Kuyuka kwa Yesu Kutuka ku Bakuzi nu Binsania bya Busi Bubo
28
1 Kusila kwa busi bwa kyumuno, nindunindu mu busi butangi bw'izinga, Maria Magadala nu ungo Maria bendile kulola ku nsinda. 2 Nu kisi kyatengiletengile bubibu; kubuno mwanzelo wa Mukota agelile kutuka mwigulu, nu avule, nu akumbizie ikozi, nu eikede gantata galyo. 3 Kilungi kyage kyakelimaga anga mikenzi, nu nsulu zage zabezaga zenga nunse. 4 Nu balangi bakule boba, bagiliminne, babede anga bakuzi. 5 Nu mwanzelo atendile bakikulu bunee: “Tamukue boba; kubuno nizi buno mukulonda Yesu, wozo watakilwe ku musalaba. 6 Nteli gano; ayukile kutuka ku bakuzi anga bwatendile. Vwazi, mulole ku kiziki kyabezaga akwiyombeka. 7 Endazi lubilo, nu mubule beigisibwa bage bunee: ‘Ayukizibwe kutuka ku bakuzi; alinga kumutanga kwenda ku Galilaya; kuko u kumwamumoneko;’ bubo u bunamubwide.” 8 Basasizie kutuka ku nsinda na boba gamozi na mbogimbogi nnene, nu basasizie kwenda kukengelezia beigisibwa bage. 9 Nu Yesu akulumanine nabo, nu atendile bunee: “Samba!” Nu bamukundile, nu bamukatile ku masindi, nu bamukumbaminne. 10 Yesu ababwide bunee: “Tamukue boba; endazi, mubule mibuto zane buno bende ku Galilaya, kuko u kubammoneko.”
Balangi Bakusambala Musagu wa Kuyuka kwa Yesu
11 Gababezaga bese benda, balangi bamozi beingide mu mwino, nu basambalide basankoga banene bunsania bwabedeko. 12 Nu gabakundamenne na bakulu, bakalile lwango, bakasile bakoloboyo balangaga nsinda bikulo byingi. 13 Bababwide bunee: “Mutende buno gatwabezaga twiyombeka ku tulo, beigisibwa bage bavule mu kindi nu beibile kitumba kya Yesu. 14 Nu ndi mukota ongwa ku bubo, iswe twatendane nage bukebuke, buno munavwa kuba na mulondo.” 15 Babo bakoloboyo bakatile bikulo, nu bakitile anga bubatendilwe, nu musagu wono wakukile munkatini mwa baYuda aaba nu kano kaluma.
Yesu Akumonekako na Beigisibwa Bage ku Galilaya
16 Babo beigisibwa ikumi n'umozi bendile ku Galilaya, ku mwiduko wozo wababwide Yesu. 17 Nu gabamumonineko, bamukumbaminne; tondo bango babede na myango. 18 Nu Yesu abavwilide, ababwide bunee: “Nakasilwe bwangato bunsania bwa meigulu nu bwa ga kisi. 19 Ku bubo endazi mukite baBilongo bansania kuba beigisibwa, nu kubatutika mu izina lya Tata, nu lya Mwana, nu lya Muuza Wasililila. 20 Nu kubeigisia kukatizia bunsania bunamukakizizie; nu ungwililazi, nabe gamozi n'inyu bindi binsania, aaba nu kuzinda kwa kisi.”