Lusungio lwa Kalaga
2
1 Uwe muntu, aba ndi uli nazi, uwe ukusungia, umpanga ntunasigililwa, kubuno gokusungia bango, ukwisungia uwenyene, kubuno uwe ukusungia, ukukita bumozi nage. 2 Tondo twizi buno lusungio lwa Kalaga ku babo bakukita bitondo bibino, luli lwa bulili. 3 Nu uwe muntu ukusungia babo bakukita bitondo bibino, nu ukubikita uwenyene, ndi ukukengela buno ukeibembukya na lusungio lwa Kalaga? 4 Aba ukubenga bugumi bwa mponga zage, bwa nkiki zage nu bwa kwikalila kwage, ntukumenya buno mponga za Kalaga zikukusondelezia ku kwiyania? 5 Tondo, ku bubibu bwobe nu ku mutima wobe ukwikokomezia mu bwagi, ukwibikila bongoa ku busi bwa bongoa nu kukulolesibwa kwa lusungio lwisanana lwa Kalaga, 6 ukaliga muntu na muntu anga buli makitilo mage; 7 ku babo beli na komanizia ku kukita busoga, bakulonda lutanuno nu lwanzo nu kutabiga, akubakasa kalamo katanakuzinda; 8 tondo ku mitima zitakwanza bulili nu bakwanza buteisanana, bakamona ku bongoa nu kasungu ka Kalaga. 9 Tubebe nu mbabazio ku muntu na muntu ukukitaga bubi, kulinga tanga ku baYuda, kusila ku baGriki! 10 Tondo lutanuno, na lwanzo nu bubobelelo ku muntu na muntu ukukitaga busoga, kulinga ku baYuda, kusila ku baGriki! 11 Kubuno lwabusio lwa Kalaga takuli kukutibwa kwa muntu wampa. 12 Kubuno bansania bagile kuteli mulembe bakazimina kuteli mulembe, nu bansania bagile mu mulembe bakasungibwa ku mulembe. 13 Kubuno ta babo bakungwilila mulembe u beisanana lwabusio lwa Kalaga, tondo babo bakuguyanga u bakaba beisanana. 14 Kubuno baBilongo beteli na mulembe gabakukita ku bumba bwabo bitondo bili mu mulembe, babano beteli na mulembe beseli mulembe ku bobenyene. 15 Bakulolesia buno makitilo ma mulembe masanzilwe mu mitima zabo, kalenganio kabo kakubalongekela, nu makengelo mabo makubabigia aba bakwibingia nkungu na nkungu. 16 U bukaba ku busi bubo bukasungia Kalaga misako za bantu zibakitaga ku lumbisombiso anga ku Musagu Musoga wane, mu Yesu Kristo. BaYuda nu Mulembe
17 Tondo ndi ukumanwa muYuda, ukulemanina mulembe, ukwikaka mu Kalaga, 18 wizi lutundo lwage, ukwitabizia bitondo bisoga, nu ukwigisibwa na mulembe; 19 uwe wizi lebelebe buno uli musondelezia wa byuku, kyengi kya babo beli mu kapilo, 20 musunguzi wa bikongolo, musozi wa bana, kubuno mu mulembe uli na lukita lwa menge nu lwa bulili; 21 Umpanga uwe ukwigisia bango, ntukwiyigisia uwenyene: Uwe ukusambala buno takwibwe, ukwiba: 22 Uwe ukutenda buno takukitwe butazi, ukukita butazi: Uwe ukusomba nkisi ukwiba bili mu numba za kukumbamina nkisi: 23 Uwe ukwikaka mu mulembe, ukubenga Kalaga mu kukagula mulembe. 24 Kubuno izina lya Kalaga likulingwa munkatini mwa baBilongo ku kabamba keinyu, anga bwasanzilwe. a 25 Kubuno kumonesibwa kuli mutali ndi ukukita na mulembe, tondo ndi uli mukaguzi wa mulembe nti kumonesibwa kwobe kuseli anga kutamonesibwa. 26 Umpanga ndi wozo utamonesibwa akukita makakizio ma mulembe, ndi kutamonesibwa kwage takunakatizibwa kuba kumonesibwa? 27 Nu uwe utamonesibwa ku bumba nu ukukokomezia mulembe, ndi ntakusungie uwe uli na masanzo ma mulembe nu wamonesibwa, tondo ukukagula mulembe: 28 Kubuno wozo uteli muYuda ndi eli muYuda ku mubili tugu, nu kuko takuli kumonesibwa ndi kuli kumonesibwa ku mubili tugu. 29 Tondo muYuda, u wozo uli muYuda munda; nu kumonesibwa kuli kwa mutima mu Muuza, ta ku isanzo; nu luganuno lwa wozo muYuda talukutuka ku bantu, tondo ku Kalaga.