Kuba na Bubobelelo na Kalaga
5
1 Umpanga ndi twasila kuba beisanana ku bukatizio, nti tuli na bubobelelo gamozi na Kalaga mu Mukota weitu, Yesu Kristo, 2 mweli twakasilwe bwangato bwa bukatizio mu mponga zeno zitwemenne muzo nu tukubogaboga mu kilemanizio kya lutanuno lwa Kalaga. 3 Nu lingo, tukubogaboga aba nu mu nsungio, nu twizi buno lusungio lukulusia nkiki, 4 nu nkiki zikulusia kukokomena mu idindiko, nu kukokomena kukulusia kilemanizio. 5 Nu kilemanizio takili na nsoni, kubuno lutundo lwa Kalaga lwabalanganizibwe mu mitima zeitu mu Muuza Wasililila u twakasilwe. 6 Kubuno, gatwabezaga tatuli na magala nu gakukile nkungu, Kristo akule ku kabamba ka bagi? 7 Kubuno buli bubibu muntu kukwila muntu wisanana, tondo bunakulungana muntu kulindika kukwila muntu uli musoga. 8 Tondo Kalaga akulolesia lutundo lwage kutuli, buno gatwabezaga tukili bagi, Kristo akule ku kabamba keitu. 9 Umpanga kwitila nunse, kano kaluma ndi twasila kuba beisanana mu mikila zage, mweli tukonibwa ku bongoa. 10 Kubuno, ndi gatwabezaga beiti, twakulumanizibwe na Kalaga ku lukuo lwa Mwana wage, kwitila nunse, gatwakulumanizibwe, tukonibwa mu kalamo kage; 11 aba ta bubo tugu, tondo lingo tukubogaboga mu Kalaga ku Mukota weitu Yesu Kristo, kano kaluma mweli twabede n'ikulumanino.
Adamu nu Kristo
12 Ku bubuno, anga ku muntu umozi, bwagi bwingide mu kisi, nu ku kabamba ka bwagi lukuo, bubo lukuo lwabasile ku bantu bansania, kubuno bansania bagile; 13 kubuno bwagi bwabezaga mu kisi lwabusio lwa mulembe. Tondo bwagi tabunabede songo mulembe tagubezageko. 14 Tondo lukuo lwangatile kutukila ku Adamu aaba nu kubasa ku Musa, aaba nu ku babo batagile ku lukita lwa kukagula mulembe anga Adamu, uli kisusania kya wozo ukavwa.
15 Tondo lukaso lulo lwa mponga talwabezaga anga bubo bwagi, kubuno ndi ku bwagi bwa muntu umozi bantu beingi bakule, kwitila nunse mponga za Kalaga nu lukaso ku mponga za muntu umozi Yesu Kristo, lwitide ku bantu beingi. 16 Nu takuli lukaso luli anga lulo lwavule ku muntu umozi wagile; kubuno kusila kwa kukita bwagi bumozi, lusungio lwalusizie lubabazio tondo lukaso lwa mponga lwalusizie kwisanana kumbusa kwa bwagi bwingi. 17 Ndi ku bwagi bwa muntu umozi lukuo lwangatile ku kabamba ka wozo muntu wenyene, kwitila nunse babo bakukata mponga ningi nu lukaso lwa kwisanana bakangata mu kalamo mu wozo umozi, Yesu Kristo.
18 Umpanga, anga ku bwagi bumozi, lusungio lwabede ku bantu bansania, u bubo ku ikitilo limozi lisanana, kwisanana kukukasana kalamo kukukuka ku bantu bansania. 19 Kubuno, anga ku kutanza kwa muntu umozi bantu beingi bakitilwe bagi, u bubo nu bo, ku kwanza kwa muntu umozi, bantu beingi bakabikwa beisanana.