MARKO
Kusambala kwa Yoana Mututiki
1
1 Kulinga kwa Musagu Musoga wa Yesu Kristo, Mwana wa Kalaga. 2 Anga bwasanzilwe ku mulengania Isaya, bunee: “Lolazi, nasinga lwabusio lwobe mugenzi wane,
ukakunga nzila zobe,
3 Iyuki lya muntu likulaluka mu kalula bunee:
‘Kungazi nzila za Mukota,
Isiazi matingilo mage!’” a
4 Yoana avule, atutikile mu kalula, nu asambede lututiko lwa kwiyania, ku isigililo lya bwagi. 5 Bantu bansania ba mu kisi kya Yudea nu bantu bansania ba ku Yerusalema bamwendede; nu, beigongile ku bwagi bwabo, abatutikile mu luuzi lwa Yordani.
6 Yoana abezaga avwala nsulu za myoza za ngamia; nu mukoma wa kikoba mu kibunda; aliaga nzige nu buuki bwa mu lubanda. 7 Eigisizie; atendile bunee: “Ukuvwa kumbusa kwane antinga bwangato; nu nsyatananina kukumbama nu kukandula mizigi za bisalapata byage. 8 Nne, namututika na mazi, tondo We, amututike na Muuza Wasililila.”
Kututikwa kwa Yesu nu Kulindikwa Kwaga
9 Nu busi bubo, Yesu atukile ku Nazareti, wa Galilaya, nu atutikilwe na Yoana mu Yordani. 10 Ku nkungu zatukile Yesu ku luuzi, amonine igulu lyatika nu Muuza Wasililila wagelile gantata gage anga nkulimba. 11 Nu iyuki lyungwilwe kutuka kwigulu: lyatendile bunee: “Uwe uli Mwana wane mutundwa; natananizibwa nobe.”
12 Kazanga kongo, Muuza amusindikile mu kalula. 13 Kuko atingizie bindi makumi manazi nu alindikilwe na Satana. Abezaga gamozi na nyama nu banzelo bamukitilaga.
Yesu Amanine Bazubi Banazi
14 Kusila kwa kukandwa kwa Yoana; Yesu endile ku Galilaya, kusambala Musagu Musoga wa Kalaga. 15 Atendile bunee: “Nkungu zakuka nu Bukota bwa Kalaga buse bwigi! Iyaniazi nu katiziazi Musagu Musoga!”
16 Gatingaga Yesu mu ntungo mwa kitatenge kya Galilaya, amonine ku Simoni nu Andrea; mubuto wa Simoni; beisaga kakila mu kitatenge, kubuno babezaga bazubi. 17 Yesu ababwide bunee: “Vwazi munyange, nu namubike buno mube bazubi ba bantu.” 18 Kazanga kongo basigile tukila twabo nu bamuyangile.
19 Geendile bulazi kakeke amonine ku Yakobo mwana wa Zebedayo, nu Yoana mubuto wage, nu bo babezaga mu bwato nu balandaga tukila twabo. 20 Nu kazanga kongo abamanine; nu basigile isibo, Zebedayo, mu bwato gamozi na bakiti nu bamuyangile.
Muntu Wabezaga na Musumbu
21 Yesu nu beigisibwa bage bendile ku Kapernaumu. Nu Busi bwa Sabato, Yesu eingide tanga mu numba za misanganano nu eigisizie, 22 bangamine na meigisia mage; kubuno eigisagia anga uli na bwangato nu ta anga basozi ba mulembe.
23 Kazanga kongo, kwabezaga muntu wabezaga na musumbu wa nsese mu musanganano wabo, nu alalukile n'iyuki inene; 24 atendile bunee: “Tuli nobe buni, Yesu wa Nazareti? Ndi wavule buno utuzikye? Nizi buno uli Wasililila wa Kalaga.” 25 Yesu amuzugide, atendile bunee: “Ikala kibibi nu tuka mu muntu wono!” 26 Nu wozo musumbu wa nsese amutengezietengezie na magala nu alilile n'iyuki ibibu. Nu atukile mu wozo muntu. 27 Bansania bangamine nunse, babuzanizie bwabobwabo bunee: “Kitondo kikizi kikino? Mese mango meigisia! Kubuno akukakizia basumbu ba nsese na bwangato nu bo bakumwanza!” 28 Nu kazanga kongo lukumu lwage lwakukile mu kisi kinsania kya Galilaya.
Yesu Onezie Bantu Beingi
29 Kazanga kongo gabatukile mu numba za misanganano, bendile na Yakobo nu Yoana ku numba za Simoni nu Andrea. 30 Ninabyala wa Simoni abezaga eiyombeka ga mugu n'isusila; nu kazanga kongo basambede musagu wage ku Yesu. 31 Endile kweli, amukatile g'ikoko nu amuzanzukizie. Nu kazanga kongo isusila lyasilile. Kusila abakitide.
32 Mwigolo geidile busi, bamuvwilide na bantu bansania babezaga na nsambo nu babezaga na basumbu. 33 Nu bantu bansania bakundamenne lwabusio lwa mwingilo wage. 34 Nu onezie bantu beingi babezaga na nsambo za nkita ningi; nu eimbizie basumbu beingi. Nu ntazigile basumbu batende, kubuno babezaga bamwizi.
Yesu Asambalaga mu Galilaya
35 Mu nindunindu, ku mukelo nunse, ayukile, nu endile ku kalula nu asegile kuko, 36 Simoni nu babo babezaga nage bamulondile; 37 nu gabamumonineko, bamubwide bunee: “Bantu bansania bakukulonda.” 38 Ababwide bunee: “Twendazi, ku ingo miino zili bwigi buno nisambale kuko, kubuno bubo u bunavwilide.” 39 Nu endile, asambede mu numba ningi za misanganano ku kisi kinsania kya Galilaya; nu eimbizie basumbu.
Yesu Onezie Mwiya Bibali
40 Muntu umozi mwiya bibali amuvwilide, nu amukomenne mazu amusegile bunee: “Ndi watunda, unavwama kunengia.” 41 Yesu amukwilide kyombo; alambizie kuboko kwage, eitubizie kweli: nu amubwide bunee: “Natunda, enga:” 42 Nu kazanga kongo, bibali byatukile kweli, nu engile. 43 Yesu amukakizizie bubibu nu kazanga kongo amusingile kumbuga. 44 Nu amutendile bunee: “Idange, ntutende ku ungo muntu; tondo enda tugu widolesie ku sankoga, nu ukasane ku kabamba ka kwengibwe kwobe anga bwakakizizie Musa, buno bubo bube bulongeki kubeli.” 45 Tondo muntu wozo eiyendede, alingile kusambala bwasibwasi kitondo kikyo nu kukukya lilyo idagi kunsania. Ku bubo, Yesu ntavwamine kwingila lingo mu miino zezo, tondo abezaga kumbuga, ku kiziki kya kalula. Nu bantu bamuvwilide batukaga ku biziki binsania.