Lusungio lwa Ninawe
3
1 Kabebe ku bantu ba wozo mwino wa mikila, wiyala na buza nu bunyagi, nu wiyala na ntiko zikunyagwa. 2 Kuli kazege ka kasusula, nu muzumio wa ngondangonda; nkindo za kutumatuma kwa farasi nu kusasia kwa tuyanga! 3 Babo bakubakama ga farasi nu myene za nganda nu masumo bikukelima; beingi bakua, nu takuli kuzinda kwa bitumba; bakoloboyo bakukikitanwa kubyo. 4 Ku kabamba ka bwingi bwa butazi bwa kitazi kikutananizia, balutile bilongo na butazi bwabo nu kikanga na bugila bwabo. 5 Yehowa, Mwiya Mayombo, akutenda bunee: “Nne nili mwiti wobe; nakwitie na nsoni anga mukikulu uli mundulu, nu nalolesie mundulu wobe ku baBilongo, nu nsoni zobe ku makota ma kisi. 6 Nakubenge nunse nu kukubigia. Bantu bakulole na kanyego. 7 Nu bantu bansania bakulole, bakutine, nu batende bunee: ‘Ninawe wazika! Nazi wakulilile?’ Nakulondele mubibya kuni?”
8 Ndi uli musoga kutinga Tebesi wabikilwe gasamba nuuzi, watimbwa na mazi? Mukolo wago wabezaga kitatenge, nu kitatenge kyabezaga kitutu kyago. 9 Etiopia nu Misri zabezaga magala mage mitila nunse. Puti nu Libya zabezaga bakasia bage. 10 Tondo bantu ba wozo mwino beigizibwe; bendile ku bukobe. Bana bago bakeke basesilwe byindi byindi mu ndenge insania za nzila nnene. Besile mbale ku beiya lwanzo bage. Bakota bago bansania bakandilwe mu makoki.
11 Nu uwe wakatwe na maku; walonde itinino lya kubisama ku kabamba ka beiti bobe. 12 Matinino mobe mansania mabe anga miti nu biguma bya kulinga. Ndi zatengibwatengibwa, nti byakoloka mu kanua ka mulizi. 13 Bakoloboyo bobe beli anga bakikulu munkatini mwobe; nibi zobe zakanduka ku beiti bobe; keiya kagisizie bikando byobe.
14 Bikazi binsania kayikayika ku bita; tagazi mazi ku kiziki; kitazi mikolo mibibu; umbazi bilongo nu topazi kasogo; kongiazi keiya ka kugisia mabiliki. 15 Keiya kakugisie gago; mwene wa nganda wakwite nu kukuzikya. Bakuzikye anga isoa lyalibwa na mande. Itila anga mande nu anga nzige. 16 Watalikide maganzo ma bakunzia bobe kutinga nkeninkeni za kwigulu; kano kaluma tabeliko, batina anga bukulengaga mande. 17 Balangi bobe beli anga nzige, nu bemanizi bobe ba bita beli anga bibombo bya mande beikala mu mukolo mu bindi bya mpego. Tondo mu nkungu za musi mukali makutina, nu biziki byamo tabikumenywa.
18 Ee mukota wa Asuria, balangi bobe ba mikolo beiyombeka. Beiya lwanzo bobe bomunwa; bantu bobe babalanganibwa ku miduko, nu takuli muntu wakubakundamania. 19 Kukutwa kwobe takunakokoka, nu kyulu kyobe kili kinene. Bansania bakungwaga ku misagu zobe batute nkasa, kubuno kwa nazi kutatingile na bwagi bwobe bindi binsania?