Kubutwa kwa Yesu
2
1 Ku bindi bibyo, kwabasile mukanda kutuka ku Kaisari Augusto, wakakizizie buno kisi kinsania kisanzwe meina. 2 Kuko kusanza kutangi kwabede mu nkungu zabezaga Kurenio mukota wa Suria. 3 Nu bantu bansania bendile kusanzwa na muntu na muntu mu mwino wage. 4 Yosefu nu we atukile ku Galilaya, ku mwino wa Nazareti nu endile ku Yudea, ku mwino wa Davidi, wamanagwa Betelehemu, kubuno abezaga muntu wa kikanga kya Davidi, 5 buno asanzwe gamozi na Maria kubuno amwandile kuba mukazi wage, nu we abezaga n'iyimi. 6 Nu gababezaga kuko, kindi kyage kya kubuta kyakukile, 7 nu abutile mwana wage mutangi wamulume; amugondile n'isusi, nu amwiyombekezie mu sanduku zikulilaga mu nyama, kubuno tabamonine kiziki mu numba za bageni.
Banzelo Babaside Balangi
8 Nu mu kisi kikyo mwabezaga balangi beikalaga mu isoa nu mu kindi, bakesagia ntende bakulanga mikoko zabo. 9 Nu mwanzelo wa Mukota ababaside kitangalabesi, nu lutanuno lwa Mukota lwabasanine kunsania nu babede na boba nunse. 10 Tondo mwanzelo ababwide bunee: “Tamube na boba, kubuno navwa kumusambalila musagu wa mbogimbogi nnene zikaba ku bantu bansania; 11 kubuno abutwa lelo mu mwino wa Davidi, Monia, u Kristo Mukota. 12 Nu kakano keli kalolesio kumuli buno mumenye: mwasange mwana agondwa n'isusi nu eiyombekibwa mu sanduku zikulilaga mu nyama.” 13 Nu kitangalabesi iyombo inene lya mwigulu lyabavwilide gamozi na mwanzelo, lyaganwine Kalaga, nu lyatendaga bunee:
14 “Lutanuno ku Kalaga uli mwigulu nunse,
Nu bubobelelo ku kisi nu ku bantu bamutananina.”
Balangi ba Mikoko Benda Kulola Mwana Yesu ku Betelehemu
15 Nu gasubizie banzelo mwigulu, babo balangi batendenne bwabobwabo bunee: “Twendazi aaba nu kubasa ku Betelehemu, nu tulole bubo bwabedeko, anga bwatukengelezizie Mukota.” 16 Nu basasizie kwendako, basangile Maria nu Yosefu nu mwana mu sanduku zaliaga mu nyama. 17 Nu gabamumonineko basambede misagu zibasambalidwe ku kabamba ka wozo mwana. 18 Nu bansania bongule ku bubo, bangamine na bitondo bibasambalilagwa na balangi. 19 Tondo Maria alangile bitondo bibyo binsania, nu abikengelaga mu mutima wage. 20 Nu balangi basubizie, nu batanwine Kalaga nu kumuganunaga ku bibongule kubyo nu bibamonineko anga bubasambalilagwa na mwanzelo.
Yesu Akwinikwa Izina nu Kumonesibwa
(Lk. 1:59)
21 Nu gakukile bindi kinana, bamonesizie Mwana nu bamwinikile izina buno, Yesu, anga bwatendagwa na mwanzelo lwabusio nina nteba n'iyimi.
Yesu Akulolesibwa mu Numba za Kukumbamina
22 Nu gakukile bindi byabo bya kwengibwa anga bukutenda mulembe wa Musa, bamwekile ku Yerusalema buno bamukasane ku Mukota. 23 (Anga bwasanzilwe mu mulembe wa Mukota bunee: “Nkula insania za mwana wamulume, akakasanwa ku Mukota”), 24 nu kukasana kisansa nkulimba ibili aba bilinga bibili anga bwatendilwe mu mulembe wa Mukota.
