Lusombo lwa Yesu ku Nazareti
6
1 Yesu atukile kuko, nu abasile ku kilongo kya kwabo; beigisibwa bage bamuyangile. 2 Bwabezaga Busi bwa Sabato, alingile kwigisia mu numba za misanganano. Bantu beingi gabamungwilide bangamine. Nu batendile bunee: “Kuni kwakatila wono bitondo bibino? Nu menge makizi makaswa wono? Nu migeleko mingi zaakukita na maboko mage? 3 Ndi ta u wozo mukulumizi, mwana wa Maria, mubuto wa Yakobo, wa Yose, wa Yuda nu wa Simoni? Nu ndi babitu bage tabeli gamozi n'iswe?” Nu beinine mitima nage. 4 Tondo Yesu abatendile bunee: “Mulengania ntakubengwa kungo, umpanga kwabo, nu mu numba zage.” 5 Ntavwamine kukita mugeleko wampa kuko, tugu, abikile maboko mage ku basambi bamozi nu abonezie. 6 Nu angamine na kutakatizia kwabo. Yesu atimbiletimbile mu miino nu eigisizie. Yesu Asingile Beigisibwa Ikumi nu Babili
7 Nu amanine babo ikumi nu babili, nu alingile kubasinga babili babili. Abakasile bwangato ku basumbu ba nsese. 8 Abakakizizie bunee: “Tamwende na kena mu nzila, tugu na musumbo; aba kuba na kampampa, aba nsago, aba feza mu nsago; 9 tondo vwalazi bisalapata, nu tamuvwale makoti mabili.” 10 Nu abatendile bunee: “Kunsania kumukeingilaga mu numba, ikalazi mumo aaba nu gamwatuke mu kikyo kiziki. 11 Nu, ndi kuli bantu bamozi tabamusekela aba tabamungwilila, nti mwatuka gago, nu nti mwatitula mukungu guli ku magulu meinyu; buno bubo bwabe bulongeki kubeli.” 12 Bendile, nu basambede buno bantu beiyanie. 13 Beimbizie basumbu beingi nu babongezie basambi beingi makiti nu babonezie.
Lukuo lwa Yoana Mututiki
14 Mukota Herode ongule ku musagu wa Yesu; kubuno izina lyage lyabezaga likusambalwa kunsania. Nu atendile bunee: “Yoana Mututiki ayuka kutuka ku bakuzi nu ku bubuno akukita migeleko zeno.” 15 Bango batendile bunee: “Eli Elia.” Nu bango batendile bunee: “Wono eli mulengania, anga umozi wa balengania.”
16 Tondo gongule Herode ku bubo, atendile bunee: “Wozo Yoana u nasesaga itoe, u wozo wayuka kutuka ku bakuzi!” 17 Kubuno Herode wenyene asingile bantu bakate Yoana, nu amukandile ku kikando ku kabamba ka Herodia, mukikulu wa Filipo, muto wage; kubuno amusongile. 18 Nu Yoana amutendile bunee: “Tabwakulungana uwe kuba na mukikulu wa muto wobe!” 19 Herodia abezaga na musona munene ku Yoana nu atundile kumwita, tondo ntavwamine 20 kubuno Herode akuaga Yoana boba, amumenyine buno eli muntu wisanana, nu wasililila; amulangile, nu gaamungwilide, atubigenwe nu amungwililaga na mbogimbogi.
21 Nu gabede busi bwa kubutwa kwa Herode bwika, akitide bakulu bage kisagulo, nu bakota ba bakoloboyo nu bakulu ba Galilaya. 22 Mukinga wa Herodia eingide mwakitilagwa kisagulo, aminine; nu atananizizie Herode nu babo babezaga nabo: Mukota abwide wozo mukinga bunee: “Nsege kyukutunda, nu nakukasekyo.” 23 Amulumbide bunee: “Kikyo kinsania kiwansegage, nti nakukasekyo, aba kyindi kya bukota bwane.” 24 Nu azanzukile nu abuzizie nina bunee: “Nisege kikizi?” Nu nina amwakwide bunee: “Itoe lya Yoana Mututiki.” 25 Kazanga kongo avule lubilo ku mukota, nu amusegile bunee: “Nkutunda wampa kano kaluma itoe lya Yoana Mututiki ga lupepe!” 26 Mukota abede na kabebe nunse; tondo ku kabamba ka kulumbila kwage nu ku kabamba ka babo baliaga nabo, ntamwimine. 27 Kazanga kongo asingile mukoloboyo, nu amukakizizie buno, avwe n'itoe lya Yoana Mututiki.
