Kuyuka kwa Yesu Kutuka ku Bakuzi
16
1 Gatingile Busi bwa Kumunwa, u Sabato, Maria Magadala, nu Maria nina wa Yakobo, nu Salome bakunzile bulago buno bende kubongia kitumba kya Yesu. 2 Nu ku mukelo nunse mu busi butangi bw'izinga, bendile ku nsinda, gasanukile kisongo kya busi. 3 Batendenne bwabobwabo bunee: “Nazi watutikizye ikozi ku mwingilo wa nsinda?” 4 Nu gabalolile, bamonine ku ikozi, lyabezaga inene nunse, lyasila kutukibwa. 5 Beingide mu nsinda; bamonine ku musikila, abezaga eikala gansi ku lulenge lwa kwidume, abezaga avwala nsulu zenga, nu bangamine. 6 Abatendile bunee: “Tamwangame; mukulonda Yesu wa Nazareti watakilwe ku musalaba: es'ayuka kutuka ku bakuzi, nteli gano. Lolazi ku kiziki kibamubikagileko. 7 Tondo endazi, musambalile beigisibwa bage, nu Petro bunee: ‘Yesu alinga kumutanga ku Galilaya; kuko u kumwamumoneko anga bwamutendile.’” 8 Batukile nu beitumine lubilo kutuka ku nsinda, kubuno bagiliminne nu bangamine nu tabatendile kampa ku muntu wampa, kubuno bakuaga boba.
Yesu Eidolesizie ku Maria wa Magadala
9 Gayukile Yesu kutuka ku bakuzi, mu nindunindu busi butangi bw'izinga, alingile kumonekako na Maria Magadala, wozo watikagia basumbu mutubakamo. 10 Wozo endile nu asambalide babo babezaga gamozi nage nu babezaga na kabebe nu balilaga bubibu. 11 Gabongule buno Yesu eli na kalamo, nu amumonako, tabakatizizie.
Yesu Amonekileko na Beigisibwa Babili
12 Kusila kwa bubo, amonekileko na bango bantu babili ku babo na kingo kilungi babezaga mu nzila za kwenda ku ungo mwino mukeke. 13 Basubizie nu basambalide bango, tondo tababakatizizie.
Yesu Eidolesizie ku Beigisibwa Ikumi n'umozi
14 Nu kusila kwa bubo, amonekileko na babo ikumi n'umozi gabaliaga; nu abazugide ku kabamba ka kutakatizia kwabo nu ku bubibu bwa mitima zabo, kubuno tabakatizizie babo bamumonineko gaayukaga kutuka ku bakuzi. 15 Kusila, abatendile bunee: “Endazi mu kisi kinsania nu musambale Musagu Musoga ku kibumbwa na kibumbwa. 16 Wozo wakatizia nu kututikwa nti onibwa; tondo utakatizia nti akasungibwa. 17 Lolazi tulolesio tutuno twayangane na babo bakukatizia ku izina lyane, batikye basumbu; batende ku ingo mitendezi; 18 bakakata ku nzoka nu ndi banua buganga, nti tabwabakite kampa; bakabika maboko gantata ga basambi nu basambi bakona.”
Yesu Asubya Kwigulu