Bantu bakwanwa buno basubye ku Kalaga
2
1 Mwikundamanie, ee mukundamane, ee kilongo kiteli na nsoni, 2 lwabusio lwa nkungu zasombwedwe tazivwa nu busi bubo tabumutikya anga mpepa, lwabusio lwa kuvwa kwa bongoa bukali bwa Yehowa ku muli, lwabusio lwa busi bwa bongoa bwa Yehowa tabuvwa ku muli. 3 Londazi Yehowa, inyuwe bansania babota ba kisi, u inyuwe bakitile bwakakizizie; londazi kwisanana; londazi kubota, embe munabiswa mu busi bwa bongoa bukali bwa Yehowa. 4 Kubuno Gaza asigwe, nu Askeloni asigale bukindu; bapumbie Asidodi mu makuluka nu Ekuroni ayulwe. 5 Ee kilongo kya baKereti, kabebe ku muli bakwikalaga ga mutili wa kitatenge; inyuwe baKanana, u kisi kya baFilistina, iyuki lya Yehowa lili ku muli. “Nakuzikye buno tamusigale muntu wampa.” 6 Nu mutili wa kitatenge wabe idambo, nu nusu ku balangi, nu mikumba za mikoko.
7 Nu mutili wa kitatenge wabe ku basigala ku numba za Yuda; balisie mikoko zabo gago; nu beiyombeke mwigolo mu numba za Askeloni, kubuno Yehowa, Kalaga wabo, abalange; abasubizie bakandwa babo.
8 “Nungwa ku bilingano bya baMoabu nu biswililo bya baAmoni, bibakulinga bantu bane, nu kwinyemenezia mu myaga zabo. 9 Ku kabamba kakano, anga bunkulama,” u bukutenda Yehowa Mwiya Mayombo, u Kalaga wa Israeli, bunee: “lebelebe Moabu abe anga Sodoma nu baAmoni anga Gomora, u kiziki kya mikele nu byundundu bya munkange, u kalula ka bindi binsania. Babo basigala ku bantu bane bakabanyaga; nu babo basigala ba ku kilongo kyane bakabeiyana.”
10 Bubo bwababasile ku lwikotio lwabo, kubuno bakulinga nu kunyega bantu ba Yehowa, Mwiya Mayombo. 11 Yehowa akaba wa kwitia boba kubeli gaazikye tulaga tunsania twa kisi; nu bantu ba bilongo binsania bakakumbamina Yehowa, na muntu na muntu mu kisi kyage.
12 “Nu inyuwe baEtiopia, mwakue na mwene wane wa nganda,” u bwatenda Yehowa.
13 Yehowa alambye kuboko kwage ku lulenge lwa kwikazi, akazikya Asuria, nu kukita Ninawe bukindu, nu kukama anga kalula. 14 Nu bibombo bya nyama biyombeke munkatini mwago, u nyama za nkita insania; sulukutu nu biko bikale mu mango mago; moki mabo matende mu miingilo za numba; kuzika kwabasile ku kitiko, kubuno nkati za mierezi zamoneke.
15 Wono guli wozo mwino wa mbogimbogi wikede mu bubobelelo, nu watendile mu mutima wago bunee: “Nne nili, nu ta kuli ungo wigezye na nne.” Tondo we ese bukindu nunse, kiziki kya tulimba twa nyama. Nawatingage mugo akugile nu kututa kipupi.