Yoana Mututiki nu Mulimo Wage
3
1 Mu bindi bibyo Yoana Mututiki abasile, asambalide bantu mu kalula ka Yudea bunee: 2 “Iyaniazi; kubuno Bukota bwa Kalaga buse bwigi!” 3 Kubuno wozo watendagwa na mulengania Isaya bunee:
“Iyuki lya muntu likulaluka mu lubanda
bunee: ‘Kungazi nzila za Mukota,
Longekazi matingilo mage!’” a
4 Yoana abezaga na nsulu za myoza za ngamia, nu mukoma wa kikoba mu kibunda kyage; nu idia lyage lyabezaga mande nu buuki bwa mu lubanda. 5 Nu bansania ba Yerusalema nu Yudea nu bansania ba ndenge insania za bwigi na Yordani bamubaside; 6 nu batutikilwe nage mu luuzi lwa Yordani, beigongile misako za bwagi bwabo.
7 Tondo gaamonine ku baFarisayo beingi nu baSadukayo bakuvwa kututikwa nage, ababwide bunee: “Inyuwe kikanga kya nzoka nazi wamutondile buno mutine bongoa bukavwa? 8 Kolamazi biguma byatananina kwiyania: 9 nu tamukengele mubenyene bunee: ‘Tuli na tateiswe Abrahamu;’ kubuno nkumutenda bunee: ‘Kalaga anavwama kubasizia Abrahamu bana mu makozi mamano!’ 10 Nu kano kaluma isaga lyabikwa gansina miti: nu muti na muti utakolama biguma bisoga nti wasindwa, nu nti wiswa mu keiya. 11 Lebelebe nkumututika mu mazi ku kabamba ka kwiyania; tondo we ukavwa kumbusa kwane antinga: nsyatananina kweka bisalapata byage: wozo akamututika na Muuza Wasililila nu na keiya. 12 Lweli lwage luli mu kuboko kwage, nu we akengia mulungu wage nunse, nu we akakundamania mbuto zage mu mupala wage, tondo akagisia mpepa mu keiya katakuzimaga.”
Yesu Akututikwa
13 Gatukile Yesu ku Galilaya, avule ku luuzi lwa Yordani kuli Yoana, buno atutikwe nage. 14 Tondo Yoana ananine, atendile bunee: “Nne nkwiyanina kututikwa nobe, tondo ukuvwa kundi?” 15 Tondo Yesu amwakwide bunee: “Itabizia tugu bubo: kubuno twatunganana kuzindilizia bunsania bukutenda Kalaga.” Nu amwitabizizie. 16 Gaamututikile, kazanga kongo Yesu atukile mu mazi: nu kazanga kongo meigulu mamukandukide, nu amonine ku Muuza wa Kalaga akugela anga nkulimba, nu eikede gantata gage; 17 nu kazanga kongo, iyuki lyatukile kwigulu, lyatendile bunee: “Wono eli Mwana wane, Mutundwa wane, natananinwa nage.”