Kalolesio ka Abrahamu
4
1 Umpanga tutende buni ku Abrahamu, tateiswe ku lukita lwa mubili, amonine kikizi? 2 Ndi Abrahamu abede wisanana ku makitilo mage, nti aneikaka, tondo ta lwabusio lwa Kalaga. 3 Kubuno Masanzo makutenda buni? Abrahamu akatizizie Kalaga, nu ku bubo abede wisanana. a 4 Tondo ku muntu ukukita mulimo, lukalilo lwage talukuganzwa anga mponga, tondo anga nsombi; 5 nu ku wozo muntu utakukita mulimo, tondo akukatizia Kalaga ukwisanania mwagi, bukatizio bwage bwamubikile wisanana. 6 Anga bukutenda Davidi buno mbogimbogi ku (za) muntu wozo ukubikwa na Kalaga buno eisanana kuteli makitilo: 7 “Mbogimbogi ku babo basigililwe mibi zabo,
Nu bwagi bwabo bwakukilwa!
8 Mbogimbogi ku muntu wozo utakuganzilwa bwagi
bwampa na Mukota!” b
9 Ndi mbogimbogi zeno zili tugu ku babo bamonesizibwe? Aba kubatamonesizibwe nu bo? Kubuno tukutenda buno bukatizio bwabikile Abrahamu kuba wisanana. c 10 Umpanga, buni bwabede wisanana? Ndi gaabezaga es'amonesibwa, aba ndi gaabezaga ntemonesibwa? Ntabezaga amonesibwa, abezaga eikili utamonesibwa. 11 Nu akatile kakengelezio ka kumonesibwa, anga kalolesio ka kwisanana kaakatile ku bukatizio gaabezaga ntemonesibwa, buno abe isi wa batamonesibwa bansania bakukatizia, buno babe nu bo beisanana, 12 nu eli lingo isi wa bamonesibwa, ta buno bamonesibwa umpanga tondo bakutabanga mu binyantilo bya bukatizio bwa tateiswe Abrahamu, bwabezaga nabo gaabezaga ntemonesibwa.
Idagano lya Kalaga Likukatwa ku Bukatizio
13 Kubuno, ta ku mulembe ukinsa bupieni bwa kisi bwabede idagano ku Abrahamu aba ku kibuti kyage, tondo ku kwisanana mu bukatizio. 14 Kubuno ndi bantu beli mu mulembe u beli bapieni, kasi, bukatizio nti buli buliabulia, nu idagano nti lyagaluka. 15 Kubuno mulembe u gukulusia bongoa nu gago geteli mulembe nti takuli kukagulwa kwa mulembe.
16 Ububo, idagano lyakitilwe ku kabamba ka bukatizio, buno libe ku mponga nu likokomene ku kibuti kinsania kya Abrahamu, ta ku babo tugu bakwanza mulembe tondo lingo ku babo beli ba bukatizio bwa Abrahamu. Eli tateiswe, beiswe bansania, anga bwasanzilwe bunee: 17 “Nakubikile isi wa bilongo byingi.” Eli tateiswe lwabusio lwa Kalaga, u wozo wakatizizie, ukukasana kalamo ku bakuzi nu ukumana bintu biteli anga buno byabede. d
18 Ku nkungu zitabezaga kilemanizio Abrahamu akatizizie mu kilemanizio buno abe isi wa bilongo byingi anga bubo bwatendilwe bunee: “Ububo bukaba kibuti kyobe.” e 19 Nu ntabezaga atamba mu bukatizio, amonine buno mubili wage use wakunguka, kubuno abezaga eseli bwigi na myaka lukama, nu Sara ntabezaga lingo mu lukita lwa kubuta bana. 20 Ku kabamba k'idagano lya Kalaga, ntazangilezangile ku kutakatizia; tondo alindile mu bukatizio, nu akasile Kalaga lutanuno, 21 nu amenyine lebelebe buno Kalaga anavwama kukita bubo bwasilile kulaga. 22 Ku bubo abede wisanana. 23 Tondo ta ku kabamba kage wenyene u kwasanzidwe buno bubo, bube kweli. 24 Tondo lingo ku kabamba keitu, iswe bakuganzwa buno beisanana, iswe bakukatizia wozo wayukizie Yesu, Mukota weitu, kutuka ku bakuzi, 25 wakasenwe ku kabamba ka bwagi bweitu, nu ayukizibwe buno twisanane.