Yesu Akonia Mwiya Bibali
8
1 Nu gaagelile mwiduko, misanganano munene wamuyangile. 2 Nu mwiya bibali amuvwilide, nu amukumbaminne, amubwide bunee: “Mukota, ndi watunda, unavwama kunengia.” 3 Yesu alambizie kuboko kwage, eitubizie kweli, amubwide bunee: “Nkutunda, wenge!” Nu kazanga kongo bibali byage byonine. 4 Yesu amubwide bunee: “Ntusambalile muntu kitondo kikino; tondo enda widolesie ku sankoga, ukasane lukaso anga bwakakizizie Musa, lube bulongeki ku beli.” Yesu Onezie Mukiti wa Mukota wa Bakoloboyo Lukama
5 Geingide Yesu mu mwino wa Kapernaumu, mukota wa bakoloboyo avule kweli, nu amutendile bunee: 6 “Mukota, mukambi wane eiyombeka mu numba na lusambo lwa kuumia biganza, akubabalwa nunse.” 7 Yesu amubwide bunee: “Nkuvwa kumwonia.” 8 Mukota wa bakoloboyo amwakwide bunee: “Mukota, tabunatananina uwe kwingila mu numba zane; tondo tenda n'iyuki tugu nu mukambi wane nti onibwa. 9 Kubuno aba nu nne nangatwa, nu nangata bakoloboyo nu ndi nabula umozi bunee: ‘Enda’ nti enda; nu ungo bunee: ‘Vwa,’ nti avwa; nu ku mukambi wane bunee: ‘Kita bubo,’ nti abukita.” 10 Gongule Yesu ku bubo, angamine, nu abwide babo bamuyangaga bunee: “Lebelebe nkumubula buno nsimonaga lingo mu bikanga bya Israeli ku ungo uli na magala mu bukatizio anga wono. 11 Nkumubula buno, beingi bakatuka ku kubasaga kisongo kya busi nu ku kwendaga kisongo kya busi, nu bakeikala na Abrahamu, nu Isaka, nu Yakobo, mu Bukota bwa mwigulu: 12 tondo bana ba bukota bakeiswa mu kapilo ka kumbuga; kukaba kulila nu kubuga meinyo.” 13 Yesu abwide mukota wa bakoloboyo bunee: “Enda, anga buwakatizagia bube.” Mukambi wage onezibwe nkungu zezo.
Yesu Onezie Ninabyala wa Petro Isusila
14 Geingide Yesu mu numba za Petro amonine ku ninabyala wa Petro eli n'isusila. 15 Yesu eitubizie g'ikoko lyage nu isusila lyasilile; nu we emanukile nu amukitide.
16 Gabwabede buse mwigolo, bamulusizizie beli na basumbu beingi; nu atikizye babo basumbu n'iyuki lyage, nu onezie bansania babezaga basambi: 17 buno lizindilile lyatendagwa na mulengania Isaya bunee: “We wenyene atolile busosu bweitu, nu ekile nsambo zeitu.” a
Yesu Alindikile Beigisibwa Bage
18 Gamonine Yesu ku musanganano munene wamutimbikania, akakizizie bunee: “Tusokazi lisilya.” 19 Musanzi umozi wa mulembe amuvwilide, amubwide bunee: “Musozi nakuyange kunsania kuwendage.” 20 Yesu amubwide bunee: “Mikala zili na matengu mazo, nu tuzoni twa mu mpelela tuli na bizumba byato, tondo Mwana wa Muntu nteli na kiziki kya kukukika itoe lyage.” 21 Ungo mwigisibwa abwide Yesu bunee: “Mukota, nkase bwangato nende kuyika kitumba kya Tatane.” 22 Tondo Yesu amubwide bunee: “Nyange; siga bakuzi bayikane bwabobwabo.”
Yesu Akubotya Bimpumi bya Mazi
23 Yesu geingide mu bwato, beigisibwa bage bamuyangile. 24 Nu kisoa kinene kyabede mu kitatenge, bimpumi binene bya mazi bidibwide ku bwato: tondo Yesu abezaga eiyombeka ku tulo. 25 Beigisibwa bage bamuvwilide, nu bamuyukizie, bamubwide bunee: “Mukota, tonie; twakua!” 26 Ababwide bunee: “Beinyuwe beiya bukatizio bwatamba, kikizi kimukukua boba?” Nu ayukile, nu azugide kisoa nu mazi ma kitatenge molile nunse. 27 Bantu bangamine nu batendile bunee: “Wono eli muntu mukizi? Aba kisoa nu kitatenge nti bikumwanza?”
Yesu Akutikya Basumbu ku Muntu wa Gadara
28 Gabasile Yesu lisilya, ku kilongo kya baGerase, bantu babili babezaga na basumbu bakulumanine nage batukaga ku kiziki kya nsinda, nu babezaga bakali nunse, nu takuli muntu watingaga mu zezo nzila. 29 Nu balalukile n'iyuki inene batendile bunee: “Buni butuli nobe Uwe, Yesu Mwana wa Kalaga? Ndi wavule gano buno ulinge kutusungia nu nkungu zeitu za lusungio tazika?” 30 Nu lusumba lunene lwa ngulube lwabezaga kulazi lwaliaga. 31 Nu basumbu bamusegile bunee: “Ndi watutikya nti watusiga kwenda kwingila mu lusumba lwa ngulube.” 32 Nu ababwide bunee: “Endazi.” Nu batukile, nu beingide mu ngulube: nu lusumba lunsania lwa ngulube lwakumbile mu mpembwe, nu lwiyisile mu kitatenge, nu lwakule mu mazi.