Bukatizio bwa Kalaga bwabobelezia mutima
2
1 Nemane ga bulangi bwane, nu kwibika gantata kyindo kya mukolo; kulola buni bwanakule Yehowa, nu namwakule ku manungunungu mane. Iyakulo lya Yehowa
2 Yehowa anakwide bunee: “Sanza kalolesio bwasi bwasi gantata mbavu, a buno wozo ukuzisoma asasie kukasambala. 3 Kubuno kalolesio kakano keli mu nkungu zakakizizibwe, nu kakita lubilo kubasila kuzinda kwako, aba takakweka buza; aba takakwizizia, busoga kukalindila kubuno kakuvwa kankanka.
4 Lola, mutima wa wozo ukwikotia taguli na bulili munda mwago, tondo wisanana akulama mu bukatizio bwage. 5 Ee, kutinga bubuno maku meli na bwengelezi ku muntu wa lwikotio, buno ntakwikala mu numba zage; akutalikila lutundo anga lukuo, nu we ntakwembuka; eli anga nsinda zitakwiyala, tondo akukundamania bilongo binsania kweli. 6 Ndi babo bansania tabeise musumo kweli, nu misumo za kumwililika? Bakutenda bunee: ‘Kabebe kweli ukutalikila biteli byage, aba nkungu nkizi uwe ukwibika kamenyikilo?’ 7 Ndi babo bakukubuzia nsombi tabakubasile kitangalabesi? Nubo, ndi tabakuyukile nu kukugilimizia? Nu bo bakusige mukungulu. 8 Kubuno watukula bilongo byingi, babo basigala bakukate, ku kabamba ka mikila za bantu, kubuno wabigizie bisi nu miino nu bansania babezaga mubyo.
9 Kabebe kuli wozo ukukasana ku numba zage nkaso mbi, buno abike kizumba kyage kwigulu nu eibembukye na kuboko kwa bubi! 10 Ukukitila numba zobe nango za nsoni, ku nzila za kwisa bantu beingi bulazi, nu wiyagide uwenyene. 11 Kubuno ikozi lyalaluke kutuka ku bitutu, nu mbavu za bitutu zasinge kyagogo.
12 Kabebe ku wozo ukobaka mwino ku mikila, nu kuzanzula mwino munene ku bwagi. 13 Ndi Yehowa, Mwiya Mayombo, ntasombwede buno bantu bakite na magala ku keiya, nu bilongo bikutia ku bitondo bya buliabulia? 14 Kubuno kisi kikeiyazibwa na bumenyinino bwa lutanuno lwa Yehowa, anga bwiyazibwa kitatenge na mazi.
15 Kabebe ku wozo ukukasa banyage maku makali, nu kubakika mo buno bakatwe namo, buno amone mindulu zabo. 16 Wiyala nsoni ku kiziki kya lutanuno; nua lingo ube anga umozi utamonesibwa; kituma kya kuboko kwa seidume kwa Yehowa kigalukibwe kuguli, nu nsoni zabe ku lutanuno lwobe. 17 Kabenga kakitilwe ku Lebanoni kakukukile, nu lukuo lwa nyama lwakwitie boba; ku kabamba ka mikila za bantu nu ku kabamba ka kubigia bisi nu miino nu kuzikya bansania bakwikalaga muzo.
18 Nkisi za kubaza zili na mutali mukizi, kubuno muntu u wazibazile. Ndi kuli mutali ku kalolesio kakwigisia bwengelezi? Wozo ukubikita akulemanina kibumbwa kyage; nu akukita nkisi zitanavwama kutenda. 19 Kabebe ku wozo ukubula muti bunee: ‘Lama!’ nu ku wozo ukubula ikozi litakulama bunee: ‘Yuka!’ Ndi kintu kineigisia? Kyakukilwa na olo nu feza, nu mukyo tamuli muuza. 20 Tondo Yehowa eli mu Kiziki Kyage Kyasililila; kisi kinsania kikale kibibi lwabusio lwage.”