Satana Alindikile Yesu
4
1 Tondo Muuza asondelezizie Yesu kwenda mu kalula buno Satana amulindike. 2 Eikandile bindi makumi manazi, ntalia musi nu kindi, kusila kwa bubo akule na nzala. 3 Nu mulindiki avule nu amutendile bunee: “Ndi uwe u Mwana wa Kalaga, kakizia makozi mamano mabe tumpampa.” 4 Nu Yesu amwakwide bunee: “Bwasanzilwe: muntu ntanalama na kampampa tugu, umpanga na idagi linsania likutuka mu kanua ka Kalaga.” a5 Nu Satana, amusondelezizie ku mwino muswagibwa nu amubakamizie gantata ga mutondo wa numba nnene za kukumbamina, 6 nu amubwide bunee: “Ndi uwe u Mwana wa Kalaga, iyise gansi: kubuno bwasanzilwe bunee:
‘Akakizie banzelo bage bakulange,
nu, mu maboko mabo bakweke,
Unavwa kwikuka kugulu kwobe ku ikozi.’” b
7 Yesu amubwide bunee: “Masanzo makutenda lingo bunee: ‘Ntulindike Mukota Kalaga wobe.’” c 8 Lingo, Satana,
endile nage ku mwiduko wasakama nunse, nu amulolesizie makota mansania ma kisi, nu lutanuno lwamo; 9 nu amubwide bunee: “Nakukase bibino binsania, ndi wankomena mazu nu kunkumbamina.”
10 Nu Yesu amubwide bunee: “Tuka Satana: kubuno masanzo makutenda bunee: ‘Kumbamina Mukota Kalaga wobe, nu nti wamukitila wenyene.’”
11 Nu Satana, amusigile: nu banzelo ba Kalaga bavule nu kumukitila.
Yesu Es'alinga Kusambalila Bantu Musagu wa Kalaga
12 Gongule Yesu musagu buno, Yoana akandwa mu kikando, endile ku Galilaya; 13 nu atukile ku Nazareti, nu avule kwikala ku Kapernaumu, guli bwigi na kiziba, mu mwaga wa Zebuluni nu Nafutali; 14 bubo lizindilile lyatendagwa na mulengania Isaya bunee:
15 “Kisi kya Zebuluni nu kisi kya Nafutali,
Nzila za mu ntungo na kiziba, lisilya lya
Yordani, Galilaya za baBilongo,
16 Bantu babezaga mu kapilo bamonine ku kyengi
kinene, Nu bo beikalaga mu kisi kya kilimelime kya lukuo. Kyengi kyabasanine.” d
17 Kutukila nkungu zezo Yesu alingile kusambala, nu kutenda bunee: “Iyaniazi; kubuno Bukota bwa meigulu buse bwigi.”
Yesu Akumana Petro nu Anderea nu Yoana
18 Nu gatabangaga Yesu mu ntungo mwa kitatenge kya Galilaya, amonine ku bantu babili, ba muto n'iselenzi, Simoni wamanagwa buno Petro, nu muto wage Andrea, beisaga kakila mu kitatenge; kubuno babezaga bazubi. 19 Ababwide bunee: “Nyangazi, nu namubike buno mube bazubi ba bantu.” 20 Nu kazanga kongo basigile tukila, nu bamuyangile.
21 Nu gaabede es'alinga lugendo, amonine ku bango bantu babili ba muto n'iselenzi, Yakobo mwana wa Zebedayo, nu muto wage Yoana, babezaga mu bwato n'isibo Zebedayo, balandaga tukila twabo; nu abamanine. 22 Nu kazanga kongo basigile isibo na bwato, nu bamuyangile.
23 Nu Yesu endile kunsania ku Galilaya, eigisagia mu numba zabo za misanganano, nu abasambalide musagu musoga wa Bukota bwa Kalaga, nu onezie nsambo za nkita na nkita za bantu. 24 Nu misagu zage misoga zasambedwe mu ndenge insania za Suria; nu bamuvwilide na basambi bansania ba nkita na nkita nu babezaga na lubaba lukali, nu babezaga na basumbu, nu babezaga na lungu, nu boma biganza; nu abonezie. 25 Nu misanganano minene za bantu zamuyangile kutuka ku Galilaya, nu ku Dekapoli nu ku Yerusalema, nu ku Yudea nu ku lisilya
lya Yordani.