Yesu Akukakizia Beigisibwa Bage, nu Kubasinga
10
1 Yesu amanine beigisibwa bage ikumi nu babili, abakasile bwangato kutikya basumbu, nu konia nsambo insania za nkita na nkita, nu bagongole ba nkita na nkita. 2 Meina ma basingwa ikumi nu babili u mamano: Wakulinga, Simoni, bamwinikile buno, Petro, nu muto wage Andrea; nu Yakobo mwana wa Zebedayo, nu Yoana muto wage; 3 Filipo, nu Bartolomayo; Toma, nu Matayo wabezaga muligia wa kodi; nu Yakobo mwana wa Alfayo, nu Tadeo; 4 nu Simoni muKanana; nu Yuda Iskariota, wozo wamugabwide. 5 Yesu asingile babano ikumi nu babili nu abakakizizie bunee: “Tamwende ku baBilongo, tamwingile mu mwino wa kilongo kya baSamaria, 6 tondo endazi tanga ku mikoko zaziminne, u bantu ba Israeli. 7 Nu gamukwenda, sambalazi bunee: ‘Bukota bwa meigulu buse bwigi.’ 8 Oniazi basambi, yukyazi bakuzi, engiazi beli na bibali, tikyazi basumbu: mwakasilwe buliabulia nu inyuwe kasanazi buliabulia.
9 Tamweke olo, aba feza, aba nsubi mu nsago zeinyu; 10 aba nsago za lugendo, aba makoti mabili; aba bisalapata, aba musumbo: kubuno mukambi atananina kukaswa idia lyage. 11 Ndi mwabasa mu mwino munene aba mu mukeke, londazi muntu uli kayikayika kumusekela nu mwikale kwage aaba nu nkungu zimukatuka. 12 Nu ndi muse mwingila mu numba, nti sambiziazi beiya zezo numba. 13 Nu ndi beiya numba beli kayikayika kumusekela nti bubobelelo bweinyu bube kubeli: tondo ndi beiya numba tabeli kayikayika kumusekela kasi nti bubobelelo bweinyu busubye kumuli. 14 Tondo ndi muntu ntamusambizia, aba ndi ntakungwa ku bumukutenda, nti mwabasa mu zezo numba aba mu wozo mwino, nu nti mwatitula mukungu wa magulu meinyu. 15 Lebelebe nkumubula bunee: ‘Lusungio lwa wozo mwino lukatinga lusungio lwa Sodoma nu Gomora mu busi bwa lusungio.’
16 Ungwililazi, nkumusinga anga mikoko zili munkatini mwa mboa za mu lubanda: umpanga mube na menge anga ma nzoka, nu mube kola anga tuzoni twa nkulimba tutakusakaga. 17 Tondo idangazi na bantu: bakamubasia ku nusu za milondo, nu bakamususula ku numba zabo za misanganano, 18 nu inyuwe mukabasibwa ku ngatu nu ku bakota banene ku kabamba kane, buno mube balongeki kubeli nu ku baBilongo. 19 Tondo gabakamubasia kuko, tamukengele buni bumwatende, kubuno mu nkungu zezo mwakaswe buni bumwatende. 20 Kubuno ta inyuwe u bakatenda, tondo Muuza wa Soinyuwe ukatenda mumuli.
21 Mubuto wa muntu akakasana mubuto wage buno akue, nu isi wa mwana agabule mwana wage buno akue, nu bana bakasomba bababuta, nu bakabagabula buno bakue. 22 Nu mukasombwa na bantu bansania ku kabamba k'izina lyane: tondo wozo widindika aaba nu kuzinda, nti akonibwa. 23 Aba gabakamusungia mu mwino wono, tininazi mu ungo: lebelebe, nkumubula bunee: ‘Tamukazindilizia nunse miino insania za baIsraeli aaba gakavwila Mwana wa Muntu.’
24 Mwigisibwa ntegezie na musozi wage, aba mukambi ntegezie na mukota wage. 25 Buli busoga mwigisibwa abe anga musozi wage nu mukambi anga mukota wage. Ndi bamanine nyene numba buno, Mukota wa basumbu, tondo buni bukamanwa bantu ba mu numba zage!
26 Umpanga tamukue bantu boba; kubuno takuli kyabisilwe, kitakabisulwa; nu takuli kyakukidwe, kitakalimbulwa. 27 Umpanga bunkumubula mu kindi, butendazi mu kyengi; nu bumukungwa mu kutuzi, busambalazi gantata ga mutondo wa numba. 28 Tamukue babo bakwita mubili boba, tondo tabanamenya kwita muntu wenyene. Tondo kwazi wozo uli na magala ma kwita muntu wenyene nu mubili mu kiziba kya keiya boba. 29 Ndi tuzoni tubili tukeke tatunakunzwa ku kinkulumba? Nu kamozi takanakoloka gansi ndi Soinyuwe ntamenya: 30 tondo nzwili insania za ku matoe meinyu zaganzilwe. 31 Tamukue boba, bukunza bweinyu buli bunene kutinga tuzoni twingi.
32 Umpanga muntu unsania ukanitabizagia lwabusio lwa bantu, nu Nne nkamwitabizia lwabusio lwa Tatane uli mwigulu. 33 Tondo muntu unsania ukantunaga lwabusio lwa bantu, nu Nne nkamutuna lingo lwabusio lwa Tatane uli mwigulu.
34 Tamukengele buno navule kulusia bubobelelo ku kisi; nsyavule kulusia bubobelelo, tondo mwene wa nganda. 35 Kubuno navule kulekanukya muntu n'isi, nu mukinga na nina, nu mukamwana na ninabyala: 36 nu babo ba numba za muntu u bakaba beiti bage.
37 Wozo welama isi nu nina kuntinga ntantananina, wozo welama mwana wage wamulume aba mwana wage wa mukazi kuntinga ntantananina. 38 Nu we uteka muti wage wa magu, nu kunyanga, ntantananina. 39 Muntu ukulanga kalamo kage nti akakazimizia nu wazimizia kalamo kage ku kabamba kane nti akakamona.
40 Nu wozo wamusekela nti ansekela, wozo wansekela nti asekela wozo wansingile. 41 Wozo wasekela mulengania kubuno eli mulengania; akakaswa lukaso lusoga ku kabamba ka mulengania: nu we wasekela wisanana buno eisanana, akakaswa lukalilo lusoga ku kabamba ka wisanana. 42 Nu we unsania ukakasaga umozi wa ku babano bakeke kituma kya mazi makwasa tugu buno eli mwigisibwa, lebelebe nkumubula bunee: ‘Ntakaziminwa na lukaso lwage lusoga nunse.’”