Kuyuka kwa Yesu Kutuka ku Bakuzi
24
1 Tondo mu busi butangi bw'izinga, mu nindunindu nunse, bakikulu bendile ku nsinda nu bekile bulago bubasilile kubika kayikayika. 2 Basangile ikozi lyatukibwa lwabusio lwa nsinda. 3 Tondo gabeingide mu nsinda, tabasangile kitumba kya Mukota Yesu. 4 Nu gababezaga bakuganagana na kitondo kikyo, kitangalabesi, bantu babili bababaside, babezaga bavwala nsulu zikukelima nunse. 5 Nu babede nunse na boba, nu bakomine meiso mabo gansi, tondo babo bantu babili bababuzizie bunee: “Kubuni kumukulonda wozo uli mulami munkatini mwa bakuzi?” 6 Nteli gano; ayukile kutuka ku bakuzi! Kengelazi bwamutendile nkungu zabezaga eikili ku Galilaya, 7 nu atendile bunee: “Bwatunganana Mwana wa Muntu akasanwe mu maboko ma bagi, eitwe ku musalaba nu ku kindi kya bisatu nti ayuke kutuka ku bakuzi.” 8 Nu bakengede moki ma Yesu. 9 Mu kusubya kwabo kutuka ku nsinda, basambede bibyo bitondo binsania ku babo ikumi n'umozi nu ku bango bansania. 10 Babo basambede bibyo bitondo bibyo ku basingwa babezaga Maria Magadala, nu mukikulu Yoana, nu Maria wa Yakobo, nu bango bakikulu babezaga gamozi nabo. 11 Tondo tabangile bibyo bitondo nu tabakatizizie babo bakikulu, kubuno byabede anga buliabulia. 12 Tondo Petro emanukile nu eitumine lubilo ku nsinda nu gaakumbaminne kwengelesia mo, amonine tugu ku zezo nsulu zabota zabezaga gansi, kusila endile ku numba zage nu angamine nunse na bitondo bibyo byabede.
Mu Nzila za ku Emau
13 Mu bubo busi, beigisibwa babili babezaga bakwenda ku mwino umozi wamanagwa Emau, wabezaga bulazi na Yerusalema anga lugendo lwa nkungu ibili. 14 Nu bo basambalilanaga bunsania bwatingile. 15 Nu gababezaga bakusambalilana nu kubuzania, Yesu wenyene avule bwigi nabo nu endile gamozi nabo. 16 Tondo meiso mabo mazibilwe buno tabamumenyinine. 17 Nu ababuzizie bunee: “Bitondo bikizi bimukusambalilana nu mukwenda?” Nu bemenne nu babezaga na kabebe. 18 Umozi wa kubeli wamanagwa Kleopa, amwakwide bunee: “Ndi uwenyene u guli mugeni mu Yerusalema uteizi bitondo byatingile mo mu bindi bibino?” 19 Ababuzizie bunee: “Bitondo bikizi?” Nu bamwakwide bunee: “Bitondo byabaside Yesu wa ku Nazareti. Abezagile mulengania mubibu mu kukita nu mu kutenda lwabusio lwa Kalaga nu lwabusio lwa bantu bansania, 20 nu lukita lwamukasenne bakota ba basankoga nu bangati beitu buno asungibwe nu kukua, nu bamutakile ku musalaba. 21 Tondo twabezagile tukulemanina buno We u wakulule Israeli: Nu lingo ku bitondo bibino, lelo u kindi kya bisatu kutukila gakitidwe bibyo bitondo binsania. 22 Lingo bakikulu bamozi ba kutuli batwangamizie nunse, bendile mu mukelo nunse ku nsinda. 23 Tondo gabatamonine ku mubili wage, bavule kutenda buno banzelo bababaside nu basambede buno eli mulami. 24 Bamozi ku babo babezaga gamozi na beiswe bendile ku nsinda nu basangile bunsania bwatendaga bakikulu buno buligo, tondo We, tabamumonineko.”
25 Nu Yesu ababwide bunee: “Inyuwe bantu beteli na bumenyinino, nu beiya mitima zatamba ku kukatizia binsania byatendaga balengania! 26 Ndi tabwatunganenne buno Kristo asungibwe ku bitondo bibino, nu nti eingila mu lutanuno lwage?” 27 Nu kutukila ku Musa nu ku balengania bansania, abasambalide bwisulilwa bwa masanzo mansania masanzilwe ku kabamba kage.
28 Nu gababezaga beseli bwigi na mwino u bendaga kugo, amonekile anga ukutunda kwenda bulazi. 29 Tondo bamukakizizie nunse bunee: “Ikala gamozi n'iswe kubuno buse mwigolo, nu busi buse bwigi na kwida.” 30 Nu gaabezaga eseli ga meza gamozi nabo, atolile kampampa nu asegile; akabungwide nu abakasile ko. 31 Nu meiso mabo malimbukile, nu bamumenyine; tondo abombile lwabusio lwabo. 32 Nu babuzanizie bwabobwabo bunee: “Ndi tatwabezaga na mitima za kukengela tugu gaatutendaga mu nzila nu kutwisulila masanzo?”
33 Nu batukile mu zezo nkungu, nu basubizie ku Yerusalema, nu basangile babo beigisibwa ikumi n'umozi bakundamana gamozi na bango bababezaga nabo, 34 nu batendile bunee: “Lebelebe Mukota ayukile kutuka ku bakuzi; nu amonekileko na Simoni!” 35 Nu basambede bunsania bwababaside mu nzila nu lukita lubamumenyininne mu nkungu zabungulagile kampampa.
Yesu Abaside Beigisibwa Bage
36 Gababezaga bakutenda bubuno, Yesu wenyene emenne munkatini mwabo, nu ababwide bunee: “Bubobelelo bube gamozi na inyuwe!” 37 Tondo basalimine nunse nu babede na boba nunse, bakengede buno bamona ku musumbu. 38 Tondo Yesu ababwide bunee: “Kubuni kumukuzangazanga nu kubuni muli na makengelo meli bubo mu mitima zeinyu? 39 Lolazi ku makasa mane nu ku masindi mane, buno nne u wono; mbabatazi nu lolazi: kubuno musumbu nteli na misuna aba makwa anga bumukummona nazo.” 40 Nu gaasilile kutenda bubo, abalolesizie makasa mage nu masindi mage. 41 Nu anga bubatakatizagia mu mbogimbogi zabo, nu babezaga bakwangama, Yesu ababwide bunee: “Ndi muli na kimunalia gano?” 42 Bamukasile kyindi kya kyena kyokibwa. 43 Akitolile nu akilile lwabusio lwabo. 44 Kusila ababwide bunee: “Bubo u bunamubwide ganabezaga nikili gamozi na inyuwe, buno bubo bunsania bwasanzilwe ku kabamba kane mu mulembe wa Musa, nu balengania, nu mu nimbo, bwatunganana kuzindilila.” 45 Nu abakandwide makengelo buno basongolole masanzo.
Ikakizio Inene
46 Nu ababwide bunee: “Ububo bwasanzilwe buno Kristo akasungibwa nu nti akayuka kutuka ku bakuzi, ku kindi kya bisatu, 47 nu kwiyania nu isigililo lya bwagi lisambalwe mu izina lyage ku bilongo binsania, kulingila ku Yerusalema. 48 Muli balongeki ba bitondo bibino. 49 Nu, namusingile idagano lya Tatane, tondo inyuwe sigalazi mu mwino wono aaba nu gamwavwalikibwe magala matuke kwigulu.”
Yesu Es'enda Mwigulu