11
1 Gasilile Yesu kukakizia beigisibwa bage ikumi nu babili, atukileko nu endile kwigisia nu kusambala mu miino zabo. Yoana Mututiki Asingile Beigisibwa Bage Kubuzia Yesu
2 Nu Yoana, gaabezaga mu kikando, ongule ku misagu za bwakitaga Kristo nu asingile beigisibwa bage babili. 3 Bamubuzizie bunee: “Ndi uwe u wozo wavwe, aba ndi tulange ungo?” 4 Yesu abakwide bunee: “Endazi musambalile Yoana bumungule kubo nu bumwamonineko: 5 byuku bise byamona, nu bitunga bise byatabanga, nu beiya bibali bengibwa, nu batakungwaga bese bongwa, nu bakuzi bese bayukibwa, nu bazambi bese basambalilwa musagu musoga. 6 Nu mbogimbogi ku wozo utakwina mutima na nne!”
7 Nu gabendile, Yesu alingile kubula musanganano bitondo bya Yoana, ababuzizie bunee: “Mwendaga kulonda kikizi mu kalula? Kulola lusolu lukutengatenga na lumpumpu? 8 Kikizi kimwendaga kulola? Ndi muntu wavwala nsulu zabota? Ungwililazi, babo bavwala nsulu zabota beli mu numba za bakota. 9 Tondo mwendile kulola kikizi? Ndi mulengania? Ee, nkumubula buno, wozo watinga mulengania. 10 Wozo u wasanzilwe bunee:
‘Ungwililazi, nasinga mugenzi wane, lwabusio lwobe kulongeka nzila zobe.’ a
11 Lebelebe nkumubula bunee: Takumonekaga muntu munene wabutwa na mukikulu, watinga Yoana Mututiki, tondo wozo uli mukeke mu bukota bwa meigulu amutinga. 12 Kutukila ku bindi bya Yoana Mututiki aaba nu kano kaluma bukota bwa meigulu bukulwaninwa bita, nubo balwani ba bita u bakubutola. 13 Kubuno balengania bansania nu mulembe balenganizie aaba nu ku Yoana, 14 nu ndi mukutunda kubumenyinina, wono u Elia, wavwe. 15 Wozo uli na matuzi makungwilila, nti ongwilila.
16 Tondo nilingimanie kino kibuti na kikizi? Kili anga bana beikile ku isoko, bakumana banyabo, 17 nu bakutenda bunee: ‘Twamwidide mpengu, nu tamwaminine; twamulilide na kasina, nu tamwigombile ga makuba.’ 18 Kubuno Yoana avule nu ntalide nu ntanune, nu batendile bunee: ‘Eli na musumbu!’ 19 Mwana wa muntu avule, akulia nu akunua, nu bakutenda bunee: ‘Muntu kiliagundu nu munuzi wa maku, nu kilemba kya baligia ba kodi nu bagi!’ Nu menge makubingibwa ku misako zamo.”
20 Yesu alingile kuzugila zezo miino zAakitile mu migeleko mingi nu tabagalukizye makengelo mabo. 21 “Kabebe kuguli Korazini! Kabebe kuguli Betesaida! Songo migeleko mingi zakitilwe kumuli, anga buzakitilwe mu Tiro nu Sidoni songo beiyanizie kalazi baneikede mu nsulu z'ikunino nu mu lwito. 22 Tondo nkumubula buno, mu bindi bya lusungio inyuwe mukasungibwa bubibu kutinga Tiro nu Sidoni. 23 Nu uwe Kapernaumu, aba ndi ukabakamibwa aba kwigulu, ukaba mukeke ku kiziki kya bakuzi: songo migeleko zakitilwe kumuli, u zakitilwe mu Sodoma songo wono mwino ukili lelo. 24 Tondo nkumubula buno, lusungio lwa Sodoma lukaba lukeke ku busi bwa lusungio kutinga lusungio lweinyu.”
25 Mu nkungu zezo Yesu abwide bunee: “Nakusima Tatane, Mukota wa meigulu nu kisi, kubuno wabisile malagi mamano ku beli na menge nu bumenyinino, nu wamamenyesia ku bana. 26 Bubo, Tatane, kubuno bubo bwabezaga bwakutananina. 27 Tatane ankasile binsania; takuli wizi Mwana, tugu Isi; takuli wizi Isi tugu Mwana, nu unsania ukutunda Mwana kumulolesia.