Idilo ku baIsraeli
5
1 Ee numba za Israeli, ungwililazi iyuki lilino linkumulilila nalyo. 2 Kikumi kya Israeli kyagwede, nu takikemanuka lingo. Eli gansi mu kisi kyage, takuli wamuzanzule. 3 Bubo u bukutenda Yehowa, Mwiya Bwangato Bunsania bunee: “Mu mwino watuka mu kanunu kamozi kakwenda ku bita mwasigale lukama lumozi, nu wozo watuka mu lukama lumozi mwasigale ikumi, mu numba za Israeli.”
4 Ku kabamba kabo Yehowa akutenda ku baIsraeli bunee: “Ndondazi buno mulame. 5 Tondo tamwende ku Gilgali aba Beteli. Tamutinge ku Beri-Seba; kubuno Gilgali akeigibwa ku bukobe nu Beteli akaba bukindu.”
6 Londazi Yehowa buno mulame, anakivwa kubasa anga keiya nu kuzikya, aba nu mu Beteli tamuli muntu unakazimia, ee inyuwe baYosefu. 7 Ee beinyuwe bakugalukya bulili kuba kabebe nu kwisa kwisanana gansi.
8 Londazi Yehowa, wozo wabumbile nkeninkeni za Kilimia nu za Ba Mubinga na Mboa, wozo ukugalukya kapilo kuba kyengi nu busi kuba kindi. Akumana mazi ma kitatenge nu kumabalangania gantata kisi. Yehowa u izina lyage. 9 Eli wozo ukuzikya biziki byalanga bya magala, nu kusasia kuzikya miino zili na mikolo zagugumana.
10 Tondo bakusomba unsania ukuzuga ga mwingilo, nu bakusomba nunsania wozo ukutenda bulili. 11 Mobakile numba za makozi tondo tamukeikala muzo; mwayikile masoa ma mizabibu tondo tamukanua maku mazo, kubuno mwanyantile bya bazambi nu kumuligia ngano. 12 Kubuno nizi bwingi bwa kusa kweinyu, nu bunene bwa bwagi bweinyu. Inyuwe mukusungia beisanana, nu ku kata bikulo bya lumbisombiso, nu kutaziga bazambi kubasa ga lusu lwa milondo. 13 Ububo mu nkungu zezo, mwiya menge anikala kibibi; kubuno zili nkungu mbi.
14 Londazi mponga tondo ta bubi, buno mulame, nu Kalaga Yehowa, Mwiya Mayombo, abe n'inyu anga bumwatendile. 15 Sombazi bubi nu tundazi busoga; kitazi bulili ga nusu za milondo; embe Kalaga Yehowa, Mwiya Mayombo, anakwila babo basigede ku ba Yosefu kyombo.
16 Ububo Mukota, Kalaga Yehowa, Mwiya Mayombo, akutenda bunee: “Ku biziki binsania kwabe idilo; nu mu nzila insania kwatendwe: ‘Kabebe! Kabebe!’ Balimi bakamanwa ku idilo nu beiya menge kulongeka idilo. 17 Mu masoa mansania ma biguma kwabe idilo, kubuno nkatinga munkatini mweinyu,” Bubo u bukutenda Yehowa.
18 Kabebe ku babo bakutunda busi bwa Yehowa! Kubuni mwalemanina busi bwa Yehowa? Buli kapilo, nu tabuli kyengi. 19 Bwabe anga muntu gaakutina kimbwe nu kukulumana na dubu, aba muntu ukwingila mu numba zage nu kubika kuboko ku kitutu akutubwa na nzoka. 20 Ndi busi bwa Yehowa buli bwa kyengi? Kilo, bukaba busi bwa kapilo, u busi bwa mwizi geteli kyengi aba kakeke!
21 Nasomba nu kubenga bisagulo byeinyu, aba nsyabogeboge ku misanganano za mpala zeinyu. 22 Ndi mwankasa tuyulo twa kugisibwa nu twa bunga bwa ngano nsinatwitabizia, aba nsyalole ku tuyulo twa bubobelelo twa nyama zanona zeinyu. 23 Ntukilazi na kazege ka nimbo zeinyu, kubuno nsyungwilile ku kututwa kwa mankimbi meinyu. 24 Tondo bulili bwagele anga mazi, nu kwisanana anga luuzi lutanakama.
25 Ee numba za Israeli, ndi mwamvwilide na bisansa nu tuyulo mu kalula myaka makumi manazi? 26 Lingo mwekile Sakuti, mukota weinyu nu Kiuni, nkisi zeinyu, u nkeninkeni za tulaga tweinyu tumwikitide mubenyene. 27 Ububo nkamwigia ku bukobe kutinga Damasiki, u bukutenda Yehowa; Kalaga Mwiya Mayombo u izina lyage.