Kutasungia Mubuto Wobe
14
1 Sekelazi watamba mu bukatizio, tondo tamumusungie ku makengelo mage. 2 Muntu umozi eli na bukatizio buno anavwama kulia binsania, tondo wozo ungo watamba akulia biguma tugu. 3 Wozo ukulia ntabenge wozo utakulia nu wozo utakulia ntasungie wozo ukulia kubuno Kalaga amwitabizizie. 4 Uli nazi, uwe ukusungia mukiti wa ungo muntu? Ndi emana kima, aba ndi agoa, nti bubo bukulola mukota wage. Tondo emane kima kubuno Mukota eli na bwangato bwa kumulindia. 5 Muntu umozi akwanza busi bumozi kuba busoga; ungo akumona buno bindi binsania bigezye. Ububo na muntu na muntu alinde mu bumenyinino bwage wenyene. 6 Wozo ukumona buno busi bumozi buli bunene kutinga bungo busi, akubukita ku kabamba ka Mukota; nu wozo ukulia binsania akulia ku kabamba ka Mukota, kubuno akuganuna Kalaga; nu wozo utakulia binsania nti ntakulia ku kabamba ka Mukota, we nu we akuganuna Mukota Kalaga. 7 Kubuno takuli muntu umozi wa kutuli ukulama ku kabamba kage wenyene, nu takuli muntu wampa ukukua ku kabamba kage wenyene. 8 Kubuno ndi tukulama, nti tukulama ku kabamba ka Mukota; nu ndi tukukua, nti tukukua ku kabamba ka Mukota. Umpanga ndi tukulama aba ndi tukukua, nti tuli ba Mukota Kalaga. 9 Ku bubuno Kristo akule nu alamine lingo, buno abe Mukota Kalaga wa bakuzi nu wa balami. 10 Tondo uwe, kubuni ukusungia mubuto wobe? Aba nu uwe kubuni ukubenga mubuto wobe? Kubuno iswe tubansania tukemana lwabusio lwa kisumbi kya lusungio kya Kristo. 11 Kubuno bwasanzilwe bunee:
“Anga bunili mulami, u bwatendile Mukota,
N'izu n'izu na likakomwa lwabusio lwane,
Nu na lulami na lulami na lukaganuna Kalaga.” a
12 Ububo na muntu na muntu wa kutuli na ukasambala misako zage wenyene ku Kalaga.
Ntusungie Mubuto Wobe
13 Umpanga tatusunganie lingo bweitubweitu, tondo mukengele kutakita kena kanaba ikozi lya kukikitania aba kumubikila idindiko lya kugusia mubuto wobe. 14 Nizi nu nkumenyinina nunse buno ku Mukota Yesu takuli kyampa kili na nsese mu lukita lwakyo kikinyene, nu kimozi kili nsese tugu ku wozo ukukimona buno kili nsese. 15 Ndi witia mubuto wobe na kabebe ku kabamba k'idia, nti ntukutabanga lingo mu lutundo. Ku kabamba k'idia lyobe, ntubigie muntu wozo, ku kabamba kage Kristo akule. 16 Busoga bwobe tabutekulwe ku bubi. 17 Kubuno bukota bwa Kalaga tabuli ku kulia aba ku kunua, tondo ku kwisanana, ku bubobelelo nu ku mbogimbogi mu Muuza Wasililila. 18 Wozo ukukitila Kalaga mu lukita luluno nti atananizia Kalaga nu nti akwitabizibwa na bantu. 19 Umpanga, kasi, tuyange bitondo bya bubobelelo nu binakasia bantu kubobaka. 20 Ku kabamba k'idia ntwite mulimo wa Kalaga. Lebelebe, binsania bili bisoga, tondo buli bubi ku muntu kulia kinsania kinaba ikitano ku ungo muntu. 21 Buli busoga kutalia nyama nu kutanua maku, nu kwidanga kukita bungo bunsania bunavwama kugusia mubuto wobe. 22 Bubo bukatizio buguli nabo, bulange muguli lwabusio lwa Kalaga. Mbogimbogi ku muntu wozo utakwisungia wenyene mu bwakwitabizia! 23 Tondo wozo uli na mutima wa kuzingazinga ku kabamba ka kyakulia, nti asungibwa, kubuno ntakukita ku bukatizio. Nu kinsania kitakutuka ku bukatizio kili bwagi.