Kuzugilwa kwa bangati ba Israeli
3
1 Natendile bunee: “Ungwililazi, inyuwe bakulu ba Yakobo, inyuwe bangati ba numba za Israeli. Ndi ta beinyuwe u mwatunganana kumenya bwisanana? 2 Inyuwe mukusomba busoga nu mukutunda bubi. Mukututula kikoba kyabo nu misuna za makwa mabo. 3 Babo bakulia mibili za bantu bane, kubabaga bikoba nu kubabungula makwa mabo; babo bakubasesa byindi byindi anga nyama zikuyikwa mu nyungu. 4 Bakalila ku Yehowa, tondo ntakabakula. Ku nkungu zezo akababisa kilungi kyage kubuno bakitile misako mibi.” 5 Ububo Yehowa akutenda bubuno ku kabamba ka balengania bakusondelezia bantu bane ku bwagi. Ndi bakaswa bwa kulia, nti batenda “Bubobelelo!” tondo ndi tabakaswa kena ka kulia, nti bavwa na bita. 6 Ku kabamba kakano bukaba kapilo kumuli, nu tamukaba na bulengania, nu musi ukaba kapilo nu tamukalengania, nu busi bukeidila balengania, ee busi bukabeidila. 7 Balengania nu balaguzi ba ndozi bakakua na nsoni; bansania bakeikatila ku busundo, kubuno takuli iyakulo kutuka ku Kalaga.
8 Tondo nne niyala na magala ma Muuza wa Yehowa, lusungio nu mpumba kumenyesia Yakobo kwaga kwage nu Israeli bwagi bwage. 9 Namusega buno ungwililazi bubuno, inyuwe bangati ba Yakobo nu baIsraeli bakusomba bwisanana nu kugalukya binsania bili bisanana, 10 bobaka Sayuni na mikila nu Yerusalema na bubi. 11 Bakota bage bakusungia buno bamone nkaso za lumbisombiso, nu basankoga bage bakwigisia mulembe wa Kalaga ku bikulo, nu balengania bakubuka ku feza. Tondo bakwegamina ku Yehowa gabakutenda bunee: “Yehowa, ndi nteli munkatini mweitu? Kabebe takatubasile.”
12 Ububo ku kabamba keinyu Sayuni akulimwa anga isoa nu Yerusalema akaba bukindu, nu mwiduko wa numba za kukumbamina ukaba anga lubanda.