Yesu Akulindikwa na Satana
4
1 Yesu eiyede na Muuza Wasililila, asubizie kutuka ku Yordani, nu asondelezizibwe na Muuza mu kalula; 2 kuko alindikilwe na Satana ku bindi makumi manazi, ntalide kampa mu bindi bibyo, nu gabyasilile, abede na nzala. 3 Satana amubwide bunee: “Ndi Uwe uli Mwana wa Kalaga, kakizia ikozi lilino libe kampampa.” 4 Yesu amwakwide bunee: “Bwasanzilwe buno, muntu ntanalama ku kampampa tugu tondo ku idagi lya Kalaga.” a 5 Nu Satana amubakamizie gantata ga mwiduko wasakama, nu mu nkungu nkeke, amulolesizie makota mansania ma mu kisi. 6 Nu amutendile bunee: “Nakukase bwangato bunsania, nu lutanuno lwa mamo makota; kubuno nakasilwebyo, nu ninakasanabyo ku unsania u nkutunda. 7 Umpanga ndi wankumbamina, binsania nti byabe byobe.” 8 Nu Yesu amwakwide bunee: “Bwasanzilwe bunee: ‘Kumbamina Mukota Kalaga wobe, nu nti wamukitila We wenyene tugu.’” b
9 Nu Satana amusondelezizie ku Yerusalema, amubikile gantata ga mutondo wa numba za kukumbamina, nu amubwide bunee: “Ndi uwe u Mwana wa Kalaga, idekele gansi tanga, 10 kubuno bwasanzilwe bunee: ‘Akakizie banzelo bage bakulange;’ 11 nu, ‘Bakweke mu maboko mabo, buno kugulu kwobe kunavwa kwikuka ku ikozi.’” c 12 Nu Yesu amubwide bunee: “Bwasanzilwe bunee: ‘ntulindike Mukota Kalaga wobe!’” d 13 Nu gaasilile kumulindika mu nkita insania, Satana alekanukile nage mu nkungu zezo.
Yesu Akulinga Mulimo ku Galilaya
14 Yesu asubizie ku Galilaya mu magala ma Muuza Wasililila nu lukumu lwage lwabalangenne mu kisi kinsania. 15 Nu We eigisizie mu numba zabo ningi za misanganano nu aganunagwa na bansania.
Yesu Asombilwe ku Nazareti
16 Endile ku Nazareti, kuko kwakuzizibwe; nu anga bwabezaga lukita lwage, eingide mu numba za musanganano Busi bwa Kumunwa, u Sabato, nu emanukile kusoma. 17 Nu bamukasile kigondi kya mukanda wa mulengania Isaya nu gakigondwede, amonine kiziki kyasanzilwe bunee:
18 “Muuza wa Mukota uli gantata gane,
Kubuno ambongezie mwambo buno nisambale musagu musoga ku bazambi;
Nu ansingile buno nisambalile bakandwa bukandulwa bwabo.
Nu byuku bukandulwa bwa meiso mabo,
Nu kukandula bakusungibwa,
19 Nu kusambala mwaka wa mponga za Mukota.” e
20 Kumbusa, agondile mukanda, agusubizie ku mukiti, nu eikede gansi. Nu bantu bansania babezaga mu numba za musanganano bamulolile kisozi. 21 Nu alingile kubasambalila bunee: “Lelo, isanzo lilino lyazindilila ku matuzi meinyu.” 22 Nu bansania bamulongekede nu bangamine ku bitondo bya mponga byatukaga mu kanua kage, nu batendile bunee: “Ndi wono ta Mwana wa Yosefu?” 23 Yesu abatendile bunee: “Lebelebe mwantende musumo wono, ‘Munganga, iyonie uwenyene.’ Bitondo binsania bitungule buno wakitile ku Kapernaumu, bikite lingo gano geinyu.” 24 Nu abatendile lingo bunee: “Lebelebe nkumubula buno, takuli mulengania ukwitabizibwa na kilongo kya kwabo. 25 Lebelebe nkumubula buno, kwabezaga misigala mingi ku kisi kya Israeli mu bindi bya Elia, mu nkungu zakandilwe igulu myaka isatu nu myezi mutuba, nu kwabezaga nzala nnene mu kisi kinsania. 26 Tondo Elia, ntasingilwe ku umozi wa kubeli, tugu ku wozo mukikulu umozi musigala wabezaga ku Zarepata, mu kisi kya Sidoni. 27 Lingo kwabezaga beiya bibali beingi ku Israeli mu bindi bya mulengania Elisa; aba takuli umozi wa kubeli wengezibwe, tugu Namani muntu wa kisi kya Suria.”
28 Nu bansania babezaga mu numba za misanganano beiyede na bongoa nunse gabongule ku bubo. 29 Nu bazanzukile, bamwimbizie mu wozo mwino, nu bendile nage gantata ga mwiduko gago gabezaga gobakwa mwino wabo, buno bamusindike mu mpembwe. 30 Tondo Yesu atingile gabasamba nu eiyendede.
Yesu Akutikya Musumbu ku Muntu wa ku Kapernaumu
31 Nu Yesu endile ku Kapernaumu, mwino wa ku Galilaya; nu abeigisizie ku Busi bwa Kumunwa. 32 Nu bangamine na meigisia mage, kubuno idagi lyage lyabezaga na bwangato. 33 Nu mu numba za musanganano mwabezaga muntu umozi wabezaga na musumbu wa nsese, wono alalukile mweli n'iyuki inene bunee: 34 “Kya! Kikizi kili gatusamba nobe, Yesu wa ku Nazareti? Ndi wavule buno utuzikye? Nikwizi buno, Uwe uli Wasililila wa Kalaga.” 35 Nu Yesu amuzugide nu atendile bunee: “Ikala kibibi nu tuka mu wono muntu!” Nu wozo musumbu amwisile gansi munkatini mwabo, atukile mweli geteli kumubabazia. 36 Nu bansania bangamine nunse nu batendenne bwabobwabo bunee: “Kitondo kikizi kikino?” Kubuno akukakizia basumbu na bwangato nu magala nu nti bakutuka. 37 Nu lukumu lwage lwakukile mu ndenge insania za mu kikyo kisi.
Yesu Akonia Ninabyala wa Petro nu Bango Bantu Beingi
38 Atukile mu numba za misanganano nu eingide ku numba za Simoni. Nu ninabyala wa Simoni abezaga musambi w'isusila inene, nu bamusegile buno amonie. 39 Amwetaminne nu azugide isusila nu lyamutukile, nu kazanga kongo azanzukile nu abakitide.
40 Gabede busi buse mwigolo, bantu bansania babezaga na basambi ku nsambo za nkita na nkita, bamuvwilide nabo. Nu We abikile maboko mage gantata ga muntu na muntu wa kubeli nu abonezie. 41 Nu basumbu beingi babatukile, balalukile nu batendile bunee: “Uwe uli Mwana wa Kalaga!” Tondo Yesu abazugide nu abananizie buno, tabatende, kubuno babezaga beizi buno eli Kristo.
Yesu Akwigisia ku Yudea
42 Nu gakede busi, atukile nu endile ku kiziki kiteli ku bantu. Nu bantu beingi bamulondaga nu babasile kuko kwabezaga; batundaga kumukata buno ntatuke kwabo. 43 Tondo ababwide bunee: “Bwatunganana nisambale musagu musoga wa bukota bwa Kalaga ku ingo miino, kubuno u kunasingilwe.” 44 Nu endaga kankanka eigisia mu numba ningi za misanganano za ku Galilaya.