3
1 Umpanga mutali mukizi wa kuba muYuda, aba kumonesibwa kuli na mutali mukizi? 2 Kuli mutali nunse ku nzila insania, kulinga tanga buno bakasilwe bitondo bya Kalaga. 3 Umpanga buni: ndi bamozi tabakatizizie, ndi kutakatizia kwabo kunatikya kwisanana kwa Kalaga? 4 Kilo, aba nunse: Tondo Kalaga amenywe buno eli wa bulili, nu na muntu na muntu buno eli muza, anga bwasanzilwe bunee: “Umenywe buno uli wisanana mu bitondo byobe, nu ukinde gokusungibwa.” a 5 Tondo ndi bubi bweitu bukulolesia kwisanana kwa Kalaga, tutende buni? Ndi Kalaga nteisanana gaakutusungia? (Nkutenda ku lukita lwa bantu). 6 Kilo, aba nunse: Ndi ta bubo, buni bunavwamine Kalaga kusungia kisi? 7 Nu ndi ku kabamba ka buza bwane, bulili bwa Kalaga bwamoneka nunse nu lutanuno lwage lwitila, kubuni nnenyene nikili nasungibwa anga mwagi? 8 “Nu kubuni tatunakitile bubi buno busoga buvwe,” anga bukutukandika bango bantu, bakwidindika kutenda buno bubo u butukutenda. Lusungio lwa babo bantu luli lwisanana.
Takuli Muntu Wampa Wisanana
9 Umpanga, kikizi? Ndi tuli basoga kutinga bango? Kilo aba nunse. Kubuno twasilile kalazi kulolesia baYuda nu baGriki bansania beli kunsi kwa bwangato bwa bwagi. 10 Anga bwasanzilwe bunee:
“Takuli muntu wampa wisanana, aba umozi,
11 Takuli muntu ukumenyinina,
Takuli muntu wampa ukulonda Kalaga;
Bansania bakule kiti, bansania babigile;
12 Takuli muntu wampa ukukita busoga, aba umozi, b
13 Myego zabo zili nsinda zili bwasi; c
Ku ndami zabo bakwengelela; d
Lulalo lwa nzoka luli kunsi kwa milomo zabo,
14 Tunua twabo twizile na biswililo nu mbabazio; e
15 Beli na magulu masasia ku kukubula mikila;
16 Kubigia nu tubebe bili mu nzila zabo;
17 Tabeizi nzila za bubobelelo; f
18 Takuli kukua Kalaga boba.” g
19 Nu twizi buno, binsania bikutenda mulembe, bikutendwa ku babo beli mu mulembe buno kanua na kanua kalimbwe, nu kisi kinsania kimenye buno kili na bwagi lwabusio lwa Kalaga. 20 Kubuno takuli muntu wampa ukeisanana lwabusio lwage ku makitilo ma mulembe, tondo ku mulembe u kukuvwa bumenyinino bwa bwagi.
Kwisanana mu Bukatizio Kuli mu Kristo
21 Tondo kano kaluma, kwisanana kwa Kalaga kwamenyininwa geteli mulembe, nu balengania beli balongeki ba kuko kwisanana, 22 kwisanana kwa Kalaga ku bukatizio mu Yesu Kristo ku bansania bakukatizia. Takuli kwengukana. 23 Kubuno bansania bagile nu bakwidaga lutanuno lwa Kalaga; 24 nu ku mponga za Kalaga beisanana geteli bukunza, ku nzila za bukuluzi buli mu Yesu Kristo. 25 U wozo wabikilwe na Kalaga buno mu mikila zage abe kisansa kya kukulumania, ku babo bakukatizia, buno alolesie kwisanana kwage, kubuno ntasungizie bwagi bwakitilwe wakalazi, mu nkungu zage za kwikalila; 26 akulolesia kwisanana kwage mu nkungu zeno, buno abe wisanana nu kwisanania wozo uli na bukatizio mu Yesu.
27 Umpanga, kwikaka kuli kuni lingo? Kwatikizibwe. Ku mulembe mukizi? Ku mulembe wa makitilo? Kilo, tondo ku mulembe wa bukatizio. 28 Kubuno tukukengela buno muntu akwisanana ku bukatizio, geteli makitilo ma mulembe. 29 Aba ndi Kalaga eli wa baYuda tugu? Ndi nteli wa baBilongo nu bo? Ee, eli nu wa baBilongo, 30 kubuno kuli tugu Kalaga umozi ukeisanania bamonesizibwe ku bukatizio, nu batamonesizibwe ku bukatizio, 31 umpanga ndi tukutikya bunene bwa mulembe ku bukatizio? Kilo, aba nunse! Tondo tukulindia mulembe.