Bakuzi ku Bwagi Tondo Balami mu Kristo
6
1 Umpanga tutende buni? Ndi twatunganana kulama mu bwagi buno mponga zibe ningi? 2 Kilo, aba nunse! Beiswe beli bakuzi ku bwagi, buni butunalama lingo mu bwagi? 3 Ndi tamukumenya buno beiswe bansania twatutikilwe mu Kristo Yesu, mu lukuo lwage u mu twatutikilwe: 4 Umpanga, twayikilwe gamozi nage ku lututiko mu lukuo lwage, buno anga bwayukile Kristo kutuka ku bakuzi ku lutanuno lw'Isi, u bubo nu iswe tutabangazi mu kalamo kato.
5 Kubuno ndi tuseli gamozi nage mu kisusania kya lukuo lwage, twabe lingo bubo mu kisusania kya kuyuka kwage, 6 nu twizi buno muntu weitu wa bumba bukulu bwatakilwe ku musalaba buno tabube lingo na magala nu tatube lingo bakobe ba bwagi; 7 kubuno wozo wakua nti akandulwa ku bwagi.
8 Tondo ndi twakule gamozi na Kristo, tukukatizia buno twalame lingo gamozi nage, 9 nu twizi buno Kristo ayukile kutuka ku bakuzi ntanakua lingo; lukuo taluli lingo na bwangato kweli. 10 Kubuno kuko kukua kwage akwilide bwagi limbizi limozi tugu; tondo kuko kulama kwage akulama ku Kalaga. 11 Ububo nu inyuwe mwiganze anga bakuzi ku bwagi, nu anga balami ku Kalaga, mu Yesu Kristo.
12 Umpanga, tamuzige bwagi kwangata lingo mu mibili zeinyu za lukuo buno mwanze ntundo zabo; 13 tamukasane biganza byeinyu kuba bintu bya kukita buteisanana ku bwagi; tondo mwikasane mubenyene ku Kalaga, anga beli balami kutuka ku bakuzi, nu mukasane biganza byeinyu ku Kalaga kuba bya kukita bwisanana. 14 Kubuno bwagi tabukamwangata lingo, kubuno tamuli kunsi kwa mulembe, tondo muli kunsi kwa mponga.
Bakobe ba Kwisanana
15 Umpanga kikizi? Ndi tukite bwagi kubuno tatuli kunsi kwa mulembe, tondo kunsi kwa mponga? Kilo, aba nunse! 16 Ndi tamwizi buno wozo u mwikasane kweli kuba bakobe bage ba kumwanza museli bakobe ba wozo u mukwanzaga aba ndi muli bakobe ba bwagi bukulusagia lukuo aba ndi muli bakobe ba kwanza kukulusagia kwisanana? 17 Tondo Kalaga aganunwe, kubuno mwabezaga bakobe ba bwagi, tondo mwanzile ku mitima zeinyu lulo lukita lwa meigisia mamwigisizibwe mumo. 18 Nu gamwasilile kukandulwa ku bwagi, museli bakobe ba kwisanana. 19 Nkutenda ku lukita lwa bantu, ku kabamba ka mutambo wa bumba bwa mibili zeinyu. U bubo lingo buno bumwakasenne biganza byeinyu kuba bakobe ku nsese nu ku bubi buno mulame mu bubi, u bubo nu bo kano kaluma kasanazi biganza byeinyu kuba bakobe ba kwisanana buno mube baswagibwa. 20 Kubuno, gamwabezaga bakobe ba bwagi, mwabezaga bakandulwa ku kwisanana. 21 Umpanga mutali mukizi u mwamonine lino ku bibyo bindi ku bitondo bimuli nabyo nsoni kano kaluma? Kubuno kuzinda kwa bitondo bibino kuli lukuo. 22 Tondo kano kaluma, gamwasila kukandulwa ku bwagi nu kuba bakobe ba Kalaga, mutali u muli nago, u kuswagibwa nu kuzinda kwago, kalamo katanakuzinda. 23 Kubuno lukalilo lwa bwagi luli lukuo; tondo lukaso lwa Kalaga luteli na bukunza, luli kalamo katanakuzinda mu Yesu Kristo Mukota weitu.