Bantu ba Menge Bavule Kulola Yesu
2
1 Gabutilwe Yesu mu Betelehemu wa Yudea mu bindi bya mukota Herode, Bantu ba menge batukile kuntata kukutukaga kisongo kya busi babasile ku Yerusalema, babuzizie bunee: 2 “Kuni kuli wozo wabutilwe mukota munene wa baYuda? Kubuno twamonine ku lukenikeni lwage kuntata kukutukaga kisongo kya busi, twavwa kumukumbamina.” 3 Gongule mukota Herode ku kitondo kikino, mutima wage wakutukile, nu za bantu bansania babezaga nage mu Yerusalema. 4 Akundamanizie basankoga banene bansania nu basozi ba mulembe, ababuzizie bunee: “Kuni kwabutwe Kristo?” 5 Bamubwide bunee: “Mu Betelehemu wa Yudea. Kubuno bwasanzilwe na mulengania bunee:
6 ‘Uwe Betelehemu, mu kisi kya Yuda,
Ntuli mukeke munkatini mwa bukota bwa Yuda:
Kubuno muguli u mukabutwa mukota munene,
Wozo ukaba mulangi wa bantu bane baIsraeli.’” a
7 Nu mukota Herode amanine Bantu ba menge ku lumbisombiso, ababuzizie bunee: “Nkungu nkizi nunse zimwamonine ku lukenikeni?” 8 Abasingile ku Betelehemu, abatendile bunee: “Endazi mutitibukizie musagu wa Mwana; nu gamwamumoneko, nti mwavwa kunsambalila, nu nne lingo nti nende kumukumbamina.”
9 Gabongule ku iyuki lya mukota, bendile; nu lulo lukenikeni, lubamonaga kulo kuntata kukutukaga kisongo kya busi lwendile lwabusio lwabo, aaba nu galwabasile ga kiziki kyabezaga Mwana. 10 Gabamonine ku lukenikeni, babogilebogile nunse. 11 Nu beingide mu numba nu bamonine ku Mwana nu nina Maria; bakomine mazu gansi, nu bamukumbaminne; bakanwine bikagi byabo, bamukasile nkaso; olo nu aliga nu bulago. 12 Nu gabatondile Kalaga mu ndozi bunee: “Tamusubye ku Herode,” basubizie ku kisi kyabo mu ingo nzila.
Batinine na Yesu ku Misri
13 Nu bo gabendile, Mwanzelo wa Mukota abaside Yosefu mu ndozi, amubwide bunee: “Yuka nu utole Mwana nu nina, nu utine ku Misri, nu wikale kuko aaba gankakubulilaga: kubuno Herode akulonda kwita Mwana.”
14 Nu ayukile nu atolile mwana nu nina mu kindi, nu endile ku Misri; 15 nu eikede kuko aaba nu gakule Herode. Bubo lizindilile lyatendagwa na Mukota ku mulengania, atendile bunee: “Namanine Mwana wane kutuka ku Misri.” b
Mukota Herode Eitile Bana Buliabulia
16 Gamenyine Herode buno bantu ba menge bamubengile, ongilwe nunse, asingile bantu, nu beitile bana bamulume bansania babezaga mu Betelehemu, nu mu ndenge insania za mwino, ba myaka ibili nu bango beki bana bato, kulembana na bwamusambalide bantu ba menge. 17 Buno lizindilile lyatendagwa na mulengania Yeremia bunee:
18 “Iyuki lyungulwe mu mwino wa Rama, idilo inene
nunse, Rakeli akulilila bana bage;
Nu we ntatundile kubibibwa, kubuno bana bage
tabeligo.” c
Batukile ku Misri, Bakumukile ku Nazareti
19 Gakule Herode, mwanzelo wa Mukota abaside Yosefu mu ndozi ku Misri, amutendile bunee: 20 “Yuka nu utole Mwana nu nina, nu wende ku kisi kya Israeli: kubuno babo batundaga kwita Mwana bese bakua.”
21 Nu ayukile nu atolile Mwana nu nina, nu babasile mu kisi kya Israeli. 22 Tondo gongule buno Arkelao angata ku Yudea mu kiziki ky'isi Herode, akule boba kwenda kuko; nu gamwanine Kalaga mu ndozi, endile mu ndenge za Galilaya, 23 nu abasile nu eikede mu mwino wamanagwa buno Nazareti; bubo lizindilile lyatendagwa na balengania bunee: “Akamanwa muNazareti.” d