Kabebe ku babo bakusungia bazambi
2
1 Kabebe ku babo bakukengela bwagi nu kulongeka mibi ga migu zabo! Mu nindunindu bakubukita kubuno buli ku bwangato bwabo kukita bubo. 2 Bakutonia beya masoa nu kumanyaga; nu numba nu kuzitola nu bakunyaga muntu gamozi na numba zage aba muntu gamozi na ntiko zage. 3 Ku bubuno Yehowa akutenda bunee: “Nkulongeka lusungio ku kikino kilongo, lumutanavwama kwiyonia mulo. Nu tamwende na lwikotio, kubuno zabe nkungu mbi”.
4 Nu bubo busi bakamwililika mu nimbo za kabebe bunee: “Twazikibwa nunse! Akugalukya bupieni bwa bantu bane; Kalaga akuntikyabo nu akubegania masoa meitu ku beiti beitu.” 5 Ububo takukaba umozi ukabegania myaga mu kwesa mbale, mu musanganano wa Yehowa.
6 Balengania babo bakutenda bunee: “Tamulenganie bitondo bibyo. Nsoni tazinavwama kutukata.”
7 Ee numba za Yakobo, ndi bunatendwa bunee: “Ndi Muuza wa Yehowa eli na bongoa? Ndi akukita bitondo anga bibino?” Ndi moki mane tamakukasia wozo wisanana? 8 Kano kaluma bantu bane babede anga beiti. Mukunyaga nsulu za babo bakutinga mu bubobelelo, anga bantu bakusubya ku bita. 9 Mukutikya bakikulu ba bantu bane mu numba zabo nsoga, nu mukutikya ku milyalya lutanuno lunakasile ku bana babo. 10 Zanzukazi, mwende! Kubuno gano tageli kiziki kyeinyu kya kumunwa, kubuno kili na nsese nu kubigibwa nu takinavwama konibwa.
11 Ndi muntu enda kusambala buza nu bitondo bya bulia anga lumpumpu mu kutenda bunee: “Nasambale kumuli bitondo bya maku meli nse nu maku makali,” nti bantu babano bamungwilile.
12 Ee numba za Yakobo, lebelebe nkakundamania inyuwe bansania; lebelebe nkakundamania basigede ba Israeli. Nabakundamanie gamozi anga lusumba lwa mikoko zili mu mukumba, nu anga lusumba mu kiziki kya kuzilisizia. Kiziki kyabo kyabe na bantu beingi nunse. 13 Mwiya kwendula akabakama lwabusio lwabo; bakendula lwibi nu kubasa ku isula lya mwino. Mukota wabo ende lwabusio lwabo nu Yehowa abasondelezie.