Bukota bwa bubobelelo
4
1 Mu bindi bya kuzinda bwabe buno mwiduko wa numba za Yehowa walindibwe kutinga ingo miduko, nu wasakamibwe kutinga nkangamo, nu bilongo byende kugo. 2 Babilongo beingi bende kugo nu batende bunee: “Vwazi, tubakame ku mwiduko wa Yehowa ku numba za Kalaga wa Yakobo buno atwigisie nzila zage nu tutabange muzo,” kubuno milembe zikatuka ku Sayuni, nu iyuki lya Yehowa likatuka ku Yerusalema. 3 Nu Yehowa akasungia bilongo byingi nu akazugila bilongo bya magala bya bulazi, nubo bakatula myene za nganda kuba mayembe nu masumo kuba tukunda; kilongo takikeitana na kingo kilongo na mwene wa nganda, nu tabakeigisibwa kwitana bita lingo. 4 Na muntu na muntu na wikale gansina ga muzabibu wage nu gansina ga muti wage wa biguma; aba takuli ukabeitia boba kubuno Yehowa, Mwiya Mayombo atendile bubo. 5 Bilongo binsania byende ku izina lya tulaga twabyo, tondo iswe twende ku izina lya Yehowa, Kalaga weitu ku milyalya na milyalya.
6 Yehowa akutenda bunee: “Bubo busi nkakungika bitunga nu nkakundamania bansania bendile ku bukobe, nu babo banasungizie. 7 Nu nkasiga bamozi ku bitunga nu babo beigizibwe kuba kilongo kya magala; nu nne Yehowa nkabangata gantata mwiduko wa Sayuni, kutukila busi bubo aaba nu ku milyalya.”
8 Nu uwe, ee numba zasakama za kulanga lusumba, ee mwiduko walanga wa mukinga wa Sayuni, bukota bwa mukinga wa Yerusalema bwavwe kuguli, bwangato bwa wakalazi bwakuvwile. 9 Kubuni ukulila bubibu kano kaluma? Ndi takuli mukota? Aba ndi mukazi wa nango wobe azimina! Wakatwa na lubaba anga mukikulu ukubuta. 10 Ee mukinga wa Sayuni, ungwa lubaba nu kuba na lubaba anga mukikulu ukubuta, kubuno kano kaluma watuke mu mwino nu wikale mu kalula nu kwenda ku Babeli. Gago ukonibwa. Ukakululwa gago na Yehowa mu maboko ma beiti bobe.
11 Nu kano kaluma bilongo byingi byakundamana kuguli; bikutenda bunee: “Abe na nsese, nu meiso meitu malole ku Sayuni.” 12 Tondo tabeizi makengelo ma Yehowa; tabakasongolola lutundo lwage kubuno abakundamanizie anga mumpunge wasusulwa ga mulungu.
13 Yehowa akutenda bunee: “Ee mukinga wa Sayuni, zanzuka nu ususule! Kubuno nakite mega mobe kuba kyuma nu nakite byondo byobe kuba nsubi; nu wabungule bilongo byindi byindi; nu wakasane mutali wabo nu bikulo byabo kundi, nne Yehowa wa kisi kinsania.”