Paulo Akusambizia BaKristo
16
1 Namusingila Foibe mubitu weitu, eli mukiti wa kanisa ka Kenkurea, 2 buno mumusekele mu Mukota weitu, anga bwatananina baswagibwa, nu nti mwamukasia mu bitondo binsania byakwiyanina kumuli, kubuno we akasizie bantu beingi nu ankasizie nu nne. 3 Munsambizie na Prisila nu Akila, bakiti banane na mulimo mu Yesu Kristo, 4 babezaga kayikayika kukua ku kabamba ka konia kalamo kane, nu nkubasima nunse, aba ta nnenyene tugu, tondo nu makanisa mansania ma baBilongo. 5 Munsambizie na kanisa keli mu numba zabo. Mwankatila samba ku Epeneto, mutundwa wane, wozo wabezaga mutangi kukatizia Yesu Kristo mu kisi kinsania kya Asia. 6 Samba ku Maria wamukitide mulimo munene. 7 Samba ku Androniko nu ku Yunia, mibuto zane za kubutwa nu bakandwa banane, bakukaswa nunse lwanzo na bantu munkatini mwa basingwa nu bo balingaga kuba mu Kristo lwabusio lwane.
8 Samba ku Ampuliato, mutundwa wane mu Mukota. 9 Samba ku Urbano, muneitu na mulimo mu Kristo. 10 Samba ku Apele, walindikilwe nu witabizizibwe mu Kristo, samba ku babo ba numba za Aristobulo. 11 Samba ku Herodio, mubuto wane. Samba ku babo ba mu numba za Narkiso beli mu Mukota. 12 Samba ku Tirifena nu ku Tirifosa, bakikulu bakukita mulimo na komanizia mu Mukota. Samba ku kilemba kyane mutundwa Persi, ungo mukikulu wikasenne nunse ku mulimo wa Mukota. 13 Samba ku Rufo, musombolwa mu Mukota, nu ku nina uli kundi mmane, nu nne: 14 samba ku Asinkristo, ku Fulego, ku Herme, ku Patroba, ku Herma, nu ku mibuto zili gamozi nabo. 15 Samba ku Filologo nu ku Yulia, ku Nereo nu ku mubitu wage, nu ku Olimpa, nu ku baswagibwa bansania beli gamozi nabo. 16 Sambizaniazi bweinyubweinyu, na mbogimbogi zasililila. Makanisa mansania ma Kristo mamusekela.
Kukengelezia Kuzinda
17 Nkumusengezia mibuto zane, buno idangazi na babo bakulusia malekanuko nu misona, nu kukita bitakulungana na meigisia mamwigisizibwe. Mwibembukye bulazi nabo. 18 Kubuno bantu beli bubo, tabakukitila Kristo Mukota weitu, tondo nda zabo bobenyene; nu ku kutenda bitondo bisoga nu bya kutananizia busoga, bakwengelela makengelo ma bantu beteli na bumenyinino. 19 Lwanzo lweinyu lwamenywa na bantu bansania; umpanga nabogaboga n'inyuwe, nu nkumutenda buno mube na menge mu misako misoga nu mube bikongolo mu misako mibi. 20 Kalaga wa bubobelelo anyante Satana yiliyili kunsi kwa magulu meinyu. Mponga za Mukota weitu Yesu zibe gamozi n'inyuwe!
21 Timoteo, munane na mulimo, amusambizia, nu Lukio, Yasoni nu Sosipateri mibuto zane za kikanga. 22 Nne Tertio, u, wasanzile mukanda wono, namusambizia mu Mukota. 23 Gayo, musekezi wane nu wa kanisa kansania amusambizia. Erasto, mulangi wa bikulo bya wozo mwino, nu Kwarto mubuto weitu bamusambizia. 24 Mponga za Mukota weitu Yesu Kristo zibe gamozi n'inyuwe bansania! Amena!
Kuganuna Kuzinda
25 Ku Kalaga unavwama kumulindia, anga Musagu Musoga u nkusambala nu busambazi bwa Yesu Kristo, kuyangana na kubisulwa kwa keinda kabisilwe kutukila wakalazi, 26 tondo kalolesibwa kano kaluma ku masanzo ma bulengania, ku ikakizio lya Kalaga uteli na kuzinda, nu kamenyinwe na baBilongo bansania buno banze bukatizio.
27 Ku Kalaga uli na menge wenyene, kube lutanuno mu Yesu Kristo ku nkiko na nkiko zitanakuzinda! Amena!