1 BAKORINTO
- Secondary Title Cover' MUKANDA MUTANGI WA PAULO
- Secondary Title Cover' MUSINGWA KU BAKORINTO
Kusambizania
1
1 Paulo, wamaninwe buno abe musingwa wa Yesu Kristo ku kusombola kwa Kalaga, nu Sositeni, mubuto weitu, 2 ku kanisa ka Kalaga keli ku Korinto, ku babo baswagizibwe mu Yesu Kristo nu bamaninwe kuba basililila, nu ku bansania bakumana ku izina lya Mukota weitu Yesu Kristo mu kiziki na kiziki, Mukota weitu nu wabo: 3 mponga nu bubobelelo bikutukaga ku Kalaga Tateiswe, nu ku Mukota Yesu Kristo bibe kumuli. Mponga Zitwakasilwe mu Yesu Kristo
4 Nkusimaga Kalaga wane bindi binsania ku kabamba keinyu, ku kitondo kya mponga za Kalaga zimwakitilwe mu Yesu Kristo; 5 kubuno mwagumizibwe mweli mu bitondo binsania, mu moki mansania nu mu menge mansania, 6 kubuno bulongeki bwa Kristo bwakokomezizibwe nunse kumuli, 7 ububo tamwidile lukaso lwampa. Mukulindila kuvwa kwa Mukota weitu Yesu Kristo, 8 nu We amulindie aaba nu kuzinda, buno mube geteli kisimbwa mu busi bwa Mukota weitu Yesu Kristo. 9 Kalaga eli Mukatizia, We, u wamumanine ku mugomio wa Mwana wage Yesu Kristo Mukota weitu.
Paulo Akubasungula ku Myango Zabo
10 Umpanga mibuto zane, nkumusega nunse buno ku izina lya Mukota weitu Yesu Kristo, buno inyuwe bansania mutende bitondo bimozi, buno tamube na malekanuko munkatini mweinyu, tondo mugomanie mu bumenyinino bumozi nu lwango lumozi. 11 Kubuno nasambalidwe musagu weinyu, mibuto zane, na babo ba mu numba za Kloe, buno muli na myango gamusamba. 12 Umpanga nkutenda kitondo kikino, buno na muntu na muntu kumuli akutendaga buno nne nili wa Paulo, nu nne nili wa Apolo, nu nne nili wa Kefa, nu nne nili wa Kristo. 13 Ndi Kristo abeganibwa? Aba ndi Paulo akule ku musalaba ku kabamba keinyu? Aba ndi mwatutikilwe ku izina lya Paulo?
14 Nkuganuna Kalaga ku bubo nsyatutikile muntu wampa wa kumuli, umpanga Krispo nu Gayo; 15 buno muntu wampa ntatende buno, mwatutikilwe mu izina lyane. 16 Nu lingo natutikile bantu ba kikanga kya Stefano; gantata ga babano, nsizi ndi natutikile lingo ungo muntu. 17 Kubuno Kristo ntansingile kututika, tondo kusambala Musagu Musoga; ta na menge aba na moki ma muntu, buno musalaba wa Kristo ta ube buliabulia.
Menge ma Bantu Meli Bukongolo ku Kalaga
18 Kubuno kusambala Musagu wa musalaba kuli bukongolo ku babo bazimina, tondo ku beiswe bonezibwe kuli magala ma Kalaga. 19 Kubuno bwasanzilwe bunee:
“Nkabigia menge ma beiya menge,
Nu nkakita bumenyinino bwa beiya bumenyinino
kuba buliabulia.” a
20 Kuni kuli mwiya menge? Kuni kuli musanzi? Kuni kuli mwiya myango mu zeno nkiko?
21 Kubuno kisi gamozi na menge makyo, takyamenyine Kalaga, ububo Kalaga, mu menge mage, atananizibwe konia babo bakatizia ku bukongolo bwa kusambala. 22 Kubuno baYuda bakulondaga migeleko, nu baYunani bakulondaga menge: 23 tondo beiswe tukusambala musagu wa Kristo witilwe ku musalaba, We eli ikitano ku baYuda, nu ku baBilongo eli bukongolo; 24 tondo ku babo bamaninwe, aba baYuda, aba baYunani, Kristo eli magala ma Kalaga, nu menge ma Kalaga. 25 Kubuno bukongolo bwa Kalaga buli na menge nunse kutinga menge ma bantu; nu mutambo wa Kalaga guli na magala nunse kutinga magala ma bantu.
26 Mibuto zane kengelazi bumwamaninwe, buno ta beingi kumuli u beli na menge ma kisi, ta beingi u beli na magala, nu ta beingi u beli na bwangato. 27 Tondo Kalaga asombwede bikongolo bya kisi kikino kwitia beiya menge na nsoni; 28 nu Kalaga asombwede batamba ba kisi kikino, kwitia beiya magala na nsoni; nu babo bakunyegwa nu babo beteli, buno babigie babo beli banene, 29 buno muntu unsania nteikake lwabusio lwa Kalaga. 30 Tondo ku kabamba kage, inyuwe museli mu Kristo Yesu, wakitilwe na Kalaga kuba menge, kwisanana nu kuswagibwa, nu bukuluzi kutuli, 31 buno anga bwasanzilwe bunee: “Wozo ukwikaka, nti eikaka mu Mukota.” b