2
1 Nu atendile lingo bunee: “Kano kaluma ikakizio lilino lili kumuli, ee inyuwe basankoga. 2 Ndi tamwannungwilila, nu ndi tamukwitabizia kuganuna izina lyane mu mitima zeinyu,” u bukutenda Yehowa, Mwiya Mayombo, “namuswilile, nu kugalukya mponga zeinyu kuba kiswililo. Namuswilide kalazi, kubuno tamukubikengela mu mitima zeinyu. 3 Lolazi nazugile ibuta lyeinyu ku kabamba keinyu, nu nasandile nsese ku malanga meinyu, gamozi na nsese za bisansa byeinyu nu mwiswe gamozi nabyo. 4 Nu mwamenye buno namusingide ikakizio lilino, buno idagano lyane na Lawi lyendelele,” u bwatenda Yehowa, Mwiya Mayombo. 5 “Idagano lyane nage lyabezaga lya kalamo nu bubobelelo, namukasile lyo buno akue boba; nu we ankule boba, ammenne na boba ku kabamba k'izina lyane. 6 Meigisia ma bulili mabezaga mu kanua kage, aba bwengelezi tabwatukile mu kanua kage, endile mu nzila gamozi na Nne mu bubobelelo nu kwisanana, nu agalukizye beingi kutuka ku bwagi. 7 Bwatunganana bumenyinino kulangwa mu kanua ka sankoga; lingo bwatunganana bantu kulonda meigisia ku kanua kage, kubuno eli mugenzi wa Yehowa, Mwiya Mayombo. 8 Tondo inyuwe mwasigile nzila za Kalaga nu kwenda mu lulenge, mwakikitanizie bantu beingi ku meigisia, mwabigizie idagano lyane na Lawi,” u bukutenda Yehowa, Mwiya Mayombo. 9 “Ububo namubikile buno mubengwe nu kukua na nsoni lwabusio lwa bantu bansania, anga bubo bumutakuziga kulanga nzila zane nu bumukutananizia bantu kutinga milembe.”
10 Ndi beiswe bansania tatuli bana ba mubuti umozi? Ndi ta Kalaga umozi u watubumbile? Kubuni na muntu kutuli akwengelela mubuto wage, nu kubigia idagano lya batateiswe? 11 Yuda akitile bwengelezi, nu bubi bwakitilwe munkatini mwa Israeli nu mu Yerusalema. Kubuno Yuda abigizie kiziki kyasililila kyatundwa na Yehowa, nu we asongile mukinga wa kalaga kageni. 12 Nu wozo muntu ukukita bitondo bibino, aba eli muntu walengania, Yehowa amwise bulazi na numba za Yakobo, aba ndi akasana kisansa ku Yehowa, Mwiya Mayombo.
13 Nu kingo kimwakitile, mwakukide kasenga ka Yehowa na bisozi, nu mukulila nu kwiyabila kubuno ntakulola lingo ku kayulo keinyu, aba ntakukeitabizia na mbogimbogi mu maboko meinyu. 14 Tondo inyuwe mukubuzia bunee: “Kubuni kwatusiga Yehowa bubo?” Kubuno Yehowa eli mulongeki gamusamba na mukikulu wa busikila bwobe, wozo u wakitide bwengelezi nu abezaga munyobe nu mukikulu w'idagano lyobe. 15 Ndi Yehowa ntabakitile kuba mubili umozi nu kalamo kamozi? Kuba umozi buno balonde ibuta lya Kalaga? Ku bubuno, langazi mitima zeinyu aba muntu ntengelele mukikulu wa busikila bwage. 16 “Kubuno nkusomba kulekanuka,” u bukutenda Yehowa, Kalaga wa Israeli, “nu nkusomba wozo ukwikukila na bwengelezi anga bweikukila na nsulu. Ku kabamba kakano langazi mitima zeinyu; tamukite bwengelezi,” u bukutenda Yehowa, Mwiya Mayombo.
17 Mwakutizie Yehowa na moki meinyu; tondo mukubuzia bunee: “Twamukutizie ku nzila nkizi?”
Kubuno mukutenda bunee: “Na muntu na muntu ukukita bubi eli musoga lwabusio lwa meiso ma Yehowa, nu We akubogaboga nabo,” aba “Kuni kuli Kalaga wa kusungia?”