Kutananizia Munyobe nu Kuteitananizia Uwenyene
15
1 Iswe beli na magala, twatunganana kweka busosu bwa babo beteli na magala nu kutalonda kwitananizia iswe tubenyene. 2 Na muntu na muntu wa kutuli atananizie munyage ku bubo buli busoga, buno amulindie. 3 Kubuno aba Kristo ntalondile kwitananizia wenyene, tondo anga bwasanzilwe bunee: “Bilingano bya babo bakukulinga byabede gantata gane.” a 4 Kubuno binsania byalingile kusanzwa wakalazi, byasanzilwe buno bitwigisie, buno ku nkiki nu ku kubobelezia kukutuka ku Masanzo, tube na kilemanizio. 5 Kalaga wa nkiki nu wa kubobelezia amukase makengelo mamozi bweinyubweinyu kuyanga lukita lwa Yesu Kristo, 6 buno bansania gamozi na mutima umozi nu kanua kamozi, muganune Kalaga, Isi wa Mukota weitu Yesu Kristo. Musagu Musoga ku Bantu Bansania
7 Umpanga, musekelane bweinyubweinyu anga bwamusekede Kristo buno Kalaga aganunwe. 8 Kubuno nkutenda buno Kristo abede mukiti wa bamonesibwa, ku kabamba ka bulili bwa Kalaga buno azindilizie malagano makitilwe ku batateiswe, 9 nu buno baBilongo baganune Kalaga ku kabamba ka kyombo kyage, anga bwasanzilwe bunee:
“Ku kabamba kakano nkakuganuna munkatini mwa baBilongo.
Nu nkeimba ku kuganuna izina lyobe.” b
10 Nu bwabwidwe lingo bunee:
“BaBilongo, bogazibogazi gamozi na bantu bage!” c
11 Nu lingo bunee:
“Inyuwe baBilongo bansania,
Muganunazi Kalaga. Inyuwe bantu bansania,
Mumuganunazi.” d
12 Nu Isaya atendile lingo bunee:
“Mu kibuti kya Yese u mukatuka
We, ukemana buno angate baBilongo;
Mweli, baBilongo bakaba na kilemanizio.” e
13 Umpanga, Kalaga wa kilemanizio amwizazie na mbogimbogi insania nu na bubobelelo bunsania mu bukatizio buno mwitile nunse kuba na kilemanizio, ku magala ma Muuza Wasililila!
Paulo Akubasambalila bwa Mulimo Wage nu Lugendo Lwage
14 Ku kitondo kyeinyu, mibuto zane, nkukatizia nnenyene buno mwiyala na busoga, mwiyazibwa na bumenyinino bunsania, nu munavwama kusungulana bweinyubweinyu. 15 Tondo ku bimozi, namusanzide na magala nunse kumukengelezia lingo bimungule kubyo, ku kabamba ka mponga zinakitilwe na Kalaga, 16 buno nibe mukiti wa Yesu Kristo munkatini mwa baBilongo, nu nikitile Musagu Musoga wa Kalaga mulimo wa busankoga, buno baBilongo babe lukaso lwatananina nu lwaswagibwa na Muuza Wasililila. 17 Umpanga, nili na mbogimbogi nunse mu Yesu Kristo ku mulimo wane ku Kalaga. 18 Kubuno nsinageleka kusambala kitondo kyampa kitakitile Kristo mundi buno alusie baBilongo ku kwanza Kalaga, ku kutenda kwane nu ku makitilo mane, 19 ku magala ma migeleko nu ma miganogano, ku magala ma Muuza wa Kalaga; ububo kutukila ku Yerusalema nu ku bisi bya mu ntungo zage aaba nu kubasa ku Iliriko, nasambede nunse Musagu Musoga wa Kristo. 20 Nu nagelekile nunse kusambala Musagu Musoga ku biziki byabezaga bitetekulwa ku Kristo buno ninavwa kobaka ga kibanza kya ungo muntu, 21 kuyangana na bwasanzilwe bunee:
“Ku babo batasambalidwe bubo bakamona,
Nu babo batungule kwatendwa bubo, bakamenyinina.” f
Kitondo kya Lugendo Lwa Paulo Kwenda ku Roma
22 Ku bubuno nabigenwe mambizi meingi kuvwa kweinyu. 23 Tondo kano kaluma, bubo bunsili na kwampa kwa kukita mulimo mu ndenge zeno, nu kutukila myaka mingi nili na lutundo lunene lwa kuvwa kumuli, 24 nkulemanina kumumonako mu kutinga, ganende ku Spania, nu nti mwanelekezieko, kusila kwa kubogaboga n'inyuwe mu nkungu nkeke. 25 Tondo kano kaluma nenda ku Yerusalema kukitila baswagibwa kuko. 26 Kubuno bantu ba ku Makedonia nu ba ku Akaya batundile nunse kukita mukongo ku kabamba ka bazambi baswagibwa ba ku Yerusalema. 27 Lebelebe, bwabatananizizie nu babezaga na nsombi kubeli, kubuno ndi baBilongo bakasilwe mponga za Muuza anga beiswe, kasi nti bwatunganana lingo kubakasia ku bitondo bya mubili. 28 Umpanga ganasile mulimo wono nu kubakasa mitebe za mukongo wono, natinge kweinyu mu kwenda ku Spania. 29 Nizi buno ganavwe kumuli, navwe ku mbogimbogi ningi za Kristo.
30 Nkumusega, mibuto zane, buno ku Mukota weitu Yesu Kristo nu ku lutundo lwa Muuza, kwidindika gamozi na nne mu masego ku Kalaga ku kabamba kane, 31 buno nibembukibwe na babo batakatizia ba ku Yudea, nu buno bukasia buneke bwa ku Yerusalema bwitabizibwe na baswagibwa, 32 nu buno nibase kumuli na mbogimbogi, ndi luli lutundo lwa Kalaga, nu nomunwe gamozi n'inyuwe. 33 Kalaga wa bubobelelo abe gamozi n'inyuwe bansania! Amena!