Kalamo Kato ku Mulimo wa Kalaga
12
1 Umpanga mibuto zane, nkumusengezia buno, ku kyombo kya Kalaga, kasanazi mibili zeinyu kuba kisansa kikulamaga kyaswagibwa nu kikutananizia Kalaga, u ikumbamino lyeinyu lya bumenyinino. 2 Tamususananie na bantu ba nkiko zeno, tondo mugalukibwe ku bumenyinino bweinyu buto, buno mumenyinine nunse buni buli kusombola kwa Kalaga, u kikyo kili kisoga, kikutananizia nu kyasililila. 3 Kubuno, ku mponga zinakasilwe, nkubula muntu na muntu wa kumuli buno nteikengele wenyene kutinga bwatunganana kukengela tondo abe na makengelo mabota anga bwabeganizie Kalaga bukatizio ku muntu na muntu. 4 Kubuno, anga bubo butuli na biganza byingi mu mubili umozi, nu biganza binsania tabili na mulimo umozi, 5 ububo, iswe beli beingi, tuli mubili umozi mu Kristo, nu iswe tubansania tuli biganza, na kiganza na kiganza ku kingo. 6 Tondo tuli na nkaso zengukana, anga mponga zitwakasilwe. Ndi muntu eli na lukaso lwa bulengania, akite geigezye bukatizio bwage. 7 Wozo wamanwa ku mulimo wa kukasia eikasane ku mulimo wage; wozo ukwigisia, eikasane ku kwigisia kwage. 8 Nu wozo ukwana nti ane, nu wozo ukukasana akasane na mutima musoga. Wozo ukwangata angate na komanizia, nu wozo ukukua kyombo akikue na mbogimbogi.
9 Lutundo lube kuteli bwengelezi. Sombazi bubi, gomiazi na busoga. 10 Ku lutundo lwa mibuto, mube nunse na lutundo bweinyubweinyu; ku lwanzo, kitanazi mponga bweinyubweinyu; 11 Mube bakiti, tondo tamube na kogya, mube nunse na mutima wa komanizia, mukitile Mukota. 12 Mubogeboge mu kilemanizio, mube na nkiki mu mbabazio, mwikokomezie mu kusega. 13 Mukasie baswagibwa ku meiyanino mabo, nu musekele bageni. 14 Kitazi babo bakumubabazia mponga, kitazi mponga nu tamuswilile. 15 Bogazibogazi na babo bakubogaboga, nu lilazi gamozi na babo bakulila. 16 Mube na makengelo mamozi bweinyubweinyu. Tamubike makengelo meinyu ku bitondo byamutinga, tondo mwitabizie kukita gamozi na babo bakwisigulizia. Tamube bantu bakwikotizia menge.
17 Tamusubizie muntu wampa bubi ku bubi. Kitazi busoga lwabusio lwa bantu bansania. 18 Ndi bwakulungana kumuli, mube na bubobelelo na bantu bansania. 19 Batundwa bane, tamwisube mubenyene, tondo musigile Kalaga kukita na bongoa; kubuno bwasanzilwe bunee: “Kusuba kuli kwane, nne u ukasuba, u bukutenda Mukota Kalaga!” a 20 Tondo ndi muntu wakusomba akukua na nzala, nti wamukasa kyanalia; ndi eli na mpusia nti wamukasa mazi ma kunua; kubuno mu kukita bubo nti buli anga wabika kibombo kya makangania ma keiya gantata g'itoe lyage. 21 Ntukindwe na bubi, tondo ukinde bubi na busoga.