Simeoni Akukasana Yesu ku Kalaga
25 Nu kwabezaga muntu umozi mu Yerusalema wamanagwa Simeoni; nu wozo muntu abezaga wisanana nu mukatizia nunse, nu alindilaga kubobelezibwa kwa baIsraeli, nu Muuza Wasililila abezaga gantata gage. 26 Nu akengelezizibwe na Muuza Wasililila buno, ntakue ndi ntemona ku Kristo wa Mukota. 27 Nu we asondelezizibwe na Muuza Wasililila nu eingide mu numba za kukumbamina, nu gavule babuti bage na mwana Yesu buno bamukite anga bwabezaga lukita lwa mulembe, 28 Simeoni amulelile mu maboko mage, nu aganwine Kalaga, nu atendile bunee:
29 “Kano kaluma Mukota, kasa mukiti wobe bwangato
ende mu bubobelelo anga buwalagile;
30 Kubuno meiso mane mamona ku lonio lwobe,
31 Lonio luwalongekile lwabusio lwa bantu bansania;
32 Luli kyengi kikasana ku baBilongo, nu lutanuno ku
bantu bobe baIsraeli.”
Bulengania bwa Simioni
33 Isi nu nina bangamine ku bitondo byage bibatendagwa. 34 Simeoni abakasile mponga, nu abwide nina Maria bunee: “Ungwilila, wono mwana abikwa buno asigulizie nu asakike beingi mu baIsraeli; nu kuba kakengelezio ka kulusia myango; 35 buno makengelo ma mitima za beingi malolesibwe. Nu uwenyene, mwene wakusumite ku mutima wobe.”
Ana, Mulengania Mukikulu
36 Nu kwabezaga mulengania umozi mukikulu, Ana, mukinga wa Fanueli, wa kilongo kya Aseri, abezaga mukungu nunse, nu alamine na iba wage myaka mutubakamo kutukila bukinga bwage. 37 Nu abezaga musigala nu abezaga na myaka zakuka makumi kinana nu inazi, ntatukaga mu numba za kukumbamina, tondo akitilaga Kalaga musi nu kindi, ku kukanda kulia nu ku kusega. 38 Nu we abasile ku nkungu zezo; aganwine Kalaga, nu asambede Musagu wa Yesu ku bansania balindilaga bukuluzi bwa Yerusalema.
Kusubya ku Nazareti
39 Nu bo gabasilile kuzindilizia binsania anga bwakakizizibwe mu mulembe wa Mukota, Yosefu nu Maria, basubizie ku Galilaya, ku Nazareti mwino wabo. 40 Nu mwana akulile, atalikidwe magala nu eiyede na menge, nu mponga za Kalaga zabezaga gantata gage.
Yesu ku Miaka Ikumi nu Ibili mu Numba za Kukumbamina
41 Nu babuti ba Yesu bendaga mwaka na mwaka ku Yerusalema mu nkungu za Kisagulo ky'Isuluko. 42 Nu gabede Yesu eseli na myaka ikumi nu ibili, bendile nage ku Yerusalema anga bwabezaga lukita lwa Kisagulo kyabo; 43 nu gasilile bibyo bindi, basubizie kwabo, mwana Yesu asigede ku Yerusalema nu babuti bage tabamenyine. 44 Tondo bakengede buno abezaga na banyage mu lugendo, ububo bakitile busi bumozi mu nzila; nu bamulondile munkatini mwa mibuto zabo nu bilemba byabo. 45 Nu gabatamumonineko, basubizie lingo ku Yerusalema kwenda kumulonda. 46 Nu kusila kwa bindi bisatu, bamusangile mu numba za kukumbamina, eikile gansi munkatini mwa basozi ba milembe, akubongwilila nu kubabuzia mbuzio, 47 nu bansania bamungwililaga bangamine na bumenyinino bwage, nu makulo mage. 48 Nu babuti bage gabamumonineko bangamine nunse, nu nina amutendile bunee: “Mwana wane kubuni kuwatukitila bubuno? Nne nu so twabezagile tukukulonda na kabebe.” 49 Nu abakwide bunee: “Kikizi kimwandondelagile? Ndi tamwizi buno natunganana kwikala mu numba za Tatane?” 50 Tondo tabamenyininne bwabatendaga.