28 Mukoloboyo endile kusesa itoe lya Yoana mu kikando. Nu avule n'itoe ga lupepe. Alikasile wozo mukinga, nu wozo mukinga alikasile nina. 29 Beigisibwa ba Yoana gabongule ku bubo, bavule kutola kitumba kyage nu bakiyikile mu nsinda.
Yesu Alisizie Bantu Tununu Tutano
30 Basingwa bakundamenne kwa Yesu, bamusambalide misagu za binsania bibakitile, nu binsania bibeigisizie. 31 Yesu abatendile bunee: “Vwazi, inyuwe mubenyene mu kalula, nu mumunwe kakeke.” Kubuno kwabezaga bantu beingi bavwaga nu bendaga, nu bo tababezaga aba na nkungu za kulia. 32 Umpanga bendile bobenyene mu bwato ku kiziki kitabezaga ku bantu. 33 Tondo bantu beingi bamonine kubakwenda nu babamenyine; nu beitumine kuko lubilo na magulu, kutukila ku miino insania nu balingile kubasa.
34 Gatukile Yesu mu bwato, amonine ku musanganano munene; wamukundamanina, agukwilide kyombo, kubuno babezaga anga mikoko ziteli na mulangi. Nu alingile kubeigisia bitondo byingi. 35 Gabede busi buse mwigolo, beigisibwa bage bamuvwilide, nu batendile bunee: “Gano geli kalula, nu busi buse bwida, 36 basinge, buno bende ku masoa nu ku miino za mu lulenge, nu beikunzile idia.” 37 Yesu abakwide bunee: “Mubakase idia mubenyene!” Tondo bamutendile bunee: “Ndi twende kukunza tumpampa twa feza nkama ibili buno tubakaseto balie?” 38 Nu abatendile bunee: “Tumpampa tunga tumuli nato? Endazi tanga mulole.” Gabamenyine, bakwide bunee: “Tuli na tutano nu byena bibili.”
39 Nu abakakizizie bunee: “Ikaziazi bansania, bibombo bibombo, gantata bisugu bibisi.” 40 Nu beikede gansi bibombo bibombo nkama na nkama nu makumi matano matano. 41 Atolile tuto tumpampa tutano nu bibyo byena bibili, nu agalamine kwigulu, nu abisegede nu abungwide tuto tumpampa; nu atukasile ku beigisibwa bage buno batubeganie ku musanganano. Abeganizie ku babo bansania bibyo byena bibili. 42 Bansania balide nu beikutile. 43 Nu basongezye nzi ikumi nu ibili ziyede na mbobu za tumpampa nu za byena zasigalaga. 44 Baliaga tuto tumpampa babezaga bakuka bamulume tununu tutano.
Yesu Akwenda Gantata ga Kitatenge
45 Nu kazanga kongo, akakizizie beigisibwa bage beingile mu bwato nu batinge lwabusio lwage ku lisilya, aaba ku Betesaida, gaabezaga es'alagana na musanganano. 46 Gaasilile kulagana nabo, endile kusega gantata ga mwiduko. 47 Gabede busi buse mwigolo, bwato bwabezaga buse munkatini mwa kitatenge, nu Yesu abezaga wenyene ku muse. 48 Abamonine bese bakutwa na kuluga, kubuno kisoa kyabezaga kinene kubeli; gabasile nkungu za mulangi wa banazi mu kindi, endile kubeli, endaga na magulu gantata ga kitatenge, nu atundaga kubatinga. 49 Tondo gabamumonineko akutabanga gantata ga kitatenge, bamenyaga buno embe kili kitwanda, nu balalukile, 50 kubuno bansania bamumonineko, nu bazangilezangile. Kazanga kongo, Yesu atendile nabo nu abatendile bunee: “Kokomeziazi mitima zeinyu, Nne Wono, tamukue boba!”
51 Gaabakamine mu bwato bubabezaga mubo, lumpumpu lwasilile. Bangamine nunse, 52 kubuno tabamenyine bwisulilwa bw'iganogano lya tumpampa; tondo mitima zabo zabezaga mibibu.
Yesu Akonia Basambi ba mu Kisi kya Genezareti
53 Gabasokile kitatenge, babasile ku kisi kya Genezareti, nu baswikile bwato. 54 Gabasilile kutuka mu bwato, kazanga kongo, bantu bamenyine Yesu. 55 Beitumine lubilo ku ntungo za kisi kikyo nu kweka basambi ga migu zabo, ku kiziki kinsania kibongwaga buno u kweli. 56 Nu kunsania kwendaga, mu miino mikeke nu miino minene aba ku masoa, babikaga basambi ku masoko, nu bamusegile buno, abakase tugu bwangato bwa kwitubya ku mupimbo wa nsulu zage. Nu babo bansania beitubizie kuzo bonine.