Mulondo wa Yehowa ku bantu bage
6
1 Ungwilila bukutenda Yehowa bunee: “Zanzuka nu kusambala bitondo byobe buno miduko nu nkangamo zungwe ku iyuki lyobe. 2 Ungwililazi, ee miduko, mulondo wa Yehowa; tegazi matuzi, inyuwe tulingilo twa kisi, kubuno Yehowa eli na mulondo na bantu bage, nu akusongela baIsraeli. 3 Ee bantu bane, namukitide kikizi? Namukutizie na kikizi? Nnakulazi! 4 Kubuno namutikizye ku kisi kya Misri; namwonezie ku bukobe. Namusingide Musa nu Haruni nu Miriamu lwabusio lweinyu.
5 Ee bantu bane, kengelazi kano kaluma bitondo byamubuzizie Balaka, mukota wa Moabu nu bitondo byakwide Balama mwana wa Beori. Kengelazi bitondo byamubaside mu nzila gasamba Sitimu nu Gilgali, buno mumenye misako zisanana za Yehowa.”
6 Navwe na kikizi ku Yehowa, ganavwe kukumbamina Kalaga wa mwigulu? Ndi nivwe lwabusio lwage na kisansa kya kugisibwa aba na kyana kya ngombe kya mwaka umozi? 7 Ndi Yehowa atananizibwe na tununu twa bilimba bya mikoko, aba na tununu ikumi (10.000) twa nuuzi za makiti? Ndi nikasane nkula zane ku kabamba ka bwagi bwane, ibuta lya mubili wane ku kabamba ka mibi zane?
8 Ee muntu, walolesizibwe kikizi kikyo kili kisoga, nu kikutunda Yehowa ukite, ndi takukita bwisanana nu kutunda mponga nu kwenda gamozi na Kalaga wobe mu kubota?
9 Iyuki lya Yehowa likulila mu mwino; nu mwiya menge akukua izina lyobe boba: “Itabiziazi kasusu nu wozo wakasinga. 10 Ndi mu numba za bagi muli bikulo bibakatile ku bwengelezi nu kilindiko kikeke kinasomba? 11 Ndi navwama kubingia mwiya kilindiko kya bwagi nu nsago za makozi ma bilindiko ma bwengelezi? 12 Kubuno bagumi ba mwino beiyala na bukali, nu bantu bago bakutenda buza. Ndami zabo zikutenda na bwengelezi.
13 Ku kabamba kakano namubasizie kyulu kinene; namuzikizye ku kabamba ka mibi zeinyu. 14 Mwalie tondo tamwembuke; wageleke kukita tondo takwabe mutali. Ndi mwalanga kimozi nti nakibigie. 15 Wayike tondo ntwoze; mwatute biguma tondo tamwabonge makiti, nu mwakambutule biguma tondo tamwanue maku.
16 Kubuno mwanzile milembe za Omuri, nu makitilo mansania ma numba za Ahabu; nu mukwendaga mu nango zabo. Ububo nkakukita bukindu, nu bantu bobe balilikwe; nu mwalingwe bilingano bikulingwa bantu bane.”