Musumo wa Mbuto
13
1 Mu busi bubo Yesu atukile mu numba eikede ku mutili wa kitatenge. 2 Musanganano munene wa bantu wamuvwilide, ububo eingide mu bwato, nu eikede; nu musanganano unsania wemenne ku mutili. 3 Nu abatendile bitondo byingi mu misumo bunee: “Ungwililazi, muyiki endile kuyika mbuto; 4 nu gaasaside, mbuto imozi zakolokile mu ntungo mwa nzila nu tuzoni twavule twazilile: 5 ingo zakolokile gantata ga lugangala kutabezaga bilongo byingi: nu kazanga kongo zasile kubuno takwabezaga bilongo byingi: 6 nu gabasile musi, zagide na musi, kubuno tazabezaga na mizi, nu zomine. 7 Ingo zakolokile mu mikele; nu mikele zasile nu zazilimbanizie: 8 nu ingo zakolokile ga bilongo bisoga, nu zakolamine biguma byingi, imozi lukama, nu ingo makumi mutuba, nu ingo makumi masatu. 9 Wozo uli na matuzi ma kungwilila, ongwilile!” 10 Nu beigisibwa ba Yesu bamuvwilide, bamubuzizie bunee: “Kubuni ukutenda nabo ku misumo?” 11 Yesu abakwide bunee: “Inyuwe mwakasilwe menge ma kumenya twinda twa Bukota bwa meigulu, tondo babo tabamakasilwe. 12 Ku bubuno muntu unsania uli na kena, bakamutalikila kango, nu akaba na byingi: tondo muntu unsania uteli na kena, akanyagwa kako keli nako. 13 Ku bubo nkubatenda mu misumo: kubuno bakulola tonda tabakumona nu bakungwilila tondo tabakungwa nu tabakusongolola. 14 Bubo bulengania bwatendagwa na Isaya bwazindilizizibwe kubeli bunee:
‘Kungwa, mungwe tondo tamwasongolole,
Mwalole tondo tamwamone.
15 Kubuno mitima za bantu babano zabede mibibu,
Bese baziba matuzi,
Nu bese baziba meiso, buno tabamone,
Songo ta bubo,
songo banamenyininne na mitima zabo,
Nu banagalukile kundi Nne Kalaga nu ninabonezie.’ a
16 Tondo mbogimbogi ku beinyuwe kubuno meiso meinyu makumona nu matuzi meinyu makungwa! 17 Lebelebe nkumubula bunee: ‘Balengania beingi nu bantu beisanana batundile kumona ku binsania bimukumona kubyo, tondo tababimonineko; nu batundile kungwa ku binsania bimukungwa kubyo, tondo tababyunguleko.’
18Umpanga ungwililazi ku bwisulilwa bwa musumo wa muyiki wa mbuto. 19 Babo bakungwa musagu wa bukota nu tabakugumenya basusanania na mbuto zakolokile mu ntungo mwa nzila: wozo mubi nti avwa nu kutikya byayikilwe mu mitima zabo. 20 Nu zezo zakolokile ga lugangala, u wozo ukungwa ku idagi nu kazanga kongo akulitunda na mbogimbogi, 21 tondo nteli na mizi munda mwage, akusigala nkungu nkeke; nu gakuvwa kabebe aba lubabazio ku kabamba k'idagi, kazanga kongo akwikuka. 22 Nu zezo zakolokile mu mikele, u wozo ukungwa ku idagi; tondo tubebe twa kisi nu bwengelezi bwa bikulo bukulimbania idagi, nu we ntakolame biguma. 23 Nu zezo zakolokile mu bilongo bisoga u wozo ukungwa ku idagi nu kulimenyinina; u wozo ukukolama biguma bisoga; umozi lukama, nu ungo makumi mutuba, nu ungo makumi masatu.”
Musumo wa Bisugu
24 Abeisile ungo musumo bunee: “Bukota bwa meigulu bwalingimana na muntu wayikile mbuto nsoga mu isoa lyage: 25 Tondo gabezaga bantu beiyombeka ku tulo, wamusomba avule kuyika mbuto mbi munkatini mwa mbuto nsoga, nu endile. 26 Tondo gasile mbuto nsoga nu kukolama, nsamba za tunkukuzungu zamonekileko nuzo. 27 Nu bakiti ba nyene isoa bavule, bamubuzizie bunee: ‘Mukota, ndi ntwayikile mbuto nsoga mu isoa lyobe? Kuni kwatukila mbuto mbi?’ 28 Akwide bunee: ‘Wansomba u wakitile bubo.’ Bakiti bage bamubuzizie bunee: ‘Ndi ukutunda twende kuyula mbuto mbi?’ 29 Abakwide bunee: ‘Kilo; kubuno ndi mwayula mbuto mbi, nti mwayula ngano gamozi na mbuto mbi. 30 Bisigazi, byasile gamozi aaba mu nkungu za kutubula, nkabula batubuzi buno, lingazi kukundamania tunkukuzungu, nu kututendeka bibombo bibombo kutukagisizibwa, tondo kundamaniazi ngano mu kigenge kyane.’”
