Kubutwa kwa Mukota ku Betelehemu
5
1 Kano kaluma, ee mwino wa mayombo, kundamania mayombo mobe; kubuno atwongamina ku bita; akususula mwangati wa Israeli ku matama na kasusula. 2 Tondo uwe Betelehemu-Efurata guli mukeke munkatini mwa bikanga bya Yuda. Muguli u mukantukila wozo ukangata baIsraeli. Makitilo mage meli kutukila milyalya. 3 Ububo Yehowa akasiga baIsraeli aaba nu nkungu za wozo uli na lubaba lwa kubuta abuta; kumbusa mibuto zage zasigede bakasubya kukundamanibwa na baIsraeli. 4 Akazanzuka nu kulisia iyombo lyage mu magala ma Yehowa nu mu lutanuno lw'izina lya Yehowa, Kalaga wage. Nu bakeikala mu bubobelelo kubuno akaganunwa aaba nu ku kuzinda kwa ndenge insania za kisi. 5 Nu we akaba bubobelelo bwabo.
Gakavwa baAsuria mu kisi kyeitu kutumuna numba zeitu nnene zagugumana, nti tukamuzanzukizia balangi mutubakamo nu mitonge kinana. 6 Bakazikya kisi kya Asuria na mwene wa nganda, nu kisi kya Nimurodi mu miingilo zakyo. Nu Yehowa akatonia na baAsuria gabakavwa kwingila mu kisi kyeitu nu kusuluka myaga zeitu.
7 Nu baYakobo basigede bakaba munkatini mwa bilongo byingi, anga mame makutuka ku Yehowa, nu anga bususuli bwa mbula zasigala zikuloka gantata nsamba, tabukulindila bantu aba lwango lwa bantu buno bukolole. 8 Nu basigede ku baYakobo bakeikala munkatini mwa bilongo byingi, anga bimbwe munkatini mwa nyama za mu lubanda nu anga kyana kya kimbwe munkatini mwa lusumba lya mikoko kyatinga munkatini mwazo, nu kyazata byindi byindi nu takuli wampa unazonia. 9 Maboko meinyu makaba na magala kwitana na beiti beinyu nubo bansania bakazikibwa.
10 Bubo u bukutenda Yehowa bunee: “Mu bubo busi nkatikya farasi zeinyu munkatini mweinyu, nu nkazikya tuyanga tweinyu twa bita. 11 Nu nkazikya miino za kisi kyeinyu, nu nkagusia biziki byeinyu byalanga bya bitutu binsania. 12 Nkatikya mugila munkatini mweinyu, nu tamukabukilwa lingo. 13 Nu nkatikya nkisi zeinyu za miti zimwabazile nu makozi ma kukumbamina munkatini mweinyu, nu tamukazikumbamina lingo. 14 Nu nkazikya nkisi munkatini mweinyu nu kuzikya miino zeinyu. 15 Mu bongoa bukali nu mu kasungu ka nkasuba ku bilongo bitananzile.”