Kwanza Bakota ba Kisi
13
1 Muntu na muntu anze bangati banene; kubuno takuli bwangato bwampa butatukile ku Kalaga; nu bakota beligo babikilwe na Kalaga. 2 Ububo wozo ukubenga mwangati nti akuguna ikakizio lyabikilwe na Kalaga, nu babo bakuguna bakwimanina lusungio bobenyene. 3 Kubuno bangati tabakusungia bantu ku kabamba ka makitilo masoga, tondo ku kabamba ka makitilo mabi. Ndi, ukutunda kutakua mwangati boba? Kita busoga, nu nti waganunwe nage. 4 Mwangati eli mukiti wa Kalaga ku kukitila busoga. Tondo ndi wakita bubi, kwa boba, kubuno ntakweka bupanga buliabulia, kubuno eli mukiti wa Kalaga buno asungie wozo ukukita bubi. 5 Ku bubuno umpanga, bwatunganana nunse kwanza, ta ku kabamba ka boba bwa lusungio tugu, tondo lingo ku kabamba ka kalenganio kasoga. 6 Ku kabamba kako lingo mukuliga kodi ku bangati. Kubuno bangati beli bakiti ba Kalaga, bakukita kankanka wono mulimo. 7 Kasazi bansania kikyo kibatunganana kuligwa, kodi ku wozo watunganana kuligwa kodi, mutulo ku wozo watunganana kukaswa mutulo, boba ku wozo watunganana kukubwa boba, bukuti ku wozo u watunganana kukutibwa.
Lutundo lwa MuKristo ku Ungo Muntu
8 Tamube na nsombi na muntu wampa, umpanga mutundane bweinyubweinyu, kubuno wozo ukutunda bango nti azindilizia mulembe. 9 Kubuno milembe zili bunee: “Ntukite butazi, ntwite, ntwibe, ntutonie,” nu ingo milembe zinavwama kuba gamozi na zeno zasambikibwa mu kitondo kikino buno tunda munyobe anga buwitunda uwenyene. 10 Lutundo talukukitila munyage bubi; umpanga lutundo luli kusililila kwa mulembe.
Kuba Kayikayika ku Kuvwa kwa Kristo
11 Bubo bwatunganana nunse gamukumenya buno mu nkungu nkizi zituli muzo buno zili nkungu za kuyuka ku tulo, kubuno kano kaluma lonio luli bwigi nunse na beiswe kutinga nkungu zitwakatizizie. 12 Busi buse bwizizia bwida, busi buse bwigi na kukya. Umpanga tusige makitilo ma kapilo, nu tuvwale ngabo za kyengi. 13 Tutabange busoga anga munkatini mwa musi, kuteli buliagundu nu kukua na maku, kuteli butazi nu lutundo lubi, kuteli nsake nu lugi. 14 Tondo muvwale Mukota Yesu Kristo, nu tamukengele meiyanino ma mubili buno mubogiebogie ntundo mbi.