YOANA
Idagi Lyabede Muntu,
1
1 Mu kulinga, mwabezaga Idagi, nu Idagi abezaga gamozi na Kalaga, nu Idagi abezaga Kalaga. 2 Idagi abezaga gamozi na Kalaga kutukila mu kulinga. 3 Binsania byakitilwe nage, nu takuli kimozi ku bibyo byakitilwe, kitakitilwe nage. 4 Mweli mwabezaga kalamo, nu kalamo kabezaga kyengi ku bantu. 5 Kyengi kyasanine mu kapilo, nu kapilo takakyangatile. 6 Kwabede muntu umozi wasingilwe na Kalaga, izina lyage Yoana. 7 Wono avule anga mulongeki buno alongekele kikyo kyengi, buno bantu bansania bakatizie ku wozo musagu wage. 8 We wenyene, ntabezaga kikyo kyengi, tondo avule kulongekela kikyo kyengi. 9 Kikyo kyengi kyabezaga kya lebelebe, nu ku kuvwa kwakyo mu kisi kikusanizia bantu bansania.
10 Idagi lyabezaga mu kisi, nu kisi kyakitilwe nage, nu kisi takyamumenyine. 11 Avule ku bantu bage, tondo bantu bage tabamusekede, 12 tondo ku bansania bamusekede, abakasile bwangato bwa kuba bana ba Kalaga, u babo bakatizizie izina lyage. 13 Babutilwe ta ku mikila, aba ta ku lutundo lwa mubili, aba ta ku lutundo lwa muntu, tondo lwa Kalaga.
14 Idagi abede muntu, nu eikede munkatini mweitu, eiyede na mponga nu na bulili. Nu twamonine ku lutanuno lwage, lutanuno anga lulo lwa Mwana wa ngomo watukile ku Isi.
15 Yoana asambede nunse bitondo byage nu alalukile bunee: “U wozo u namutendile bunee: ‘avwe kumbusa kwane, tondo eli munene kuntinga, kubuno abezaga lwabusio lwane.”’
16 Nu ku bwingi bwa mponga zage, atukasile mponga gantata ga mponga. 17 Kubuno mulembe wakasenwe na Musa, tondo mponga nu bulili byavule na Yesu Kristo. 18 Takuli muntu wampa wamonine ku Kalaga, tondo Kalaga Mwana wa ngomo uli gamozi n'Isi u wamulolesizie kutuli.
Musagu wa Yoana Mututiki
19 Bubuno buli bulongeki bwa Yoana mu nkungu zasingile baYuda kutuka ku Yerusalema basankoga nu baLawi kweli kumubuzia bunee: “Uwe uli nazi?” 20 Nu eitabizizie geteli kutuna, tondo atendile bwasibwasi bunee: “Nne nsili Kristo.” 21 Nu bamubuzizie bunee: “Uli nazi? Ndi uwe u Elia?” Yoana akwide bunee: “Kilo, ta nne u We.” Bamubuzizie lingo bunee: “Ndi uli mulengania?” Akwide bunee: “Kilo.” 22 Bamubwide lingo bunee: “Uwe uli nazi? Kubuno twatunganana kusubya iyakulo ku babo batusingile. Buni buukutenda ku kabamba kobe uwenyene?” 23 Yoana akwide bunee:
“Nne nili iyuki lya wozo muntu ukulaluka mu kalula bunee:
‘Isiazi nzila za Mukota,’ anga bwatendile mulengania Isaya.” a
24 Babo basingilwe ku Yoana babezaga baFarisayo. 25 Bamubuzizie nu bamubwide bunee: “Kubuni kuukututika, ndi ntuli Kristo, aba Elia, aba wozo mulengania?” 26 Yoana abakwide bunee:
“Nne nkututika mu mazi, tondo munkatini mweinyu muli umozi u mutizi, 27 nu akuvwa kumbusa kwane, tondo nne nsyatananina nunse kukandula mizigi za bisalapata byage.”