Musumo wa Mbuto za Bunyonyo
31 Abeisile ungo musumo bunee: “Bukota bwa meigulu bwalingimana na mbuto za bunyonyo, muntu azikatile, nu aziyikile mwage mu isoa: 32 zili nkeke kutinga biyikanwa binsania; tondo gazikukula zikutinga biyikanua binsania, nu nti zaba muti munene, nu mu ntabi zago tuzoni twa mu mpelela nti tukuvwa kutetela gantata gazo.”
Musumo wa Mugago
33 Abeisile ungo musumo bunee: “Bukota bwa meigulu bwalingimana na mugago, wisile mukikulu mu mpepe isatu za bugali, nu bunsania bwagagile nunse.”
34 Nu Yesu atendile na musanganano bitondo binsania mu misumo, ntanabwatendile bwatatendile ku misumo, 35 bubo iyuki lizindilile lyatendagwa na mulengania bunee:
“Nkatenda ku misumo;
Nkatenda byabezaga byabiswa kutukila kulinga
kwa kisi.” b
36 Nu Yesu asigile musanganano, nu eingide mu numba; beigisibwa bage bamuvwilide nu bamubwide bunee: “Twisulile musumo wa tunkukuzungu twabezaga mu isoa.” 37 Nu abakwide bunee: “Ukuyikaga mbuto nsoga eli Mwana wa Muntu; 38 Nu isoa lili bantu ba kisi; mbuto nsoga zili bana ba Bukota; nu tunkukuzungu tuli bana ba wozo mubi; 39 nu musombi ukutuyika eli Satana; busi bwa kutubula buli kuzinda kwa kisi, batubuzi beli banzelo ba Kalaga, 40 Umpanga bantu bakakundamania tunkukuzungu kutugisia ga keiya, nu bubo u bukaba ku kuzinda kwa kisi. 41 Mwana wa Muntu akasinga banzelo bage kutikya mu bukota bwage binsania bikwagagia bango bantu nu bakiti ba bubi. 42 Nu bakeiswa mu kiziba kya keiya, u kukaba idilo nu kubuga meinyo. 43 Mu busi bubo bantu basoga bakasana anga kisongo kya busi mu bukota bw'Isibo. Wozo uli na matuzi ma kungwilila, nti ongwilile.
Musumo wa Bikulo Byabiswa
44 Bukota bwa meigulu bwalingimana na bikulo byabisilwe mu isoa; muntu abimonine, nu we abibisile lingo; nu ku mbogimbogi zage, endile, nu akunzizie byage binsania, nu akunzile lilyo isoa.
Musumo w'Ikozi lya Bukunza Bubibu
45 Lingo, Bukota bwa meigulu bwalingimana na muntu mukunzia, walondaga lulu nsoga za bukunza bubibu; 46 nu gaamonine lulu nsoga za bikulo byingi, endile nu akunzizie byage binsania, nu alikunzile.
Musumo wa Kakila ka Byena
47 Lingo, Bukota bwa meigulu bwalingimana na kakila keisagwa mu kitatenge, kakundamanizie byena bya nkita na nkita: 48 geiyalile kakila bundo, bakabulutile ku muse; beikede nu bakundamanizie byabezaga bisoga mu nzi, nu beisile byabezaga bibi mu kitatenge. 49 Nu bubo u bukaba mu kuzinda kwa kisi, banzelo bakavwa, bakatikya bagi babezaga munkatini mwa bantu beisanana, 50 nu bakeiswa mu kiziba kya keiya, u kukaba idilo nu kubuga meinyo.
51 Ndi mwamenyinina bubuno bunsania?” Bamwakwide bunee: “Ee, Mukota.” 52 Nu ababwide bunee: “Musanzi unsania wigisizibwe mu Bukota bwa meigulu alingimana na muntu mwiya numba ukutikya bikulo bitangi nu bizinda mu kikagi kyage.”
Yesu Akusubya ku Nazareti
53 Nu gasilile Yesu kwisula misumo zeno, atukile. 54 Nu gaabasile kwabo, abeigisizie mu numba zabo za misanganano, nu bangamine nu batendile bunee: “Kuni kwasanga muntu wono menge mamano, nu migeleko zeno? 55 Ndi wono tu Mwana wa mukulumizi wa mbavu? Ndi nina ta wozo ukumanwa buno Maria? Nu ndi bato bage tu Yakobo, nu Yosefu, nu Simoni, nu Yuda? 56 Nu babitu bage, bansania ndi tabeli kweitu? Umpanga kuni kwasangila wono bubuno bunsania?” 57 Nu beinine mitima nage. Nu Yesu ababwide bunee: “Mulengania ntakubengwa kungo, umpanga kwabo, nu mu numba zage.” 58 Nu ntakitile migeleko kuko, kubuno tabakatizizie.