, bakakua na mwene wa nganda. Bupieni bwobe bukabeganibwa, nu uwe ukakua mu kisi kya nsese. BaIsraeli bakeigibwa ku bukobe bulazi na kisi kyabo.’”