MATAYO
Kibuti kya Yesu Kristo
1
1 Mukanda wa kibuti kya Yesu Kristo, Mwana wa Davidi, mwana wa Abrahamu. 2 Abrahamu abutile Isaka; nu Isaka abutile Yakobo; nu Yakobo abutile Yuda nu mibuto zage; 3 nu Yuda na mukikulu wage Tamari babutile Perezi nu Zera; nu Perezi abutile Hezironi; nu Hezironi abutile Ramu; 4 nu Ramu abutile Aminadabu; nu Aminadabu abutile Nasoni; nu Nasoni abutile Salmoni; 5 Salmoni na mukikulu wage Rahabu babutile Boazi; nu Boazi na Ruta babutile Obedi; nu Obedi abutile Yese; 6 nu Yese abutile mukota Davidi.
Davidi nu wozo mukikulu wabezaga wa Uria babutile Solomono; 7 Solomono abutile Rehoboamu; nu Rehoboamu abutile Abiya; nu Abiya abutile Asa; 8 nu Asa abutile Yosafati; nu Yosafati abutile Yoramu; nu Yoramu abutile Uzia; 9 nu Uzia abutile Yotamu; nu Yotamu abutile Ahazi; nu Ahazi abutile Hezekia; 10 nu Hezekia abutile Manase; nu Manase abutile Amoni; nu Amoni abutile Yosia, 11 nu Yosia abutile Yekonia nu mibuto zage, mu nkungu zibendile nabo ku bukobe ku Babeli. a
12 Nu kusila kwa kwenda kwabo ku bukobe ku Babeli, Yekonia abutile Saltieli; Saltieli abutile Zerubali; 13 nu Zerubabeli abutile Abihudi; nu Abihudi abutile Eliakimu; nu Eliakimu abutile Azoro; 14 nu Azoro abutile Zadoki; nu Zadoki abutile Akimu; nu Akimu abutile Elihudi; 15 nu Elihudi abutile Eleazari; nu Eleazari abutile Matani nu Matani abutile Yakobo; 16 Yakobo abutile Yosefu iba wa Maria, u wabutile Yesu, ukumanwa buno, Kristo.
17 Bubo bibuti binsania kutukila ku Abrahamu aaba ku Davidi bili ikumi nu binazi; nu kutukila ku Davidi aaba nu gabendile nabo ku bukobe ku kilongo kya Babeli bili bibuti ikumi nu binazi; nu kutukila ku bukobe ku kilongo kya Babeli aaba nu ku Kristo bili bibuti ikumi nu binazi.
Kubutwa kwa Yesu Kristo
(Lk 1:26-35; 2:1-7)
18 Kubutwa kwa Yesu Kristo kwabezaga bubuno: Gabezaga nina Maria andwa na Yosefu, gababezaga tabemenyana, abede n'iyimi ku magala ma Muuza Wasililila. 19 Nu Yosefu, iba wage, abezaga muntu wisanana nu we ntamwitizie na nsoni, atundaga kumugila mu lumbisombiso. 20 Gaabezaga es'akengela buno, mwanzelo wa Mukota wamubaside mu ndozi, wamubwide bunee: “Yosefu, mwana wa Davidi; ntukue boba kutola mukikulu wobe Maria kubuno iyimi lyage lili lya magala ma Muuza Wasililila. 21 Nu we abute Mwana wamulume; wamwinike izina buno, Yesu; kubuno akonia bantu bage ku misako za bwagi bwabo.”
22 Bubuno bunsania bwabezaga buno lizindilile lyatendagwa na Mukota ku mulengania bunee:
23 “Ungwililazi, kikumi kitemenywa na wamulume,
kyeke iyimi, nu we abute Mwana wamulume,
Bamwinike izina buno Emanueli,
Bwisulilwa bwalyo, Kalaga eli n'iswe.” b