Yesu Akonia mukiti Umozi wa Mukota wa Bakoloboyo
7
1 Nu gasilile Yesu kutenda bibino bitondo binsania lwabusio lwa bantu bakumungwilila, endile ku Kapernaumu. 2 Nu Mukota wa bakoloboyo abezaga na mukiti wage umozi musambi, wabezaga bwigi na kukua, nu abezaga amutunda nunse. 3 Nu gongule wozo Mukota wa bakoloboyo ku musagu wa Yesu, asingile bakulu ba baYuda kweli, kumumana buno avwe konia wozo mukiti wage. 4 Gababasile ku Yesu, bamusegile nunse bunee: “Wono muntu atunganana buno umukitile kitondo kikino, 5 kubuno atunda kilongo kyeitu, nu we u watubakide numba zeitu za musanganano.” 6 Yesu endile gamozi nabo, nu gaabezaga eseli bwigi na numba zage, wozo mukota wa bakoloboyo asingile bilemba byage kweli nu bamutendile bunee: “Mukota, ntwikutie, kubuno nsyatananina buno wingile mu numba zane. 7 Ku bubuno nimonine buno nsyatananina kwenda nnenyene kuguli, tondo tenda iyuki limozi tugu, nu mukiti wane onibwe. 8 Kubuno, aba nu nne nili kunsi kwa bwangato bwa bakota bane, nili na bakoloboyo banangata; nu ndi natenda ku umozi bunee: ‘Enda!’ nu nti enda; ku ungo bunee: ‘Vwa!’ nu nti avwa; nu ku mukiti wane bunee: ‘Kita bubo!’ nu nti abukita.” 9 Nu gongule Yesu ku bubo, aganineganine nunse. Nu akebetukile kuli bantu bamuyangaga nu abwide bunee: “Nkumutenda buno, aba ku Israeli, nsimonaga ku muntu uli na bukatizio bunene anga wono.” 10 Nu babo basingagwa basubizie ku numba nu basangile wozo mukiti asila kona. Yesu Akuyukya Mwana wa Musigala Kutuka ku Bakuzi
11 Gakede busi, Yesu endile ku mwino umozi wamanagwa Naina. Beigisibwa bage nu kibombo kinene kya bantu bendile gamozi nage. 12 Nu gaabede ese bwigi na mwingilo wa mu mwino, lola, bakulumenne na bantu babezaga beka kitumba kya musikila umozi wabezaga ngomo za nina, nu we abezaga musigala: nu bantu beingi ba mu wozo mwino babezaga gamozi nage. 13 Gamonine Mukota ku wozo musigala, amukwilide kyombo, nu amutendile bunee: “Ntulile!” 14 Asigelede bwigi, nu eitubizie ku sanduku. Nu babo babezaga beeka sanduku bemenne. Yesu atendile bunee: “Musikila, nkukubula buno, emanuka!” 15 Nu wozo wabezaga kitumba, eikede, nu alingile kutenda. Yesu amusubizie ku nina. 16 Bansania bakule boba, nu baganwine Kalaga, batendile bunee: “Mulengania munene abasa kutuli, nu Kalaga avule kukasia bantu bage.” 17 Nu wono musagu wa Yesu wakukile kunsania mu Yudea nu mu kisi kinsania kya ku ntungo.
Beigisibwa Basingwa na Yoana Mututiki
18 Beigisibwa ba Yoana bamusambalide bubuno bunsania. 19 Yoana amanine babili ku beigisibwa bage, nu abasingile ku Mukota Yesu kumubuzia bunee: “Ndi uwe u wozo watunganana kuvwa aba ndi twatunganana kulindila ungo?” 20 Bantu babano, gababasile ku Yesu, batendile bunee: “Yoana Mututiki atusinga kuguli tukubuzie bunee: ‘Ndi uwe u wozo watunganana kuvwa, aba ndi twatunganana kulindila ungo?’” 21 Mu nkungu zezo, Yesu onagia bantu beingi basambi nu beteli na magala ku nsambo zabo, nu atikagia basumbu, nu beingi babezaga byuku, azibwide meiso mabo. 22 Nu Yesu abakwide bunee: “Endazi musambalile Yoana bumwamona kubo nu bumungwa kubo: ‘Byuku bise byamona, bitunga bise byatabanga, beiya bibali, bese bengibwa, bimbula matuzi bese bongwa, bakuzi bayukibwa kutuka ku bakuzi, nu bazambi beigisibwa Musagu Musoga.’ 23 Mbogimbogi ku muntu wozo utakwina mutima ku kabamba kane.”
