Kuzikibwa kwa baIsraeli
6
1 Kabebe ku babo bakulamaga mu bubobelelo mu Sayuni, nu ku babo beli bulonge bukata ku miduko za Samaria, inyuwe bantu banene mu kilongo kitangi munkatini mwa bilongo; inyuwe bakubasilwa na numba za Israeli kumuli. 2 Endazi ku Kalne nu kulola; kutuka kuko endazi ku Hamati mwino munene; kumbusa gelazi ku Gati wa kisi kya baFilistini. Ndi inyuwe muli basoga kutinga makota mamano? Aba mwaga wabo ndi guli munene kutinga weinyu? 3 Ndi mukutunda kusiga busi bwa kabebe bulazi nu kusekela bwangato bwa bwiti? 4 Inyuwe mukwiyombeka ga migu za milamba, nu kwikala ga bisumbi bilazi, nu kulia byana bya mikoko byanona nu byana bya ngombe byanona. 5 Inyuwe mukutunda kwimba ku moki ma mankimbi nu kukulumizia nzenze anga Davidi. 6 Bakunua maku mu bibangala nu kwibongia mwambo musoga tondo tabeli na kabebe ku kuzika kwa Yosefu. 7 Ku bubo kano kaluma bakenda ku bukobe gamozi na batangi, bakenda ku bukobe nu kazege ka meiya ma beya kwinanuna kasile.
8 Yehowa, Mwiya Bwangato Bunsania, eidumbide wenyene, ee, Kalaga Yehowa, Mwiya Mayombo, atendile bunee: “Nkusomba kwikotia kwa Yakobo, nu nkusomba numba zage nnene zagugumana. Nkagabula mwino nu binsania bili mugo.”
9 Ndi bantu ikumi basigala mu numba emozi, bakakua. 10 Nu ndi umozi wa ku mibuto wa muntu akumuzanzula kumugisia nu kweka makwa kumutikya mu numba, nu kutenda ku wozo uli ku busio bwa numba bunee: “Ndi kuli ungo gamozi nobe?” Nu wozo akakula bunee: “Kilo!” Nu akatenda lingo bunee: “Ikala kibibi! kubuno ntwatunganana kutekula izina lya Yehowa.”
11 Yehowa akakizizie buno numba nnene zasambulwe nunse nu numba nkeke zabe byindi byindi 12 Ndi farasi zinenda lubilo gantata lwanda? Ndi muntu akutimuna galo n'iyembe lya ngombe? Tondo mwagalukizye bulili kuba buganga nu biguma bya bulili kuba lubaba. 13 Inyuwe mukwibogiabogia ku kabamba ka Lo-Debari; a mukutenda bunee: “Ndi tatwakindile Karnaimu b na magala meitu tubenyene?”
14 Ee numba za Israeli, nkazanzukya kilongo kya kwitana n'inyu, u bukutenda Kalaga Yehowa, Mwiya Mayombo; nubo bakeitana n'inyu kutukila ga kwingilila mu Hamati aaba nu ku kibitabita kya luuzi lwa Araba.