Kugwa kwa Ninawe
2
1 Ee Ninawe, wozo ukuzikya akubakama ku mwino wobe; langa kiziki kyagugumana, kumbilizia ngabo, langa nzila, ikokomezie kuba na magala; 2 kubuno Yehowa akusubya lukumu lwa Yakobo anga lukumu lwa Israeli; kubuno beiya nzikyo babazikizye nu kubigia miti zabo za biguma. 3 Ngabo za mapuka zakisimana nu bakoloboyo bavwala nsulu zakisimana. Tuyanga tukukelima, kubuno tuli byuma mu busi bwabikile buno bwa bita, nu masumo makupenga kwitia boba. 4 Tuyanga tukusasia mu nzila, nu tukutingatinga ga mulungu. Tukususania tumekemeke, nu tukusasia anga mikenzi za nkuba. 5 Akumana beiya magala bage, nu bakwikuka ku kwenda kwabo. Bakusasia ku mukolo wa mwino, nu ngabo zabo zili kayikayika. 6 Nibi za nuuzi zigulwa, nu numba nnene zagugumana zagoa.
7 Bubo bwakitilwe buno mwino ube bwasi nu kwekwa bulazi. Bakikulu bakulila anga kwima kwa nkulimba, nu bakwituta ga makuba. 8 Ninawe eli anga iziba lya mazi likweta. Bakulaluka bunee: “Emanazi, emanazi!” Tondo takuli ukulola kumbusa.
9 Tukulazi feza, nu tukulazi olo, kubuno bikulo byage tabili na kuzinda; kuli malebo ma nkita na nkita, nu bintu bya bukunza bunene. 10 Mwino guli bukindu anga buli muntu mundulu. Mitima za bantu zakutwa, nu mazu makugilimina; mubili unsania guli na lubaba, nu kilungi kyabo kyagaluka.
11 Lubuga lwa kimbwe luli kuni? Nu kiziki kya kulisia byana byazo? Kimbwe nu ibuti lya kimbwe nu kyana kyabyo bikwendaga kuni kuteli kimozi kya kubitia boba? 12 Kimbwe kyatile byakuka ku byana byage, nu kyakamine ku mabuti mage; kyizazizie biziki byage na bibyo bikusigala nu biziki byakyo na bibyo byatile.
13 Yehowa, Mwiya Mayombo, akutenda bunee: “Lola, nne nili mwiti wobe, nu nne nagisie tuyanga twobe, nu mwene wa nganda wite bakoloboyo beli anga bimbwe; nu natikye ntiko zobe insania, nu iyuki lya migenzi zobe talyungubweko lingo!”