24 Gabezaga babo basingwa ba Yoana basila kwenda, Yesu alingile kusambalila bantu musagu wa Yoana bunee: “Kikizi kimwendaga kulola ku kalula? Ndi lusolu lukutengibwa na lumpumpu? 25 Tondo mwendile kulola kikizi? Ndi muntu wabezaga wavwala nsulu za bukunza bubibu? Lolazi bantu bavwala nsulu nsoga nunse nu bakulama kalamo kasoga, u babo beikile mu numba za bakota. 26 Tondo, kikizi kimwendile kulola? Ndi mulengania? Ee, nkumubula buno wozo atinga mulengania. 27 Kubuno Yoana u wasanzidwe bibino bitondo bunee:
‘Nalinga kusinga mugenzi wane lwabusio lwobe!
buno akunge nzila zobe!’ a
28 Nkumubula buno munkatini mwa babo babutilwe na bakikulu, takuli munene kutinga Yoana; tondo wozo uli mukeke mu bukota bwa Kalaga eli munene kumutinga.”
29 Nu bantu bansania gabasilile kumungwilila, aba basanzi ba kuligia kodi, beitabizizie bunee: “Kalaga eli Wisanana,” batutikilwe ku lututiko lwa Yoana. 30 Tondo baFarisayo, nu basozi ba milembe basombile lwango lwa Kalaga nu tabazigile kututikwa na Yoana.
31 Yesu abuzizie bunee: “Nkalingimania bantu ba kino kibuti na kikizi? Nu bantu babano basusanania na banazi? 32 Basusanania na bana beikede gansi mu isoko bakumana, nu bakutendana bwabobwabo bunee: ‘Twamwidide mpengu, nu tamwaminine! Nu twamwimbide nsanza, nu inyuwe tamwalilile.’ 33 Kubuno Yoana Mututiki avule, nu we ntaliaga kampampa nu ntanuaga maku, nu mukubula bunee: ‘Eli na musumbu!’ 34 Mwana wa Muntu avule, akulia nu akunua, nu inyuwe mukutenda bunee: ‘Eli kiliagundu nu munuzi wa maku, kilemba kya basanzi bakuligia kodi, nu beiya bwagi.’ 35 Tondo menge makumoneka kuba meisanana ku bana bage bansania.”
Yesu mu Numba za Simoni, muFarisayo
36 MuFarisayo umozi amanine Yesu kuvwa kulia gamozi nage. Nu Yesu eingide mu numba za wozo muFarisayo nu eikede ku meza. 37 Nu lola, mukikulu umozi mwagi wabezaga mu wozo mwino, gaamenyine buno Yesu akulia mu numba za muFarisayo, avule na kabongelo ka alabasta kabezaga keiyala na bulago. 38 Nu emanine kumbusa ku magulu mage akulila; nu alingile kununia magulu ma Yesu na bisozi byage, kumbusa amanyonyenne na nzwili zage, kumamuma nu kumabongia bulago. 39 Gamonine wozo muFarisayo wamanaga Yesu ku bubo, eibuzizie mu mutima wage bunee: “Songo muntu wono abezaga mulengania, songo anamenyine buno, wono mukikulu witubya kweli eli nazi nu eli na lukita lukizi, kubuno we eli mwagi.” 40 Yesu amubwide bunee: “Simoni, nili na kitondo kya kukutenda.” Nu we amwakwide bunee: “Musozi, tenda.” 41 Yesu atendile bunee: “Muntu umozi mukasani wa nsombi abezaga na bantu babili baakasile nsombi. Umozi abezaga na nsombi za feza nkama itano, b nu ungo makumi matano. 42 Kubuno tababezaga na bikulo bya kuliga nsombi zabo, wono mwiya nsombi abasigilide bobabili. Kano kaluma nazi gabasamba wamutunda bubibu?” 43 Simoni akwide bunee: “Nkukengela buno wozo wasigililwa nsombi nnene nunse.” Yesu amubwide bunee: “Watenda buligo.” 44 Kumbusa, agalukile ku mukikulu nu kubula Simoni bunee: “Ukumona ku wono mukikulu? Ningide mu numba zobe, nu uwe ntwankasile mazi ma koga ku magulu mane; tondo we amanunizie na bisozi byage, nu kumanyonyona na nzwili zage. 45 Ntwammumine, tondo wono mukikulu, na ganingilide mu numba ntasigile kummuma ku magulu. 46 Ntwambongezie mwambo ku itoe lyane, tondo we ambongezie bulago ku magulu mane. 47 Ku kabamba kako nkukubula bunee: ‘Bwagi bwage aba buli bwingi, bwasigililwa, kubuno atundile nunse. Tondo wozo wasigililwa ku bikeke, akutunda bikeke.’” 48 Nu abwide wozo mukikulu bunee: “Bwagi bwobe bwasigililwa.” 49 Nu babo babezaga ku meza gamozi nage batendile bobenyene mu mitima zabo bunee: “Nazi wono ukuvwama kusigilila aba nu bwagi?” 50 Tondo Yesu atendile wozo mukikulu bunee: “Bukatizio bwobe bwakwonia, enda mu bubobelelo.”