BAROMA
Kusambizania
1
1 Paulo, mukiti wa Yesu Kristo, wamaninwe buno abe musingwa, nu wasombwedwe buno asambale Musagu Musoga wa Kalaga; 2 wono Musagu Musoga, Kalaga agulagile mu tunua twa balengania bage mu Masanzo Masililila; 3 guli musagu wa Mwana wage wabutilwe mu kikanga kya Davidi, ku lukita lwa mubili, 4 walolesizibwe kuba Mwana wa Kalaga na magala ku lukita lwa Muuza wa bulili, ku iyukilo lya kutuka ku bakuzi, Yesu Kristo Mukota weitu; 5 mweli twakatile mponga nu busingwa buno ku izina lyage, baBilongo bansania balusibwe ku lwanzo lwa bukatizio, 6 munkatini mwa babo nu inyuwe muli bamaninwe na Yesu Kristo. 7 Ku bansania beli ku Roma, batundwa ba Kalaga bamaninwe kuba baswagibwa ku lutundo lwa Kalaga, mponga nu bubobelelo bibe kumuli kutuka ku Kalaga Tateiswe nu ku Mukota Yesu Kristo. Paulo Akwiyanina Kwenda Kumona ku BaKristo ba ku Roma
8 Kulinga, nkusima tanga Kalaga wane mu Yesu Kristo ku kabamba keinyu bansania, kubuno bukatizio bweinyu bukulumbibwa mu kisi kinsania. 9 Kalaga, u nkukitila mu mutima wane mu Musagu Musoga wa Mwana wage, eli mulongeki wane nu nsikukutwa kumukengela, 10 bindi binsania mu masego mane. Nkusega umpanga buno, ku lutundo lwa Kalaga, nzila zikandulwe buno nibase kumuli. 11 Kubuno nkutunda nunse kumumonako buno nimukase lukaso lumozi lwa muuza buno mulinde, 12 aba lingo buno tulindaniazi gamozi bweitubweitu na bukatizio bumozi bweinyu nu bwane.
13 Tondo mibuto zane, nsikuziga mwiba wono musagu, buno mambizi meingi nakengede kuvwa kweinyu; buno nibe na biguma munkatini mweinyu, anga bundi nabyo mu bango babilongo, tondo nabigenwe aaba nu kano kaluma. 14 Natunganana kwenda ku bantu bansania, ku baGriki nu ku batakatizia, ku beli na menge nu ku beteli na menge. 15 Ku bubuno, nili na lutundo nunse kumusambalila lingo Musagu Musoga, inyuwe beli ku Roma.
Magala ma Musagu Musoga
16 Kubuno nsili na nsoni ku Musagu Musoga: guli magala ma Kalaga ku lonio lwa unsania wakatizia; ku baYuda tanga, nu lingo ku baGriki, 17 kubuno mugo kwisanana kwa Kalaga kukumonekako kutukila bukatizio aaba nu ku bukatizio; anga bwasanzilwe bunee: “Wisanana akalama ku bukatizio.” a
Bantu Beli Bagi
18 Bongoa bwa Kalaga bukumonekako kutuka mwigulu ku kabamba ka bwagi bunsania nu bubi bunsania bwa bantu babo bakubigia bulili na bubi bwabo. 19 Kubuno bitondo bya Kalaga binavwama kumenyininwa byalolesizibwe kubeli, Kalaga abalolesizie byo. 20 Kubuno bitondo bya Kalaga bitakumonekako, magala mage matanakuzinda nu bukalaga bwage, bikumonekako kutukila kubumbwa kwa kisi, bikumenyininwa ku milimo zage. Tabeli na kusigililwa. 21 Kubuno gabamenyine Kalaga, tabamuganwine anga Kalaga, nu tabamusimine; tondo beizimizizie mu makengelo mabo ma buliabulia nu mitima zabo za bukongolo zabikilwe kapilo. 22 Mu kwitenda buno beli na menge, babede bikongolo; 23 nu bagalukizye lutanuno lwa Kalaga utanakubiga ku bisusania bya lukita lwa muntu wabiga, nu lwa tuzoni, nu lwa nyama za magulu manazi, nu lwa bikugelegeta.
24 Ku kabamba kako, Kalaga abasigile mu bitondo bya nsese, anga ntundo za mitima zabo; nu babigizie bobenyene lwanzo lwa mibili zabo; 25 bo bagalukizye bulili bwa Kalaga ku buza nu bakumbaminne nu kukitila kibumbwa ku kiziki kya Mubumbi, ukukaswa mponga zitanakuzinda. Amena!
26 Ku kabamba kako Kalaga abasigile bayange ntundo zabo nkali za nsoni: kubuno bakikulu babo bagalukizye mukitizi wa bumba ku wozo uteli wa bumba; 27 nu bamulume basigile bumba bwa bakikulu, nu batundenne bwabobwabo, bamulume ku bamulume bakitile butatunganana, nu bakataga bobenyene lukalilo lwatunganana na makitilo mabo.
28 Nu anga bubatalanganine na kumenya Kalaga, Kalaga abasigile bayange bumenyinino bwabo bwabiga buno bakite bitondo bitaswaga, 29 beiyede na lukita lunsania luteisanana lwa bubi, lwa lutundo lubi, lwa bwagi; beiyede na lugi, bwiti, nsake, bwengelezi, lusombo; 30 bagambi, bakandiki, basombi ba Kalaga, beli na kabenga, beli na lwikotio, beiganuzi, balongeki ba bitondo bibi, batakwanza babuti babo, beteli na bumenyinino, 31 beiti b'idagano, beteli na lutundo, beteli na kyombo. 32 Aba bamenyine lusungio lwa Kalaga, buno bakukita bitondo bili bubuno, batananina kukua, ta buno umpanga bakubikita, tondo lingo buno bakwitabizia babo bakubikita.