28 Bubuno bwakitilwe mu Betania, ku lisilya lya Yordani, ku kiziki kyatutikaga ku Yoana.
Yesu Mwana wa Mukoko wa Kalaga
29 Gakede busi, Yoana amonine ku Yesu akuvwa kweli, nu atendile bunee: “Lolazi Mwana wa mukoko wa Kalaga ukutikya bwagi bwa kisi! 30 U wozo u namubulaga bunee: ‘Kumbusa kwane kukuvwa muntu umozi walingile kulama lwabusio lwane, kubuno abezaga lwabusio lwane.’ 31 Nu nne nsyamumenyine, tondo ku kabamba ka buno amonekeko ku Israeli, navule kututika mu mazi.”
32 Yoana asambede lingo bunee: “Namonine ku Muuza akugela kutuka mwigulu anga nkulimba nu kwemana gantata g'itoe lyage. 33 Nu nne nsyamumenyine buno eli nazi, tondo Kalaga, wozo wansingile kututika mu mazi, ambwide bunee: ‘Wozo u wamone buno Muuza akugela nu kwemana gantata gage, nti u wozo ukututika na Muuza Wasililila.’” 34 Nu Yoana atendile bunee: “Nne namonine ku bubo, nu nkumubula buno, We u Mwana wa Kalaga.”
Beigisibwa Batangi ba Yesu
35 Gakede busi, Yoana abezaga lingo gago gamozi na babili ba ku beigisibwa bage; 36 alolile nunse Yesu akutinga nu atendile bunee: “Lolazi Mwana wa Mukoko wa Kalaga.” 37 Babo beigisibwa babili ba Yoana gabongule ku bubo bwatendaga, bayangile Yesu. 38 Nu Yesu akebetukile nu amonine buno bamuyangaga, nu ababuzizie bunee: “Kikizi kimukulonda?” Bamwakwide bunee: “Rabbi (Bwisulilwa bw'izina lilyo buli Musozi), ukwikala kuni?” 39 Abakwide bunee: “Vwazi nu mulole.” Ububo bendile gamozi nage nu bamonine kuko kwikalaga, nu beikede gamozi nage busi bubo. Zabezaga zakuka bwigi na nkungu ikumi za busi.
40 Andrea, muto wa Simoni Petro, abezaga umozi wa ku babo babili bongule ku kutenda Yoana nu bayangile Yesu. 41 Nu alingile tanga kubasa kuli muto wage Simoni nu amubwide bunee: “Twamona ku Masiya (Bwisulilwa bw'iyuki lilyo buli Kristo, aba Mubongibwa).” 42 Nu avule na Simoni kuli Yesu, Yesu amulolila kisozi nu atendile bunee: “Uli Simoni, mwana wa Yona, wamanwe Kefa (Bwisulilwa bw'izina lilyo buli Petro, aba ikozi).”
Yesu Amanine Filipo nu Natanaeli
43 Gakede busi, Yesu akengede kwenda ku Galilaya. Asangile Filipo, nu amutendile bunee: “Nyange!” 44 Filipo abezaga wa ku Betesaida, mu mwino wabo na Andrea nu Petro. 45 Kumbusa, Filipo asangile Natanaeli, nu amubwide bunee: “Twamonine ku wozo watendilwe mu mulembe wa Musa nu mu balengania, Yesu wa ku Nazareti, mwana wa Yosefu.” 46 Natanaeli amubuzizie bunee: “Ndi kuko ku Nazareti kunatuka kintu kimozi kili kisoga?” Filipo amubwide bunee: “Vwa nu umone.”
47 Gamonine Yesu ku Natanaeli akuvwa kweli, amubwide bunee: “Lolazi, eli muIsraeli wa lebelebe, mweli tamuli bwengelezi.” 48 Natanaeli amubwide bunee: “Buni buwammenya?” Yesu amwakwide bunee: “Lwabusio Filipo ntekumana, nkungu ziwabezaga gansina ga muti wa mutini, nakumonineko.” 49 Nu Natanaeli amutendile lingo bunee: “Rabbi, uwe uli Mwana wa Kalaga. Uwe uli Mukota wa Israeli!” 50 Yesu amwakwide bunee: “Kubuno nakutendile buno nakumonineko gansina ga muti wa mutini, wakatizia; wamone ku bitondo binene kutinga bibino!” 51 Lebelebe, nkumubula bunee: “Mwamone igulu lyakandulwa, nu banzelo ba Kalaga bakubakama nu bakugela gantata ga Mwana wa Bantu!”