MISAKO
Muuza Wasililila Alagilwe ku Basingwa
1
1 Kuli Teofilo, Mu mukanda wono mutangi nasambede binsania byakitile Yesu nu byeigisagia ku kulinga, 2 aaba nu ku busi bwekilwe kwigulu. Lwabusio lwa kwekwa kwage kwigulu, eigisagia mu magala ma Muuza Wasililila ku bantu basombwede anga basingwa bage. 3 Kumbusa kwa lukuo lwage, eidolesizie kubeli ku tulolesio twingi buno eli mulami: ku bindi makumi manazi ababaside nu abeigisizie bitondo bya Bukota bwa Kalaga. 4 Busi bumozi gaabezaga akulia gamozi nabo, abakakizizie ikakizio lilino: “Tamwende bulazi na Yerusalema tondo mulindile idagano lya Tatane u lukaso lunamulagile. 5 Kubuno Yoana atutikile na mazi, tondo kusila kwa bindi bikeke mwatutikilwe nu Muuza Wasililila.”
Yesu Akwekwa Kwigulu
6 Babo babezaga bakundamana bwigi na Yesu bamubuzagia bunee: “Mukota, ndi nkungu zeno u ziukusubizia baIsraeli bukota bwabo?” 7 Yesu abwide bunee: “Tabuli bweinyu bwa kumenya nkungu aba nkiko kubuno Tatane abilongekile ku lwango lwage wenyene. 8 Tondo mukakaswa magala nkungu zikamubasila Muuza Wasililila. Mukaba balongeki bane mu Yerusalema, nu mu biziki binsania bya Yudea nu bya Samaria, aaba nu kubasa kuzinda kwa ndenge insania za kisi.” 9 Gaasilile kutenda bibyo bitondo, Yesu ekilwe kwigulu nu gabamulolaga, kimpa kyamubisile nu tabamumonineko lingo.
10 Gababezaga beki balola kwigulu ku kwenda Yesu, kitangalabesi bantu babili babezaga bavwala nsulu zenga bababaside, 11 nu babatendile bunee: “Bantu ba Galilaya, kubuni mwasigala gago mukugalamina kwigulu? Wono Yesu wekwa kutuka munkatini mweinyu nu kwenda kwigulu, akasubya lingo mu lulo lukita lumwamumonako akwenda mulo.”
Mupieni wa Yuda
12 Beigisibwa basubizie ku Yerusalema kutuka ku mwiduko wamanagwa Mizeituni. Wozo mwiduko guli bwigi na mwino, anga kilometre kimozi. 13 Nu gababasile ku Yerusalema babakamine ku busio bwa kwigulu bwa numba mubabezaga bakwikala. Kwabezaga Petro, Yoana, Yakobo, nu Andrea, Filipo, nu Toma Bartolomayo nu Matayo, Yakobo mwana wa Alfayo, Simoni Zelote, nu Yuda mwana wa Yakobo. 14 Bansania bakundamenne gamozi busi na busi kusega, gamozi na bakikulu nu Maria, nina wa Yesu, nu gamozi na bato bage.
15 Busi bumozi bwabezaga bakatizia bakundamana, babezaga bwigi na lukama nu makumi mabili, Petro emanukile munkatini mwabo nu atendile bunee: 16 “Bamulume, mibuto zane bwatunganana masanzo mazindilizibwe bwatendile Muuza Wasililila ku kanua ka Davidi atendile ku kabamba ka Yuda, wabezaga musondelezia wa babo bakatile Yesu. 17 Yuda abezaga umozi wa kibombo kyeitu nu akatile kibe kya mulimo weitu.”
18 (Akunzile isoa na bikulo bibamuligaga ku bubi bwage, nu agwede bukukama, nda zage zatikile nu bya munda byage byabalagenne. 19 Bantu bansania ba mu Yerusalema bongule kubo, nu ku bubo, isoa lilyo lyamaninwe mu mutendezi wabo bunee: “Akeldama,” bwisulilwa buli bunee: “Isoa lya mikila”).
20 “Nu bwasanzilwe mu mukanda wa Nimbo bunee:
‘Numba zage zabe bulia,
Nu ungo nteikale muzo.’ a
Nu bwasanzilwe lingo bunee:
‘Ungo akate mulimo wage.’ b
21 Bwatunganana buno muntu umozi agomie n'iswe kuba mulongeki wa kuyuka kwa Mukota Yesu kutuka ku bakuzi. Muntu wozo atunganana kuba umozi wa ku babo batwendaga nabo nkungu insania zatabangaga Mukota Yesu na beiswe, 22 kutukila nkungu zatutikilwe na Yoana aaba nu ku busi bwekilwe kwigulu.” 23 Nu basombwede bantu babili: Yosefu wamanagwa Barisaba aba Yusto nu Matia. 24 Kusila, bansania basegile gamozi bunee: “Mukota, wizi mitima za bansania, tulolesie umozi u wasombwede gasamba babano bamulume babili, 25 wa kusigala ga kiziki kya Yuda mu mulimo wa busingwa wasigile nu kuyanga kiziki kyage.” 26 Beisile mbale ku kusombola umozi nu Matia alasile, kusila aganzilwe gamozi na beigisibwa ikumi n'umozi.