MIKA
Idilo lya Samaria nu Yerusalema
1
1 Iyuki lya Yehowa lyabaside Mika, muMoreseti, mu bindi bya Yotamu nu Ahazi nu Hezekia, bakota ba Yuda. Tulolesio twage twamonine ku kabamba ka Samaria nu Yerusalema. 2 Ungwililazi bilongo binsania; ungwililazi kisi nu bansania beli mukyo! Yehowa, Mwiya Bwangato Bunsania, eli mulongeki weinyu, u Yehowa uli mu numba zage zasililila.
3 Lolazi! Yehowa akutuka ku kiziki kyage; akugela nu kunyanta gantata miduko za kisi. 4 Nu miduko zanyenguke kunsi kwage, nu bibitabita byakake, anga lukeke lwa buuki lwabusio lwa keiya, nu anga bukugela mazi mu mugezi.
5 Kikino kinsania kili ku kabamba ka mibi za Yakobo nu bwagi bwa numba za Israeli. Kikizi mibi za Yakobo? Ndi ta Samaria? Kikizi biziki byasakama bya Yuda? Ndi ta Yerusalema?
6 “Ku kabamba kako, nne Yehowa, nakite Samaria kuba iyala munkatini mwa kisi, nu kiziki kya kuyika masoa. Nakumbie makozi mage ku kibitabita, nu nengie tulingilo twage. 7 Nkisi zage zabunguke byindi byindi, nu nkaso zage ku numba za Kalaga zagisibwe na keiya; nu nkisi zage insania zabe iyala kubuno azikatile ku bukunza bwa butazi, nu ku bukunza bwa butazi zasubye lingo.”
8 Ku kabamba kakano nabe na kabebe nu nkulila. Nende mundulu geteli nsulu nu magulu bwasi. Nalaluke anga mukala, nu kulila anga kazoni ka sulukutu. 9 Kubuno byulu byage tabinavwama konibwa; kubuno byabasa ku Yuda. Byabasa ku lwibi lwa bantu bane aaba nu ku Yerusalema
10 Tamubusambale mu Gati, tamulile aba kakeke; nikumbie mu mukungu mu Beti-Leafura. 11 Bantu ba ku Safiri, tingazi nzila za bukobe, na mundulu nu nsoni! Beiya ku Zanana tabakugeleka kutuka mu mwino, ba ku Beti-Ezeli bakulila kubuno mwino wabo wazika. 12 Bubo bantu ba Maroti bakutwe kumona ku busoga; kubuno lusungio lwa Yehowa lwagelile ku lwibi lwa Yerusalema.
13 Swika kayanga ku farasi zasasia, ee nyene Lakisi, wabezaga kulinga kwa bwagi bwa mukinga wa Sayuni, kubuno mibi za Israeli zamoneka muguli. 14 Ububo wabeganie mukosolo ku Moreseti-Gati; mwino wa Akizibu ube bwengelezi ku bakota ba Israeli. 15 Lingo nakulusizie wozo wakupiene, ee nyene Maresa. Wozo uli lutanuno lwa Israeli avwe aaba nu ku Adulamu.
16 Ibege nzwili ku kabamba ka bana ba lutanuno lwobe; ibege nzwili ube na kisegesege anga ndiu, kubuno bana bobe bende ku bukobe bulazi nobe!